ਨਿਊਯਾਰਕ ‘ਚ ਮਹਾਤਮਾ ਗਾਂਧੀ ਦੀ ਮੂਰਤੀ ਮੁੜ ਤੋੜੀ, ਨਫਰਤ ਭਰੇ ਸ਼ਬਦ ਲਿਖੇ

ਕੁਝ ਦਿਨ ਪਹਿਲਾਂ ਮਹਾਤਮਾ ਗਾਂਧੀ ਦੀ ਮੂਰਤੀ ਦੀ ਭੰਨ-ਤੋੜ ਕਰਨ ਤੋਂ ਬਾਅਦ ਇਕ ਵਾਰ ਫਿਰ ਨਿਊਯਾਰਕ ‘ਚ ਇਕ ਮੰਦਰ ਦੇ ਸਾਹਮਣੇ ਮਹਾਤਮਾ ਗਾਂਧੀ ਦੀ ਮੂਰਤੀ ਨੂੰ ਤੋੜ ਦਿੱਤਾ ਗਿਆ। ਮਹੀਨੇ ‘ਚ ਦੂਜੀ ਵਾਰ ਹੋਏ ਇਸ ਹਮਲੇ ਤੋਂ ਬਾਅਦ ਇਕ ਸਥਾਨਕ ਵਾਲੰਟੀਅਰ ਵਾਚ ਗਰੁੱਪ ਨੇ ਇਸ ਮਾਮਲੇ ‘ਚ ਇਸਦੇ ਖ਼ਿਲਾਫ਼ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ। ਪੁਲੀਸ ਦੇ ਹਵਾਲੇ ਨਾਲ ਮੀਡੀਆ ਰਿਪੋਰਟਾਂ ਮੁਤਾਬਕ ਛੇ ਲੋਕਾਂ ਨੇ ਸ਼੍ਰੀ ਤੁਲਸੀ ਮੰਦਰ ‘ਚ ਮੂਰਤੀ ਨੂੰ ਹਥੌੜੇ ਨਾਲ ਨਸ਼ਟ ਕਰ ਦਿੱਤਾ ਅਤੇ ਇਸ ਦੇ ਆਲੇ-ਦੁਆਲੇ ਅਤੇ ਸੜਕ ‘ਤੇ ਨਫਰਤ ਭਰੇ ਸ਼ਬਦ ਲਿਖੇ। ਕੁਈਨਜ਼ ਡੇਲੀ ਈਗਲ ਅਨੁਸਾਰ ਮੂਰਤੀ ਨੂੰ ਸਭ ਤੋਂ ਪਹਿਲਾਂ 3 ਅਗਸਤ ਨੂੰ ਢਾਹਿਆ ਗਿਆ ਅਤੇ ਤੋੜਿਆ ਗਿਆ। ਪੁਲੀਸ ਨੇ 25 ਤੋਂ 30 ਸਾਲ ਦੀ ਉਮਰ ਦੇ ਪੁਰਸ਼ਾਂ ਦਾ ਇਕ ਵੀਡੀਓ ਜਾਰੀ ਕੀਤਾ ਹੈ ਜਿਨ੍ਹਾਂ ਦੇ ਹਮਲੇ ‘ਚ ਸ਼ਾਮਲ ਹੋਣ ਦਾ ਸ਼ੱਕ ਹੈ। ਪੁਲੀਸ ਅਨੁਸਾਰ ਉਹ ਇਕ ਚਿੱਟੇ ਰੰਗ ਦੀ ਮਰਸਡੀਜ਼ ਬੈਂਜ਼ ਅਤੇ ਇਕ ਗੂੜ੍ਹੇ ਰੰਗ ਦੀ ਕਾਰ, ਜੋ ਕਿ ਟੋਇਟਾ ਕੈਮਰੀ ਹੋ ਸਕਦੀ ਹੈ, ‘ਚ ਕਿਰਾਏ ਦੇ ਵਾਹਨ ਵਜੋਂ ਫ਼ਰਾਰ ਹੋ ਗਏ। ਨਿਊਯਾਰਕ ਰਾਜ ਵਿਧਾਨ ਸਭਾ ਲਈ ਚੁਣੀ ਗਈ ਪਹਿਲੀ ਹਿੰਦੂ ਅਸੈਂਬਲੀ ਮੈਂਬਰ ਜੈਨੀਫਰ ਰਾਜਕੁਮਾਰ ਨੇ ਦੱਸਿਆ, ‘ਜਦੋਂ ਗਾਂਧੀ ਦੀ ਮੂਰਤੀ ਨੂੰ ਤੋੜਿਆ ਗਿਆ, ਇਹ ਅਸਲ ‘ਚ ਸਾਡੇ ਸਾਰੇ ਵਿਸ਼ਵਾਸਾਂ ਦੇ ਵਿਰੁੱਧ ਸੀ ਅਤੇ ਇਹ ਭਾਈਚਾਰੇ ਲਈ ਚੰਗਾ ਨਹੀਂ ਸੀ।’ ਮੰਦਰ ਦੇ ਸੰਸਥਾਪਕ ਪੰਡਤ ਮਹਾਰਾਜ ਨੇ ਕਿਹਾ, ‘ਗਾਂਧੀ ਸ਼ਾਂਤੀ ਦੀ ਪ੍ਰਤੀਨਿਧਤਾ ਕਰਦੇ ਹਨ ਅਤੇ ਕੋਈ ਆ ਕੇ ਮੂਰਤੀ ਨੂੰ ਤੋੜ ਦੇਵੇਗਾ, ਇਹ ਬਹੁਤ ਦੁਖਦਾਈ ਹੈ।’ ਇਸ ਦੌਰਾਨ ਵਾਲੰਟੀਅਰ ਵਾਚ ਗਰੁੱਪ ਸਿਟੀਲਾਈਨ ਓਜ਼ੋਨ ਪਾਰਕ ਸਿਵਲੀਅਨ ਪੈਟਰੋਲ ਨੇ ਟਵੀਟ ਕੀਤਾ ਕਿ ਇਸਦੇ ਮੈਂਬਰਾਂ ਨੇ ਮੰਦਰ ਦੇ ਆਲੇ ਦੁਆਲੇ ਆਪਣੀ ਮੌਜੂਦਗੀ ਵਧਾ ਦਿੱਤੀ ਹੈ। ਉਨ੍ਹਾਂ ਨੇ ਇਕ ਟਵੀਟ ‘ਚ ਕਿਹਾ, ‘ਅਸੀਂ ਤੁਲਸੀ ਮੰਦਰ ‘ਚ ਆਪਣੀ ਮੌਜੂਦਗੀ ਵਧਾ ਦਿੱਤੀ ਹੈ ਅਤੇ ਉਥੇ ਪੁਲੀਸ ਵੀ ਤਾਇਨਾਤ ਹੈ। ਇਹ ਮੰਦਰ ਦੱਖਣੀ ਰਿਚਮੰਡ ਪਾਰਕ ‘ਚ ਸਥਿਤ ਹੈ ਜੋ ਅਜਿਹਾ ਖੇਤਰ ਜਿੱਥੇ ਭਾਰਤੀ ਮੂਲ ਦੇ ਬਹੁਤ ਸਾਰੇ ਲੋਕ ਰਹਿੰਦੇ ਹਨ। ਖੱਬੇ ਪੱਖੀਆਂ ਅਤੇ ਖਾਲਿਸਤਾਨੀਆਂ ਨੇ ਅਮਰੀਕਾ ਭਰ ‘ਚ ਗਾਂਧੀ ਦੇ ਬੁੱਤਾਂ ਨੂੰ ਹਟਾਉਣ ਨੂੰ ਨਿਸ਼ਾਨਾ ਬਣਾਇਆ ਹੈ ਜਿਵੇਂ ਕਿ ਨਿਊਯਾਰਕ ਸਿਟੀ ‘ਚ ਇਕ ਹੋਰ ਬੁੱਤ ਨਾਲ ਹੋਇਆ ਸੀ।