ਦਿੱਲੀ ਕੈਪਿਟਲਸ ਨੇ ਪੰਜਾਬ ਕਿੰਗਜ਼ ਦੀ ਟੀਮ ਨੂੰ ਆਈ.ਪੀ.ਐੱਲ. ‘ਚ ਤਗੜਾ ਝਟਕਾ ਦਿੰਦਿਆਂ ਉਸ ਦੀਆਂ ਪਲੇਆਫ਼ ਦੀਆਂ ਉਮੀਦਾਂ ਨੂੰ ਲਗਭਗ ਤੋੜ ਹੀ ਦਿੱਤਾ ਹੈ। ਪੰਜਾਬ ਲਈ ਕਰੋ ਜਾਂ ਮਰੋ ਮੁਕਾਬਲੇ ‘ਚ ਗੇਂਦਬਾਜ਼ ਕੋਈ ਚੰਗਾ ਪ੍ਰਦਰਸ਼ਨ ਨਹੀਂ ਕਰ ਸਕੇ। ਟੂਰਮਾਮੈਂਟ ਤੋਂ ਪਹਿਲਾਂ ਹੀ ਬਾਹਰ ਹੋ ਚੁੱਕੀ ਦਿੱਲੀ ਕੈਪੀਟਲਸ ਤੋਂ ਮਿਲੀ 15 ਦੌੜਾਂ ਦੀ ਹਾਰ ਤੋਂ ਬਾਅਦ ਹੁਣ ਪੰਜਾਬ ਕਿੰਗਜ਼ ਦਾ ਟੂਰਨਾਮੈਂਟ ਦੇ ਪਲੇਆਫ਼ ‘ਚ ਪਹੁੰਚਣ ਦੀਆਂ ਉਮੀਦਾਂ ਨਾ ਦੇ ਬਰਾਬਰ ਹੀ ਪਹੁੰਚ ਗਈਆਂ ਹਨ। ਬਾਕੀ ਟੀਮਾਂ ਦੇ ਮੁਕਾਬਲਿਆਂ ‘ਚ ਕੋਈ ਵੱਡਾ ਉਲਟਫੇਰ ਹੀ ਪੰਜਾਬ ਨੂੰ ਪਲੇਆਫ਼ ‘ਚ ਪਹੁੰਚਾ ਸਕਦਾ ਹੈ। ਪੰਜਾਬ ਕਿੰਗਜ਼ ਨੇ ਟਾਸ ਜਿੱਤ ਕੇ ਪਹਿਲਾਂ ਗੇਂਦਬਾਜ਼ੀ ਕਰਨ ਦਾ ਫ਼ੈਸਲਾ ਕੀਤਾ ਸੀ। ਟੂਰਨਾਮੈਂਟ ‘ਚ ਖ਼ਰਾਬ ਪ੍ਰਦਰਸ਼ਨ ਕਰਨ ਵਾਲੀ ਦਿੱਲੀ ਕੈਪਟੀਲਸ ਦੀ ਬੱਲੇਬਾਜ਼ੀ ਨੇ ਇਸ ਮੈਚ ‘ਚ ਬੇਹੱਦ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ। ਸਲਾਮੀ ਬੱਲੇਬਾਜ਼ਾਂ ਡੇਵਿਡ ਵਾਰਨਰ ਤੇ ਪ੍ਰਿਥਵੀ ਸ਼ਾਅ ਨੇ ਟੀਮ ਨੂੰ ਜ਼ਬਰਦਸਤ ਸ਼ੁਰੂਆਤ ਦੁਆਈ। ਦੋਵਾਂ ਨੇ ਪਹਿਲੇ 10 ਓਵਰਾਂ ‘ਚ ਬਿਨਾਂ ਕੋਈ ਵਿਕਟ ਗੁਆਏ 94 ਦੌੜਾਂ ਜੋੜ ਲਈਆਂ। ਵਾਰਨਰ ਦੇ 46 ਦੌੜਾਂ ‘ਤੇ ਆਊਟ ਹੋਣ ਤੋਂ ਬਾਅਦ ਰੂਸੋ ਨੇ ਵੀ ਸ਼ਾਅ ਦਾ ਸਾਥ ਦਿੱਤਾ। ਪ੍ਰਿਥਵੀ ਸ਼ਾਅ ਨੇ 54 ਦੌੜਾਂ ‘ਤੇ ਸੈਮ ਕਰਨ ਦੀ ਗੇਂਦ ‘ਤੇ ਆਪਣੀ ਵਿਕਟ ਗੁਆਈ। ਦੂਜੇ ਪਾਸਿਓਂ ਰੂਸੋ ਦੀ ਧਾਕੜ ਬੱਲੇਬਾਜ਼ੀ ਜਾਰੀ ਰਹੀ। ਉਸ ਨੇ ਤੂਫ਼ਾਨੀ ਪਾਰੀ ਖੇਡਦਿਆਂ 37 ਗੇਂਦਾਂ ‘ਚ 82 ਦੌੜਾਂ ਦੀ ਅਜੇਤੂ ਪਾਰੀ ਖੇਡੀ। ਇਸ ‘ਚ 6 ਛਿੱਕੇ ਤੇ 6 ਚੌਕੇ ਵੀ ਸ਼ਾਮਲ ਹਨ। ਸਾਲਟ ਨੇ ਵੀ 2 ਚੌਕਿਆਂ ਤੇ 2 ਛਿੱਕਿਆਂ ਸਦਕਾ 26 ਦੌੜਾਂ ਦੀ ਮਹੱਤਵਪੂਰਨ ਪਾਰੀ ਖੇਡੀ। ਹਰ ਵਿਕਟ ਲਈ 50 ਤੋਂ ਵੱਧ ਦੌੜਾਂ ਦੀ ਸਾਂਝੇਦਾਰੀ ਹੋਈ। ਇਸ ਸ਼ਾਨਦਾਰ ਪ੍ਰਦਰਸ਼ਨ ਸਦਕਾ ਦਿੱਲੀ ਨੇ 20 ਓਵਰਾਂ ‘ਚ 2 ਵਿਕਟਾਂ ਗੁਆ ਕੇ 213 ਦੌੜਾਂ ਬਣਾਈਆਂ। ਕਰੋ ਜਾਂ ਮਰੋ ਮੁਕਾਬਲੇ ‘ਚ ਵੱਡੇ ਟੀਚੇ ਦਾ ਪਿੱਛਾ ਕਰਨ ਉੱਤਰੀ ਪੰਜਾਬ ਕਿੰਗਜ਼ ਨੂੰ ਉਸ ਵੇਲੇ ਵੱਡਾ ਝਟਕਾ ਲੱਗਿਆ ਜਦੋਂ ਚੰਗੀ ਫਾਰਮ ‘ਚ ਚੱਲ ਰਹੇ ਕਪਤਾਨ ਸ਼ਿਖਰ ਧਵਨ ਬਿਨਾਂ ਖਾਤਾ ਖੋਲ੍ਹੇ ਹੀ ਪਵੇਲੀਅਨ ਪਰਤ ਗਏ। ਉਸ ਤੋਂ ਬਾਅਦ ਪ੍ਰਭਸਿਮਰਨ ਸਿੰਘ ਤੇ ਅਥਰਵਾ ਤਾਇੜੇ ਨੇ ਪਾਰੀ ਨੂੰ ਸੰਭਾਲਿਆ ਤੇ 50 ਦੌੜਾਂ ਦੀ ਸਾਂਝੇਦਾਰੀ ਕੀਤੀ। ਤਾਇੜੇ 55 ਦੌੜਾਂ ‘ਤੇ ਫੱਟੜ ਹੋ ਕੇ ਪਵੇਲੀਅਨ ਪਰਤ ਗਏ। ਲਿਅਮ ਲਿਵਿੰਗਸਟਨ ਨੇ ਤੂਫ਼ਾਨੀ ਪਾਰੀ ਖੇਡਦਿਆਂ 48 ਗੇਂਦਾਂ ‘ਚ 9 ਛਿੱਕਿਆਂ ਸਦਕਾ 94 ਦੌੜਾਂ ਜੜੀਆਂ। ਪਰ ਇਹ ਟੀਮ ਨੂੰ ਜਿੱਤ ਤਕ ਪਹੁੰਚਾਉਣ ਲਈ ਕਾਫ਼ੀ ਨਹੀਂ ਸੀ। ਪੰਜਾਬ 20 ਓਵਰਾਂ ‘ਚ 8 ਵਿਕਟਾਂ ਗੁਆ ਕੇ 198 ਦੌੜਾਂ ਹੀ ਬਣਾ ਸਕੀ ਤੇ ਇੰਝ ਰੋਮਾਂਚਕ ਮੁਕਾਬਲੇ ‘ਚ ਉਸ ਦੀ 15 ਦੌੜਾਂ ਨਾਲ ਹਾਰ ਹੋਈ।
