ਹਿਊਸਟਨ ਯੂਨੀਵਰਸਿਟੀ ਦੇ ਸਾਬਕਾ ਵਿਦਿਆਰਥੀ ਭਾਰਤੀ ਮੂਲ ਦੇ ਅਮਰੀਕਨ ਉੱਦਮੀ ਬ੍ਰਿਜ ਅਗਰਵਾਲ ਤੇ ਉਸ ਦੀ ਪਤਨੀ ਸੁਨੀਤਾ ਨੇ ਹਿਊਸਟਨ ਯੂਨੀਵਰਸਿਟੀ ‘ਚ ਪ੍ਰਯੋਗਸ਼ਾਲਾ ਉਪਕਰਨਾਂ ਲਈ 10 ਲੱਖ ਅਮਰੀਕਨ ਡਾਲਰ ਦਾਨ ਦਿੱਤਾ ਹੈ। ਉਨ੍ਹਾਂ ਗ੍ਰੇਟਰ ਹਿਊਸਟਨ ਦੇ ਉਪਨਗਰ ਸ਼ੁਗਰ ਲੈਂਡ ‘ਚ ਯੂਨੀਵਰਸਿਟੀ ਆਫ਼ ਹਿਊਸਟਨ ਕਾਲਜ ਆਫ਼ ਟੈਕਨਾਲੋਜੀ ਦੀ ਇਮਾਰਤ ‘ਚ ਪ੍ਰਯੋਗਸ਼ਾਲਾ ਉਪਕਰਣਾਂ ਦੇ ਨਿਰਮਾਣ ਲਈ ਇਹ ਰਕਮ ਦਾਨ ਦਿੱਤੀ ਹੈ। ਉੱਦਮੀ ਜੋੜਾ ਨਵੀਨਤਮ 3ਡੀ ਪ੍ਰਿੰਟਰ, ਮਸ਼ੀਨ ਉਪਕਰਣ ਅਤੇ ਮਾਪ ਟੈਸਟਿੰਗ ਉਪਕਰਣ ਦੇ ਨਾਲ-ਨਾਲ ਛੋਟੇ ਅਤੇ ਮੱਧਮ ਪੱਧਰ ਦੇ ਉਦਯੋਗ ‘ਤੇ ਕੇਂਦ੍ਰਿਤ ਇਕ ਉੱਨਤ ਨਿਰਮਾਣ ਡਿਜ਼ਾਈਨ ਕੇਂਦਰ ਦਾ ਨਿਰਮਾਣ ਕਰਨ ਲਈ ਫੰਡ ਦੇ ਕੇ ਮਦਦ ਕਰ ਰਹੇ ਹਨ। ਅਗਰਵਾਲ ਨੇ ਕਿਹਾ, ‘ਜੇਕਰ ਇਹ ਯੂ.ਐੱਚ. ਸਿਸਟਮ ਨਾ ਹੁੰਦਾ ਤਾਂ ਮੈਂ ਕਾਲਜ ਤੋਂ ਗ੍ਰੈਜੂਏਟ ਨਾ ਹੁੰਦਾ। ਇਸ ਲਈ ਮੈਂ ਯੂ.ਐੱਚ. ਦਾ ਸਮਰਥਨ ਕਰਨ ਲਈ ਬਹੁਤ ਉਤਸ਼ਾਹਿਤ ਹਾਂ।’ ਉਨ੍ਹਾਂ ਕਿਹਾ, ‘ਮੈਂ ਸ਼ੂਗਰ ਲੈਂਡ ‘ਚ ਰਹਿੰਦਾ ਹਾਂ ਅਤੇ ਇਹ ਮੈਨੂੰ ਸ਼ੂਗਰ ਲੈਂਡ ਕੈਂਪਸ ‘ਚ ਯੂ.ਐੱਚ. ਨਾਲ ਹੋਰ ਜੋੜਦਾ ਹੈ।’ ਯੂਨੀਵਰਸਿਟੀ ਜੋੜੇ ਦੇ ਸਨਮਾਨ ‘ਚ ਇਮਾਰਤ ਦੀ ਹੇਠਲੀ ਮੰਜ਼ਿਲ ‘ਤੇ ਸਥਿਤ ਆਡੀਟੋਰੀਅਮ ਦਾ ਨਾਂ ‘ਬ੍ਰਿਜ ਅਤੇ ਸੁਨੀਤਾ ਅਗਰਵਾਲ ਆਡੀਟੋਰੀਅਮ’ ਰੱਖੇਗੀ। ਮੂਲ ਰੂਪ ‘ਚ ਪੰਜਾਬ ਦੇ ਲਖਨਪੁਰ ਤੋਂ ਆਉਣ ਵਾਲੇ ਅਗਰਵਾਲ 17 ਸਾਲ ਦੀ ਉਮਰ ‘ਚ ਹਿਊਸਟਨ ਚਲੇ ਗਏ ਸਨ ਅਤੇ ਪੂਰਾ ਸਮਾਂ ਕੰਮ ਕਰਦੇ ਹੋਏ ਯੂ.ਐੱਚ. ਵਿਖੇ ਨਾਈਟ ਸਕੂਲ ‘ਚ ਪੜ੍ਹਾਈ ਕੀਤੀ।
