ਲੰਘੇ ਸਾਲ ਸਕਾਟਲੈਂਡ ਦੀ ਧਰਤੀ ‘ਤੇ ਪੈਮ ਗੋਸਲ ਨੂੰ ਪਹਿਲੀ ਸਿੱਖ ਐੱਮ.ਐੱਸ.ਪੀ. ਹੋਣ ਦਾ ਮਾਣ ਹਾਸਲ ਹੋਇਆ ਸੀ ਅਤੇ ਹੁਣ ਇਕ ਹੋਰ ਕਾਰਜ ਕਰਕੇ ਪੈਮ ਸੁਰਖੀਆਂ ‘ਚ ਹੈ। ਉਨ੍ਹਾਂ ਵੱਲੋਂ ਸਕਾਟਿਸ਼ ਪਾਰਲੀਮੈਂਟ ‘ਚ ਘਰੇਲੂ ਹਿੰਸਾ ਖ਼ਿਲਾਫ਼ ਬਿੱਲ ਦਾ ਪ੍ਰਸਤਾਵ ਪੇਸ਼ ਕੀਤਾ ਗਿਆ ਹੈ। ਜੇਕਰ ਇਸ ਬਿੱਲ ਨੂੰ ਕਰਾਸ ਪਾਰਟੀ ਦੀ ਸਹਿਮਤੀ ਪ੍ਰਾਪਤ ਹੁੰਦੀ ਹੈ ਤਾਂ ਜਿਣਸੀ ਸੋਸ਼ਣ ਕਰਨ ਵਾਲਿਆਂ ਖ਼ਿਲਾਫ਼ ਹੁੰਦੀ ਕਾਨੂੰਨੀ ਕਾਰਵਾਈ ਵਾਂਗ ਘਰੇਲੂ ਹਿੰਸਾ ਕਰਨ ਵਾਲਿਆਂ ਖ਼ਿਲਾਫ਼ ਵੀ ਸਖ਼ਤ ਕਾਰਵਾਈ ਹੋ ਸਕਦੀ ਹੈ। ਪੈਮ ਗੋਸਲ ਵੱਲੋਂ ਪ੍ਰਸਤਾਵਿਤ ‘ਘਰੇਲੂ ਹਿੰਸਾ ਰੋਕੂ ਬਿੱਲ’ ਦੇ ਹੋਂਦ ‘ਚ ਆਉਣ ਨਾਲ ਇਹ ਸਕੂਲੀ ਸਿੱਖਿਆ ‘ਚ ਵੀ ਆਪਣੀ ਬਣਦੀ ਜਗ੍ਹਾ ਬਣਾ ਲਵੇਗਾ। ਇਸ ਸੁਝਾਏ ਗਏ ਬਿੱਲ ‘ਤੇ ਹੋਲੀਰੂਡ ‘ਚ ਸਲਾਹ ਮਸ਼ਵਰਿਆਂ ਦਾ ਦੌਰ ਸ਼ੁਰੂ ਹੋ ਚੁੱਕਾ ਹੈ। ਜ਼ਿਕਰਯੋਗ ਹੈ ਕਿ ਪੈਮ ਗੋਸਲ ਪੱਛਮੀ ਸਕਾਟਲੈਂਡ ਲਈ ਸਕੌਟਿਸ਼ ਕੰਜ਼ਰਵੇਟਿਵ ਐੱਮ.ਐੱਸ.ਪੀ. ਹੈ ਤੇ ਉਨ੍ਹਾਂ ਵੱਲੋਂ ਘਰੇਲੂ ਬਦਸਲੂਕੀ ਨੂੰ ‘ਭਿਆਨਕ ਅਪਰਾਧ’ ਵਜੋਂ ਪ੍ਰਭਾਸ਼ਿਤ ਕੀਤਾ ਗਿਆ ਹੈ। ਪੈਮ ਗੋਸਲ ਦਾ ਕਹਿਣਾ ਹੈ ਕਿ ਪੁਲੀਸ ਸਕਾਟਲੈਂਡ ਦੇ ਅੰਕੜਿਆਂ ਮੁਤਾਬਕ 2020-21 ‘ਚ ਘਰੇਲੂ ਹਿੰਸਾ ਦੇ 65251 ਮਾਮਲੇ ਸਾਹਮਣੇ ਆਏ ਸਨ, ਜਿਹੜੇ ਕਿ ਪਿਛਲੇ ਸਾਲ ਦੇ ਅੰਕੜਿਆਂ ਨਾਲੋਂ 4 ਫ਼ੀਸਦ ਵੱਧ ਸਨ। ਇਥੇ ਹੀ ਬੱਸ ਨਹੀਂ ਸਗੋਂ ਘਰੇਲੂ ਹਿੰਸਾ ਦੀਆਂ ਘਟਨਾਵਾਂ ‘ਚ ਪਿਛਲੇ 5 ਸਾਲ ਤੋਂ ਨਿਰੰਤਰ ਵਾਧਾ ਵੀ ਜਾਰੀ ਹੈ। ਇਸ ਭਿਆਨਕ ਅਪਰਾਧ ‘ਚ ਵਾਧਾ ਕਦੇ ਵੀ ਬਰਦਾਸ਼ਤ ਨਹੀਂ ਕੀਤਾ ਜਾ ਸਕਦਾ। ਇਸਦੀ ਰੋਕਥਾਮ ਲਈ ਇਸ ਕਾਨੂੰਨ ਦਾ ਹੋਂਦ ‘ਚ ਆਉਣਾ ਬੇਹੱਦ ਲਾਜ਼ਮੀ ਹੈ। ਜੇਕਰ ਪੈਮ ਗੋਸਲ ਵੱਲੋਂ ਪ੍ਰਸਤਾਵਿਤ ਬਿੱਲ ‘ਤੇ ਸਹਿਮਤੀ ਦਾ ਠੱਪਾ ਲੱਗ ਜਾਂਦਾ ਹੈ ਤਾਂ ਇਹ ਵੀ ਆਪਣੇ-ਆਪ ‘ਚ ਇਕ ਇਤਿਹਾਸਕ ਉਪਰਾਲਾ ਹੋਵੇਗਾ।
