ਦੱਖਣੀ ਪੇਰੂ ਦੇ ਕਈ ਪਿੰਡਾਂ ‘ਚ ਲਗਾਤਾਰ ਮੀਂਹ ਕਾਰਨ ਜ਼ਮੀਨ ਖਿਸਕਣ ਕਾਰਨ ਘੱਟੋ-ਘੱਟ 36 ਲੋਕਾਂ ਦੀ ਮੌਤ ਹੋ ਗਈ। ਅਧਿਕਾਰੀਆਂ ਨੇ ਇਹ ਜਾਣਕਾਰੀ ਦਿੱਤੀ। ਕੈਮਨਾ ਸੂਬੇ ‘ਚ ਮਾਰੀਆਨੋ ਨਿਕੋਲਸ ਵਾਲਕਾਰਸੇਲ ਨਗਰਪਾਲਿਕਾ ਦੇ ਸਿਵਲ ਡਿਫੈਂਸ ਅਫਸਰ ਵਿਲਸਨ ਗੁਟੇਰੇਜ਼ ਨੇ ਦੱਸਿਆ ਕਿ ਮਿਸਕੀ ਨਾਮਕ ਇਕ ਦੂਰ-ਦੁਰਾਡੇ ਖੇਤਰ ‘ਚ 36 ਲਾਸ਼ਾਂ ਬਰਾਮਦ ਕੀਤੀਆਂ ਗਈਆਂ ਹਨ। ਇਨ੍ਹਾਂ ‘ਚੋਂ 5 ਲੋਕ ਇਕ ਵੈਨ ‘ਚ ਸਵਾਰ ਸਨ ਜੋ ਜ਼ਮੀਨ ਖਿਸਕਣ ਤੋਂ ਬਾਅਦ ਨਦੀ ‘ਚ ਜਾ ਡਿੱਗੀ। ਸਥਾਨਕ ਅਧਿਕਾਰੀਆਂ ਨੇ ਮਲਬੇ ਨਾਲ ਬੰਦ ਮੁੱਖ ਸੜਕ ਦੇ ਲਗਭਗ ਤਿੰਨ ਕਿਲੋਮੀਟਰ ਦੇ ਖੇਤਰ ਨੂੰ ਸਾਫ਼ ਕਰਨ ਲਈ ਮਦਦ ਦੀ ਅਪੀਲ ਕੀਤੀ ਹੈ। ਸਿਵਲ ਡਿਫੈਂਸ ਅਧਿਕਾਰੀਆਂ ਨੇ ਦੱਸਿਆ ਕਿ ਜ਼ਮੀਨ ਖਿਸਕਣ ਤੋਂ ਬਾਅਦ 630 ਘਰਾਂ ਦੇ ਨੁਕਸਾਨੇ ਜਾਣ ਦੀ ਸੰਭਾਵਨਾ ਹੈ। ਇਸ ਨੇ ਪੁਲ, ਸਿੰਚਾਈ ਨਹਿਰਾਂ ਅਤੇ ਸੜਕਾਂ ਨੂੰ ਵੀ ਪ੍ਰਭਾਵਿਤ ਕੀਤਾ ਹੈ। ਪੇਰੂ ‘ਚ ਫਰਵਰੀ ਦੇ ਮਹੀਨੇ ‘ਚ ਅਕਸਰ ਮੀਂਹ ਪੈਂਦਾ ਹੈ ਜਿਸ ਕਾਰਨ ਅਕਸਰ ਜ਼ਮੀਨ ਖਿਸਕ ਜਾਂਦੀ ਹੈ।
