ਨੋਬਲ ਸ਼ਾਂਤੀ ਪੁਰਸਕਾਰ ਜੇਤੂ ਮਾਰੀਆ ਰਾਸਾ ਅਤੇ ਉਸਦੀ ਆਨਲਾਈਨ ਨਿਊਜ਼ ਕੰਪਨੀ ਨੂੰ ਫਿਲੀਪੀਨ ਦੀ ਅਦਾਲਤ ਨੇ ਬੁੱਧਵਾਰ ਨੂੰ ਟੈਕਸ ਚੋਰੀ ਦੇ ਦੋਸ਼ਾਂ ਤੋਂ ਮੁਕਤ ਕਰ ਦਿੱਤਾ। ਰਾਸਾ ਨੇ ਕਿਹਾ ਕਿ ਸਾਬਕਾ ਰਾਸ਼ਟਰਪਤੀ ਰੋਡਰਿਗੋ ਡੁਟੇਰਤੇ ਦੇ ਖ਼ਿਲਾਫ਼ ਰਿਪੋਰਟਿੰਗ ਕਰਨ ਲਈ ਉਨ੍ਹਾਂ ਨੂੰ ਇਨ੍ਹਾਂ ਮਾਮਲਿਆਂ ‘ਚ ਫਸਾਇਆ ਗਿਆ ਹੈ। ਟੈਕਸ ਅਪੀਲਾਂ ਦੀ ਅਦਾਲਤ ਨੇ ਫ਼ੈਸਲਾ ਸੁਣਾਇਆ ਕਿ ਸਰਕਾਰੀ ਵਕੀਲ ਇਹ ਦੋਸ਼ ਸਾਬਤ ਕਰਨ ‘ਚ ਅਸਫਲ ਰਹੇ ਹਨ ਕਿ ਰੂਸ ਅਤੇ ਉਸਦੀ ਕੰਪਨੀ, ਰੈਪਲਰ ਹੋਲਡਿੰਗ ਕਾਰਪੋਰੇਸ਼ਨ, ਦੋ ਵਿਦੇਸ਼ੀ ਨਿਵੇਸ਼ਕਾਂ ਨਾਲ ਸਾਂਝੇਦਾਰੀ ਰਾਹੀਂ ਪੈਸਾ ਇਕੱਠਾ ਕਰਨ ਤੋਂ ਬਾਅਦ ਚਾਰ ਮਾਮਲਿਆਂ ‘ਚ ਟੈਕਸ ਦਾ ਭੁਗਤਾਨ ਕਰਨ ਤੋਂ ਬਚਿਆ ਹੈ। ਅਦਾਲਤ ਨੇ ਆਪਣੇ ਫੈਸਲੇ ‘ਚ ਕਿਹਾ ਕਿ ਮੁਲਜ਼ਮਾਂ ਨੂੰ ਬਰੀ ਕਰਨਾ ਅਦਾਲਤ ਦੇ ਇਸ ਸਿੱਟੇ ‘ਤੇ ਆਧਾਰਿਤ ਹੈ ਕਿ ਮੁਲਜ਼ਮਾਂ ਨੇ ਅਜਿਹਾ ਅਪਰਾਧ ਨਹੀਂ ਕੀਤਾ ਹੈ। ਇਸ ਦੇ ਨਾਲ ਹੀ ਰੈਪਲਰ ਨੇ ਅਦਾਲਤ ਦੇ ਫੈਸਲੇ ਨੂੰ ਸਿਆਸੀ ਸਾਜ਼ਿਸ਼ ‘ਤੇ ਜਿੱਤ ਕਰਾਰ ਦਿੱਤਾ ਹੈ। ਕੰਪਨੀ ਨੇ ਆਪਣੇ ਬਿਆਨ ‘ਚ ਕਿਹਾ ਕਿ ਉਹ ਇਸ ਨਿਆਂਪੂਰਨ ਫੈਸਲੇ ਲਈ ਅਦਾਲਤ ਦਾ ਧੰਨਵਾਦ ਕਰਦੀ ਹੈ ਅਤੇ ਸਵੀਕਾਰ ਕਰਦੀ ਹੈ ਕਿ ਬਿਊਰੋ ਆਫ ਇੰਟਰਨਲ ਰੈਵੇਨਿਊ ਦੁਆਰਾ ਲਗਾਏ ਗਏ ਧੋਖਾਧੜੀ, ਝੂਠੇ ਅਤੇ ਬੇਤੁਕੇ ਦੋਸ਼ਾਂ ਦਾ ਅਸਲ ‘ਚ ਕੋਈ ਆਧਾਰ ਨਹੀਂ ਹੈ। ਇਸ ਤੋਂ ਇਲਾਵਾ ਰੈਪਲਰ ਨੇ ਰਾਸਾ ਦੇ ਹਵਾਲੇ ਨਾਲ ਫੈਸਲਾ ਸੁਣਾਏ ਜਾਣ ਤੋਂ ਬਾਅਦ ਕਿਹਾ ਕਿ ਅੱਜ ਤੱਥ, ਸੱਚ ਅਤੇ ਨਿਆਂ ਦੀ ਜਿੱਤ ਹੋਈ ਹੈ। ਦੱਸਦੇਈਏ ਕਿ ਰਾਸਾ ਨੇ ਰੂਸੀ ਪੱਤਰਕਾਰ ਦਿਮਿਤਰੀ ਮੁਰਾਤੋਵ ਦੇ ਨਾਲ ਮਿਲ ਕੇ 2021 ‘ਚ ਆਪਣੇ ਸਮਾਚਾਰ ਸੰਗਠਨਾਂ ਦੀ ਹੋਂਦ ਲਈ ਲੜਨ ਲਈ ਨੋਬਲ ਜਿੱਤਿਆ ਸੀ। ਹਾਲਾਂਕਿ ਸਰਕਾਰ ਨੇ ਉਸਦੀ ਕੰਪਨੀ ਨੂੰ ਬੰਦ ਕਰਨ ਦੀ ਕੋਸ਼ਿਸ਼ ਕੀਤੀ। ਦੋਵਾਂ ਨੂੰ ਪ੍ਰਗਟਾਵੇ ਦੀ ਆਜ਼ਾਦੀ ਦੀ ਰੱਖਿਆ ਲਈ ਉਨ੍ਹਾਂ ਦੇ ਯਤਨਾਂ ਲਈ ਸਨਮਾਨਿਤ ਕੀਤਾ ਗਿਆ ਜੋ ਲੋਕਤੰਤਰ ਅਤੇ ਸਥਾਈ ਸ਼ਾਂਤੀ ਲਈ ਜ਼ਰੂਰੀ ਹਨ। ਮਨੀਲਾ ‘ਚ ਸਕਿਓਰਿਟੀਜ਼ ਐਂਡ ਐਕਸਚੇਂਜ ਕਮਿਸ਼ਨ ਨੇ 2018 ‘ਚ ਦੋਸ਼ ਲਾਇਆ ਸੀ ਕਿ ਨਿਊਜ਼ ਵੈੱਬਸਾਈਟ ਨੇ ਵਿਦੇਸ਼ੀ ਨਿਵੇਸ਼ਕਾਂ ਓਮੀਡੀਅਰ ਨੈੱਟਵਰਕ ਅਤੇ ਨੌਰਥ ਬੇਸ ਮੀਡੀਆ ਤੋਂ ਪੈਸੇ ਲੈ ਕੇ ਇਕ ਸੰਵਿਧਾਨਕ ਵਿਵਸਥਾ ਦੀ ਉਲੰਘਣਾ ਕੀਤੀ ਹੈ। ਫਿਲੀਪੀਨਜ਼ ਮੀਡੀਆ ਕੰਪਨੀਆਂ ਦੀ ਵਿਦੇਸ਼ੀ ਮਾਲਕੀ ਅਤੇ ਨਿਯੰਤਰਣ ‘ਤੇ ਪਾਬੰਦੀ ਲਗਾਉਂਦਾ ਹੈ। ਫਿਲੀਪੀਨਜ਼ ਕਮਿਸ਼ਨ ਨੇ ਦੋਸ਼ਾਂ ਦੇ ਆਧਾਰ ‘ਤੇ ਰੈਪਲਰ ਨੂੰ ਬੰਦ ਕਰਨ ਦਾ ਹੁਕਮ ਦਿੱਤਾ ਜਿਸ ਨੂੰ ਕੰਪਨੀ ਨੇ ਇਨਕਾਰ ਕੀਤਾ। ਫਿਰ ਇਸ ਨੇ ਅਦਾਲਤ ਨੂੰ ਅਪੀਲ ਕੀਤੀ, ਇਹ ਕਿਹਾ ਕਿ ਇਹ ਪੂਰੀ ਤਰ੍ਹਾਂ ਫਿਲੀਪੀਨਜ਼ ਦੀ ਮਲਕੀਅਤ ਵਾਲੀ ਅਤੇ ਨਿਯੰਤਰਿਤ ਨਿਊਜ਼ ਕੰਪਨੀ ਹੈ। ਉਸ ਖ਼ਿਲਾਫ਼ ਟੈਕਸ ਚੋਰੀ ਦੇ ਕੁੱਲ ਚਾਰ ਕੇਸ ਦਰਜ ਹਨ। ਰੈਪਲਰ 2012 ‘ਚ ਸਥਾਪਤ ਫਿਲੀਪੀਨਜ਼ ਅਤੇ ਅੰਤਰਰਾਸ਼ਟਰੀ ਨਿਊਜ਼ ਏਜੰਸੀਆਂ ਵਿੱਚੋਂ ਇਕ ਹੈ। ਇਸ ਨੇ ਗੈਰਕਾਨੂੰਨੀ ਨਸ਼ੀਲੇ ਪਦਾਰਥਾਂ ‘ਤੇ ਸਾਬਕਾ ਰਾਸ਼ਟਰਪਤੀ ਡੁਟੇਰਟੇ ਦੀ ਬੇਰਹਿਮੀ ਨਾਲ ਕਾਰਵਾਈ ਦੀ ਆਲੋਚਨਾਤਮਕ ਤੌਰ ‘ਤੇ ਰਿਪੋਰਟ ਕੀਤੀ ਸੀ।
