ਇੰਡੀਆ ਦੇ ਤੇਜ਼ ਗੇਂਦਬਾਜ਼ ਅਰਸ਼ਦੀਪ ਸਿੰਘ ਨੂੰ ਮਾਰਕੋ ਜੇਨਸਨ, ਫਿਨ ਐਲਨ ਅਤੇ ਇਬਰਾਹਿਮ ਜ਼ਾਦਰਾਨ ਨਾਲ ਆਈ.ਸੀ.ਸੀ. ਦੇ ਸਾਲ ਦੇ ਉਭਰਦੇ ਹੋਏ ਕ੍ਰਿਕਟਰ ਦੇ ਪੁਰਸਕਾਰ ਲਈ ਨਾਮਜ਼ਦ ਕੀਤਾ ਗਿਆ ਹੈ। ਆਈ.ਸੀ.ਸੀ. ਨੇ ਦੱਸਿਆ ਕਿ ਇਨ੍ਹਾਂ ਪੁਰਸਕਾਰਾਂ ਲਈ ਵੋਟਿੰਗ ਜਨਵਰੀ ‘ਚ ਸ਼ੁਰੂ ਹੋਵੇਗੀ। ਅਰਸ਼ਦੀਪ ਨੇ 21 ਟੀ-20 ਕੌਮਾਂਤਰੀ ਮੈਚਾਂ ‘ਚ 18.12 ਦੀ ਔਸਤ ਨਾਲ 33 ਵਿਕਟਾਂ ਲਈਆਂ ਹਨ। ਉਹ ਨਵੀਂ ਅਤੇ ਪੁਰਾਣੀ ਦੋਵਾਂ ਗੇਂਦਾਂ ਨਾਲ ਵਿਕਟਾਂ ਹਾਸਲ ਕਰਨ ‘ਚ ਸਫਲ ਰਿਹਾ ਹੈ। ਆਈ.ਪੀ.ਐੱਲ. ‘ਚ ਸ਼ਾਨਦਾਰ ਪ੍ਰਦਰਸ਼ਨ ਤੋਂ ਬਾਅਦ ਉਸ ਨੇ ਇੰਡੀਆ ਲਈ ਵੀ ਚੰਗਾ ਪ੍ਰਦਰਸ਼ਨ ਕੀਤਾ ਹੈ। ਉਸ ਨੂੰ ਇਸ ਪੁਰਸਕਾਰ ਲਈ ਦੱਖਣੀ ਅਫਰੀਕਾ ਦੇ ਖੱਬੇ ਹੱਥ ਦੇ ਤੇਜ਼ ਗੇਂਦਬਾਜ਼ ਜੇਨਸਨ, ਨਿਊਜ਼ੀਲੈਂਡ ਦੇ ਸਲਾਮੀ ਬੱਲੇਬਾਜ਼ ਐਲਨ ਅਤੇ ਅਫਗਾਨਿਸਤਾਨ ਦੇ ਬੱਲੇਬਾਜ਼ ਜ਼ਾਦਰਾਨ ਦੀ ਚੁਣੌਤੀ ਮਿਲੇਗੀ। ਇਸੇ ਤਰ੍ਹਾਂ ਮਹਿਲਾ ਵਰਗ ‘ਚ ਭਾਰਤੀ ਤੇਜ਼ ਗੇਂਦਬਾਜ਼ ਰੇਣੂਕਾ ਸਿੰਘ ਅਤੇ ਬੱਲੇਬਾਜ਼ ਯਸਤਿਕਾ ਭਾਟੀਆ ਤੋਂ ਇਲਾਵਾ ਆਸਟਰੇਲੀਆ ਦੀ ਡਾਰਸੀ ਬਰਾਊਨ ਅਤੇ ਇੰਗਲੈਂਡ ਦੀ ਏਲਿਸ ਕੈਪਸੀ ਨੂੰ ਇਸ ਪੁਰਸਕਾਰ ਲਈ ਨਾਮਜ਼ਦ ਕੀਤਾ ਗਿਆ ਹੈ। ਰੇਣੂਕਾ ਨੇ ਇਸ ਸਾਲ ਸੀਮਤ ਓਵਰਾਂ ਦੇ ਦੋਵੇਂ ਫਾਰਮੈਟਾਂ (ਟੀ-20 ਤੇ ਇਕ ਰੋਜ਼ਾ) ਦੇ 29 ਮੈਚਾਂ ‘ਚ 40 ਵਿਕਟਾਂ ਲਈਆਂ ਹਨ। ਝੂਲਨ ਗੋਸਵਾਮੀ ਦੇ ਸੰਨਿਆਸ ਤੋਂ ਬਾਅਦ ਜ਼ਿਆਦਾਤਰ ਮੌਕਿਆਂ ‘ਤੇ ਉਸ ਨੇ ਤਜਰਬੇਕਾਰ ਤੇਜ਼ ਗੇਂਦਬਾਜ਼ ਦੀ ਕਮੀ ਮਹਿਸੂਸ ਨਹੀਂ ਹੋਣ ਦਿੱਤੀ। ਰੇਣੂਕਾ ਇਕ ਰੋਜ਼ਾ ਮੈਚਾਂ ‘ਚ ਵਧੇਰੇ ਪ੍ਰਭਾਵਸ਼ਾਲੀ ਰਹੀ ਹੈ ਜਿਸ ‘ਚ ਉਸ ਨੇ 14.88 ਦੀ ਔਸਤ ਨਾਲ 18 ਵਿਕਟਾਂ ਲਈਆਂ ਹਨ। ਯਸਤਿਕਾ ਨੇ ਇਕ ਰੋਜ਼ਾ ਮੈਚਾਂ ‘ਚ 25.06 ਦੀ ਔਸਤ ਅਤੇ 73.29 ਦੀ ਸਟ੍ਰਾਈਕ ਰੇਟ ਨਾਲ 376 ਦੌੜਾਂ ਬਣਾਈਆਂ ਹਨ।
