ਬਰੈਂਪਟਨ ਦੀ ਸਿਟੀ ਕੌਂਸਲ ਵੱਲੋਂ ਹਾਲ ‘ਚ ਹੀ ਬਰੈਂਪਟਨ ਦੀਆਂ ਦੋ ਪਾਰਕਾਂ ਦੇ ਨਾਮ ਬਦਲੇ ਗਏ ਹਨ। ਬਰੈਂਪਟਨ ਦੀ ਟਰੋਇਰਸ ਪਾਰਕ ਦਾ ਨਾਮ ਬਦਲਕੇ ਸ਼੍ਰੀ ਭਗਵਦ ਗੀਤਾ ਪਾਰਕ ਅਤੇ ਅਲੋਆ ਗ੍ਰੀਨ ਪਾਰਕ ਦਾ ਨਾਮ ਬਦਲਕੇ ਅਹਿਮਦੀਆਂ ਪਾਰਕ ਰੱਖ ਦਿੱਤਾ ਗਿਆ ਹੈ। ਗੌਰਤਲਬ ਹੈ ਕਿ ਇਸ ਤੋਂ ਪਹਿਲਾ ਬਰੈਂਪਟਨ ‘ਚ ਹੀ ਕੁਝ ਸੜਕਾਂ ਦੇ ਨਾਮ ਵੀ ਬਦਲੇ ਗਏ ਸਨ ਜਿਨ੍ਹਾਂ ‘ਚ ਮਸਜਿਦ ਡਰਾਈਵ ਅਤੇ ਗੁਰੂ ਨਾਨਕ ਰੋਡ ਵੀ ਸ਼ਾਮਲ ਹਨ। ਬਰੈਂਪਟਨ ਦੇ ਮੇਅਰ ਪੈਟਰਿਕ ਬ੍ਰਾਊਨ ਨੇ ਟਰਾਇਰਜ਼ ਪਾਰਕ ਦਾ ਨਾਂ ਬਦਲ ਕੇ ਸ਼੍ਰੀ ਭਗਵਦ ਗੀਤਾ ਪਾਰਕ ਰੱਖਿਆ। ਇਸ ਮੌਕੇ ਉਨ੍ਹਾਂ ਨੇ ਭਗਵਦ ਗੀਤਾ ਪਾਰਕ ਕਰਨ ਦਾ ਉਦਘਾਟਨ ਵੀ ਕੀਤਾ। ਇਕ ਟਵੀਟ ਕਰਕੇ ਉਨ੍ਹਾਂ ਨੇ ਇਹ ਜਾਣਕਾਰੀ ਦਿੱਤੀ। ਮੇਅਰ ਦਾ ਕਹਿਣਾ ਹੈ ਕਿ ਰੱਥ ‘ਤੇ ਕ੍ਰਿਸ਼ਨ, ਅਰਜੁਨ ਦੀਆਂ ਮੂਰਤੀਆਂ ਰੱਖ ਕੇ ਅਸੀਂ ਆਪਣੇ ਬਰੈਂਪਟਨ ਸ਼ਹਿਰ ‘ਚ ਸਾਰੀਆਂ ਸੰਸਕ੍ਰਿਤੀਆਂ ਅਤੇ ਸਾਰੇ ਵਿਸ਼ਵਾਸਾਂ ਦਾ ਜਲਦੀ ਜਸ਼ਨ ਮਨਾਵਾਂਗੇ। ਇਹ ਪਾਰਕ 3.75 ਏਕੜ ‘ਚ ਫੈਲਿਆ ਹੋਇਆ ਹੈ, ਜਿਸ ‘ਚ ਇਕ ਰੱਥ ਤੋਂ ਇਲਾਵਾ ਭਗਵਾਨ ਕ੍ਰਿਸ਼ਨ ਜੀ, ਅਰਜੁਨ ਅਤੇ ਹੋਰ ਹਿੰਦੂ ਦੇਵੀ ਦੇਵਤਿਆਂ ਦੀਆਂ ਮੂਰਤੀਆਂ ਲਗਾਈਆਂ ਜਾਣਗੀਆਂ। ਜ਼ਿਕਰਯੋਗ ਹੈ ਕਿ ਇੰਡੀਆ ਤੋਂ ਬਾਹਰ ਕੈਨੇਡਾ ‘ਚ ਇਹ ਇਕ ਅਜਿਹਾ ਪਾਰਕ ਹੈ ਜਿਸ ਦਾ ਨਾਂ ਭਗਵਦ ਗੀਤਾ ਦੇ ਨਾਂ ‘ਤੇ ਰੱਖਿਆ ਗਿਆ ਹੈ। ਮੇਅਰ ਪੈਟਰਿਕ ਬ੍ਰਾਊਨ ਨੇ ਆਪਣੇ ਟਵੀਟ ‘ਚ ਲਿਖਿਆ ਕਿ ਪਾਰਕ ਦਾ ਇਹ ਨਾਮ ਹਿੰਦੂ ਭਾਈਚਾਰੇ ਦੀ ਯਾਦ ਦਿਵਾਉਂਦਾ ਹੈ ਅਤੇ ਇਹ ਸਾਡੇ ਸ਼ਹਿਰ ‘ਚ ਇਸ ਭਾਈਚਾਰੇ ਦਾ ਪਿਆਰ, ਸਦਭਾਵਨਾ ਦੇ ਨਾਲ ਯੋਗਦਾਨ ਅਤੇ ਸਦੀਵੀ ਸ਼ੰਦੇਸ ਨੂੰ ਫੈਲਾਉਣ ‘ਚ ਮਦਦ ਕਰੇਗਾ।
