ਵਰਲਡ ਬੈਂਕ ਦੀ ਇਕ ਰਿਪੋਰਟ ਮੁਤਾਬਕ ਇੰਡੀਆ ਦੂਜੇ ਦੇਸ਼ਾਂ ਦੇ ਮੁਕਾਬਲੇ ਪ੍ਰਵਾਸੀਆਂ ਦੁਆਰਾ ਆਪਣੇ ਮੂਲ ਦੇਸ਼ ਨੂੰ ਭੇਜੇ ਗਏ ਪੈਸੇ ਕਮਾਉਣ ‘ਚ ਸਭ ਤੋਂ ਅੱਗੇ ਹੈ। ਵਿਸ਼ਵ ਬੈਂਕ ਦੀ ਰਿਪੋਰਟ ‘ਚ ਕਿਹਾ ਗਿਆ ਹੈ ਕਿ 2022 ‘ਚ ਇੰਡੀਆ ਦਾ ਰੈਮਿਟੈਂਸ 100 ਅਰਬ ਡਾਲਰ ਤੱਕ ਪਹੁੰਚਣ ਦੀ ਉਮੀਦ ਹੈ। ਪਿਛਲੇ ਸਾਲ ਦੇ ਮੁਕਾਬਲੇ ਇਹ 7.5 ਫੀਸਦੀ ਤੋਂ ਵਧ ਕੇ 12 ਫੀਸਦੀ ਹੋ ਸਕਦਾ ਹੈ। ਰਿਪੋਰਟ ‘ਚ ਕਿਹਾ ਗਿਆ ਹੈ ਕਿ 2021 ‘ਚ 89.4 ਅਰਬ ਡਾਲਰ ਰੈਮਿਟੈਂਸ ਇੰਡੀਆ ਆਇਆ ਸੀ, ਜੋ 2022 ‘ਚ 100 ਅਰਬ ਡਾਲਰ ਤੱਕ ਪਹੁੰਚ ਸਕਦਾ ਹੈ। ਦੂਜੇ ਪਾਸੇ ਇੰਡੀਆ ਤੋਂ ਬਾਅਦ ਮੈਕਸੀਕੋ, ਚੀਨ, ਫਿਲੀਪੀਨਜ਼, ਮਿਸਰ ਅਤੇ ਪਾਕਿਸਤਾਨ ਦੇ ਰੈਮਿਟੈਂਸ ਕਮਾਉਣ ਵਾਲੇ ਚੋਟੀ ਦੇ ਦਸ ਦੇਸ਼ਾਂ ‘ਚ ਰਹਿਣ ਦੀ ਉਮੀਦ ਹੈ। ਇਸ ‘ਚ ਮੈਕਸੀਕੋ ਤੋਂ 60 ਅਰਬ ਡਾਲਰ, ਚੀਨ ਤੋਂ 51 ਅਰਬ ਡਾਲਰ, ਫਿਲੀਪੀਨਜ਼ ਤੋਂ 38 ਅਰਬ ਡਾਲਰ, ਮਿਸਰ ਤੋਂ 32 ਅਰਬ ਡਾਲਰ ਅਤੇ ਪਾਕਿਸਤਾਨ ਤੋਂ 29 ਅਰਬ ਡਾਲਰ ਆਉਣ ਦੀ ਉਮੀਦ ਹੈ। ਵਰਲਡ ਬੈਂਕ ਦੀ ਰਿਪੋਰਟ ‘ਚ ਕਿਹਾ ਗਿਆ ਹੈ ਕਿ ਖੇਤਰੀ ਪੱਧਰ ‘ਤੇ ਇਸ ਸਾਲ ਦੱਖਣੀ ਏਸ਼ੀਆ ‘ਚ ਰੈਮਿਟੈਂਸ ਕਰੀਬ 3.5 ਫੀਸਦੀ ਵਧ ਕੇ 163 ਅਰਬ ਡਾਲਰ ਤੱਕ ਪਹੁੰਚ ਗਿਆ ਹੈ। ਹਾਲਾਂਕਿ ਸਾਰੇ ਦੇਸ਼ਾਂ ‘ਚ ਇਕ ਵੱਡੀ ਅਸਮਾਨਤਾ ਹੈ। ਪ੍ਰਵਾਸੀ ਮਜ਼ਦੂਰਾਂ ਵੱਲੋਂ ਇੰਡੀਆ ਭੇਜੀ ਜਾਣ ਵਾਲੀ ਰਾਸ਼ੀ ‘ਚ 12 ਫੀਸਦੀ ਵਾਧੇ ਦਾ ਅਨੁਮਾਨ ਹੈ, ਜਦੋਂ ਕਿ ਨੇਪਾਲ ਤੋਂ ਭੇਜੀ ਜਾਣ ਵਾਲੀ ਰਕਮ ਸਿਰਫ ਚਾਰ ਫੀਸਦੀ ਵਧ ਰਹੀ ਹੈ। ਇਸ ਤੋਂ ਇਲਾਵਾ ਸ਼੍ਰੀਲੰਕਾ, ਪਾਕਿਸਤਾਨ ਅਤੇ ਬੰਗਲਾਦੇਸ਼ ‘ਚ ਕਰੀਬ 10 ਫੀਸਦੀ ਦੀ ਗਿਰਾਵਟ ਦੀ ਸੰਭਾਵਨਾ ਹੈ।
