ਦੱਖਣੀ ਅਫਰੀਕਾ ਦੇ ਸਾਬਕਾ ਆਈ.ਸੀ.ਸੀ. ਐਲੀਟ ਪੈਨਲ ਅੰਪਾਇਰ ਰੂਡੀ ਕੋਰਟਜ਼ੇਨ ਦੀ ਕੇਪਟਾਊਨ ‘ਚ ਸੜਕ ਹਾਦਸੇ ‘ਚ ਮੌਤ ਹੋ ਗਈ ਹੈ। ਜਦੋਂ ਇਹ ਸੜਕ ਹਾਦਸਾ ਵਾਪਰਿਆ ਉਦੋਂ 73 ਸਾਲਾ ਕੋਰਟਜ਼ੇਨ ਇਕ ਕਾਰ ‘ਚ ਕੇਪਟਾਊਨ ਤੋਂ ਪੂਰਬੀ ਕੇਪ ਸੂਬੇ ‘ਚ ਆਪਣੇ ਘਰ ਜਾ ਰਹੇ ਸਨ। ਕੋਰਟਜ਼ੇਨ ਨੇ 2010 ‘ਚ ਸੰਨਿਆਸ ਲੈਣ ਤੋਂ ਪਹਿਲਾਂ 331 ਮੈਚਾਂ ‘ਚ ਅੰਪਾਇਰਿੰਗ ਕੀਤੀ ਜੋ ਉਸ ਸਮੇਂ ਦਾ ਇਕ ਰਿਕਾਰਡ ਸੀ। ਉਹ 100 ਤੋਂ ਵੱਧ ਮੈਚਾਂ ‘ਚ ਅੰਪਾਇਰਿੰਗ ਕਰਨ ਵਾਲੇ ਤਿੰਨ ਅੰਪਾਇਰਾਂ ਵਿੱਚੋਂ ਇਕ ਹਨ। ਉਨ੍ਹਾਂ ਤੋਂ ਇਲਾਵਾ ਪਾਕਿਸਤਾਨ ਦੇ ਅਲੀਮ ਦਾਰ ਅਤੇ ਵੈਸਟਇੰਡੀਜ਼ ਦੇ ਸਟੀਵ ਬਕਨਰ ਵੀ ਅਜਿਹਾ ਕਰ ਚੁੱਕੇ ਹਨ। ਦਾਰ ਨੇ ਕੋਰਟਜ਼ੇਨ ਦੀ ਮੌਤ ਬਾਰੇ ਕਿਹਾ, ‘ਇਹ ਉਨ੍ਹਾਂ ਦੇ ਪਰਿਵਾਰ, ਦੱਖਣੀ ਅਫਰੀਕਾ ਅਤੇ ਕ੍ਰਿਕਟ ਲਈ ਬਹੁਤ ਵੱਡਾ ਘਾਟਾ ਹੈ। ਮੈਂ ਕਈ ਮੈਚਾਂ ‘ਚ ਉਨ੍ਹਾਂ ਦੇ ਨਾਲ ਖੜ੍ਹਾ ਰਿਹਾ। ਉਹ ਨਾ ਸਿਰਫ ਅੰਪਾਇਰ ਦੇ ਤੌਰ ‘ਤੇ ਬਹੁਤ ਵਧੀਆ ਸਨ ਸਗੋਂ ਇਕ ਸ਼ਾਨਦਾਰ ਸਹਿਯੋਗੀ ਵੀ ਸੀ। ਮੈਦਾਨ ‘ਤੇ ਹਮੇਸ਼ਾ ਬਹੁਤ ਸਹਿਯੋਗੀ ਅਤੇ ਮੈਦਾਨ ਤੋਂ ਬਾਹਰ ਮਦਦ ਲਈ ਹਮੇਸ਼ਾ ਤਿਆਰ ਰਹਿੰਦੇ ਸਨ। ਆਪਣੇ ਚਰਿੱਤਰ ਕਾਰਨ ਖਿਡਾਰੀਆਂ ‘ਚ ਵੀ ਉਨ੍ਹਾਂ ਦਾ ਸਤਿਕਾਰ ਸੀ।’ ਕੋਰਟਜ਼ੇਨ ਦੇ ਹਮਵਤਨ ਅੰਪਾਇਰ ਮਰੈਸ ਇਰਾਸਮਸ ਨੇ ਕਿਹਾ, ‘ਰੂਡੀ ਸਰੀਰਕ ਅਤੇ ਮਾਨਸਿਕ ਤੌਰ ‘ਤੇ ਬਹੁਤ ਮਜ਼ਬੂਤ ਸਨ। ਉਨ੍ਹਾਂ ਨੇ ਦੱਖਣੀ ਅਫ਼ਰੀਕਾ ਦੇ ਅੰਪਾਇਰਾਂ ਲਈ ਵਿਸ਼ਵ ਪੱਧਰ ‘ਤੇ ਪਹੁੰਚਣ ਦਾ ਰਾਹ ਪੱਧਰਾ ਕੀਤਾ। ਸਾਨੂੰ ਸਾਰਿਆਂ ਨੂੰ ਵਿਸ਼ਵਾਸ ਦਿਵਾਇਆ ਕਿ ਇਹ ਸੰਭਵ ਹੈ। ਇਕ ਨੌਜਵਾਨ ਅੰਪਾਇਰ ਵੱਜੋਂ ਮੈਂ ਉਨ੍ਹਾਂ ਤੋਂ ਬਹੁਤ ਕੁਝ ਸਿੱਖਿਆ ਹੈ।’ ਕੋਰਟਜ਼ੇਨ ਦੀ ਪਹਿਲੀ ਅੰਤਰਰਾਸ਼ਟਰੀ ਸੀਰੀਜ਼ 1992-93 ‘ਚ ਇੰਡੀਆ ਦਾ ਦੱਖਣੀ ਅਫਰੀਕਾ ਦਾ ਦੌਰਾ ਸੀ, ਜਿਸ ‘ਚ ਉਨ੍ਹਾਂ ਪਹਿਲੀ ਵਾਰ ਦੂਜੇ ਵਨ-ਡੇ ‘ਚ ਅੰਪਾਇਰਿੰਗ ਕੀਤੀ ਸੀ। ਬਾਅਦ ‘ਚ ਉਹ ਦੁਨੀਆ ਦੇ ਸਭ ਤੋਂ ਵਧੀਆ ਅਤੇ ਸਭ ਤੋਂ ਸਤਿਕਾਰਯੋਗ ਅੰਪਾਇਰਾਂ ਵਿੱਚੋਂ ਇੱਕ ਬਣੇ।
