ਇੰਡੀਆ ਦੇ 17 ਸਾਲਾ ਸ਼ਤਰੰਜ ਗ੍ਰੈਂਡ ਮਾਸਟਰ ਲਿਓਨ ਲਿਊਕ ਮੇਂਦੋਸਾ ਨੇ ਬਾਕੂ ਓਪਨ ਦਾ ਖਿਤਾਬ ਆਪਣੇ ਨਾਂ ਕਰ ਲਿਆ ਹੈ। 15 ਦੇਸ਼ਾਂ ਦੇ 122 ਖਿਡਾਰੀਆਂ ਵਿਚਾਲੇ ਹੋਏ ਇਸ ਟੂਰਨਾਮੈਂਟ ‘ਚ ਲਿਊਕ ਨੇ 9 ਰਾਊਂਡਾਂ ‘ਚ ਅਜੇਤੂ ਰਹਿੰਦਿਆਂ 5 ਜਿੱਤਾਂ ਤੇ 4 ਡਰਾਅ ਸਮੇਤ ਕੁਲ 7 ਅੰਕ ਬਣਾਏ ਤੇ 2732 ਦੀ ਰੇਟਿੰਗ ਦਾ ਪ੍ਰਦਰਸ਼ਨ ਕਰਦੇ ਹੋਏ ਬਿਹਤਰ ਟਾਈਬ੍ਰੇਕ ਦੇ ਆਧਾਰ ‘ਤੇ ਪਹਿਲੇ ਸਥਾਨ ‘ਤੇ ਰਿਹਾ। 7 ਅੰਕ ਬਣਾਉਣ ਵਾਲਾ ਸਰਬੀਆ ਦਾ ਇੰਡਜੀਕ ਅਲੈਗਜ਼ੈਂਡਰ ਤੇ ਰੂਸ ਦਾ ਵਲਾਦੀਸਲਾਵ ਕੋਵਾਲੋਵ ਕ੍ਰਮਵਾਰ ਦੂਜੇ ਤੇ ਤੀਜੇ ਸਥਾਨ ‘ਤੇ ਰਹੇ। ਇਸ ਪ੍ਰਦਰਸ਼ਨ ਦੇ ਨਾਲ ਹੀ ਹੁਣ ਲਿਊਕ ਦੀ ਫਿਡੇ ਰੇਟਿੰਗ 2621 ਅੰਕਾਂ ‘ਤੇ ਪਹੁੰਚ ਗਈ ਹੈ। ਇੰਡੀਆ ਦਾ ਐੱਸ.ਪੀ. ਸੇਥੂਰਮਨ 6.5 ਅੰਕ ਬਣਾ ਕੇ ਚੌਥੇ ਸਥਾਨ ‘ਤੇ ਰਿਹਾ ਤੇ 6 ਅੰਕਾਂ ਨਾਲ ਪ੍ਰਣੀਤ ਵੁਪਾਲਾ ਛੇਵੇਂ ਤੇ ਆਦਿੱਤਿਆ ਮਿੱਤਲ 7ਵੇਂ ਸਥਾਨ ‘ਤੇ ਰਿਹਾ। ਸ਼ਤਰੰਜ ਦੀ ਖੇਡ ‘ਚ ਮਹਿਲਾ ਗ੍ਰੈਂਡ ਮਾਸਟਰ ਤੋਂ ਵੀ ਵੱਡਾ ਟਾਈਟਲ ਹੁੰਦਾ ਹੈ ਇੰਟਰਨੈਸ਼ਨਲ ਮਾਸਟਰ ਅਤੇ ਟੂਰਨਾਮੈਂਟ ‘ਚ 5 ਅੰਕ ਬਣਾ ਕੇ ਇੰਡੀਆ ਦੀ ਦਿਵਿਆ ਦੇਸ਼ਮੁਖ ਨੇ ਇੰਟਰਨੈਸ਼ਨਲ ਮਾਸਟਰ ਦਾ ਟਾਈਟਲ ਹਾਸਲ ਕਰ ਲਿਆ ਹੈ ਤੇ ਉਹ ਭਾਰਤੀ ਸ਼ਤਰੰਜ ਦੇ ਇਤਿਹਾਸ ‘ਚ ਇਹ ਕਾਰਨਾਮਾ ਕਰਨ ਵਾਲੀ 12ਵੀਂ ਸ਼ਤਰੰਜ ਖਿਡਾਰਨ ਬਣ ਗਈ ਹੈ।
