ਚੀਨ ‘ਚ ਦੁਨੀਆ ਦੀ ਸਭ ਤੋਂ ਵੱਡੀ ਐਪਲ ਆਈਫੋਨ ਫੈਕਟਰੀ ਦੇ ਕਾਮਿਆਂ ਨੂੰ ਕਰੋਨਾ ਵਾਇਰਸ ਪਾਬੰਦੀਆਂ ਦੇ ਵਿਚਕਾਰ ਇਕਰਾਰਨਾਮੇ ਦੇ ਵਿਵਾਦ ਨੂੰ ਲੈ ਕੇ ਕੁੱਟਿਆ ਗਿਆ ਅਤੇ ਹਿਰਾਸਤ ‘ਚ ਰੱਖਿਆ ਗਿਆ। ਸੋਸ਼ਲ ਮੀਡੀਆ ‘ਤੇ ਪੋਸਟ ਕੀਤੀਆਂ ਗਈਆਂ ਕੁਝ ਵੀਡੀਓਜ਼ ‘ਚ ਇਹ ਦਿਖਾਈ ਦੇ ਰਿਹਾ ਹੈ ਅਤੇ ਚਸ਼ਮਦੀਦ ਗਵਾਹਾਂ ਨੇ ਵੀ ਇਹ ਜਾਣਕਾਰੀ ਦਿੱਤੀ ਹੈ। ਚੀਨੀ ਸੋਸ਼ਲ ਮੀਡੀਆ ‘ਤੇ ਉਪਲਬਧ ਝੋਂਗਜ਼ੂ ਫੈਕਟਰੀ ਦੇ ਵੀਡੀਓਜ਼ ਨੇ ਹਜ਼ਾਰਾਂ ਨਕਾਬਪੋਸ਼ ਪ੍ਰਦਰਸ਼ਨਕਾਰੀਆਂ ਨੂੰ ਚਿੱਟੇ ਸੁਰੱਖਿਆ ਸੂਟ ਪਹਿਨੇ ਪੁਲੀਸ ਕਰਮੀਆਂ ਦਾ ਸਾਹਮਣਾ ਕਰਦੇ ਦਿਖਾਇਆ। ਇਕ ਵਿਅਕਤੀ ਦੇ ਸਿਰ ‘ਤੇ ਡੰਡਾ ਮਾਰਿਆ ਗਿਆ ਅਤੇ ਦੂਜੇ ਨੂੰ ਪਿੱਠ ਪਿੱਛੇ ਹੱਥ ਬੰਨ੍ਹ ਕੇ ਲਿਜਾਇਆ ਗਿਆ। ਸੋਸ਼ਲ ਮੀਡੀਆ ‘ਤੇ ਪੋਸਟ ‘ਚ ਕਿਹਾ ਗਿਆ ਕਿ ਇਹ ਲੋਕ ਇਕਰਾਰਨਾਮੇ ਦੀ ਉਲੰਘਣਾ ਦਾ ਵਿਰੋਧ ਕਰ ਰਹੇ ਸਨ। ਚੀਨ ‘ਚ ਕਰੋਨਾ ਵਾਇਰਸ ਦੇ ਇਨਫੈਕਸ਼ਨ ਕਾਰਨ ਦੁਕਾਨਾਂ ਅਤੇ ਦਫਤਰ ਲੰਬੇ ਸਮੇਂ ਤੱਕ ਬੰਦ ਰਹੇ ਅਤੇ ਲੱਖਾਂ ਲੋਕਾਂ ਨੂੰ ਕਈ ਹਫ਼ਤਿਆਂ ਤੱਕ ਘਰਾਂ ‘ਚ ਬੰਦ ਰਹਿਣਾ ਪਿਆ। ਇਨ੍ਹਾਂ ਪਾਬੰਦੀਆਂ ਤੋਂ ਪ੍ਰੇਸ਼ਾਨ ਹੋ ਕੇ ਲੋਕਾਂ ਨੇ ਕੁਝ ਇਲਾਕਿਆਂ ‘ਚ ਪ੍ਰਦਰਸ਼ਨ ਵੀ ਕੀਤੇ ਹਨ। ਪਿਛਲੇ ਮਹੀਨੇ, ਹਜ਼ਾਰਾਂ ਕਾਮੇ ਕਰੋਨਾ ਵਾਇਰਸ ਵਿਰੁੱਧ ਨਾਕਾਫ਼ੀ ਸੁਰੱਖਿਆ ਦੀਆਂ ਸ਼ਿਕਾਇਤਾਂ ਅਤੇ ਬੀਮਾਰ ਪਏ ਸਹਿ-ਕਰਮਚਾਰੀਆਂ ਲਈ ਕੋਈ ਸਹਾਇਤਾ ਨਾ ਹੋਣ ਦੀਆਂ ਸ਼ਿਕਾਇਤਾਂ ਨੂੰ ਲੈ ਕੇ ਤਾਈਵਾਨ-ਅਧਾਰਤ ਫੌਕਸਕਨ ਟੈਕਨਾਲੋਜੀ ਗਰੁੱਪ ਕੰਪਨੀ ਦੁਆਰਾ ਸੰਚਾਲਿਤ ਇਕ ਫੈਕਟਰੀ ਤੋਂ ਬਾਹਰ ਚਲੇ ਗਏ ਸਨ। ਫੈਕਟਰੀ ਵਰਕਰ ਲੀ ਸਾਂਸ਼ਾਨ ਨੇ ਕਿਹਾ ਕਿ ਉਸਨੇ ਉੱਚ ਮਜ਼ਦੂਰੀ ਦੀ ਪੇਸ਼ਕਸ਼ ਕਾਰਨ ਨੌਕਰੀ ‘ਤੇ ਆਏ ਨਵੇਂ ਕਾਮਿਆਂ ਲਈ ਸ਼ਰਤਾਂ ਬਦਲਣ ਤੋਂ ਬਾਅਦ ਪ੍ਰਦਰਸ਼ਨ ਕੀਤਾ। ਲੀ ਨੇ ਕਿਹਾ ਕਿ ਉਸ ਨੇ ਦੋ ਮਹੀਨਿਆਂ ਦੇ ਕੰਮ ਲਈ 25,000 ਯੂਆਨ ਦਾ ਵਾਅਦਾ ਕਰਨ ਵਾਲੇ ਇਸ਼ਤਿਹਾਰ ਕਾਰਨ ਆਪਣੀ ਨੌਕਰੀ ਛੱਡ ਦਿੱਤੀ ਸੀ। ਉਸ ਨੇ ਕਿਹਾ ਕਿ ਕਰਮਚਾਰੀਆਂ ਨੂੰ ਕਿਹਾ ਗਿਆ ਸੀ ਕਿ ਉਨ੍ਹਾਂ ਨੂੰ 25,000 ਯੁਆਨ ਪ੍ਰਾਪਤ ਕਰਨ ਲਈ ਘੱਟ ਤਨਖਾਹ ਲਈ ਦੋ ਹੋਰ ਮਹੀਨੇ ਕੰਮ ਕਰਨਾ ਪਏਗਾ, ਜਿਸ ਨਾਲ ਉਹ ਗੁੱਸੇ ਸਨ। ਲੀ ਨੇ ਕਿਹਾ ਕਿ ਫੌਕਸਕਨ ਨੇ ਭਰਤੀ ਕਰਨ ਲਈ ਇਕ ਬਹੁਤ ਹੀ ਲੁਭਾਉਣ ਵਾਲੀ ਪੇਸ਼ਕਸ਼ ਕੀਤੀ ਅਤੇ ਸਾਰੇ ਦੇਸ਼ ਭਰ ਤੋਂ ਲੋਕ ਕੰਮ ਕਰਨ ਲਈ ਆਏ, ਪਰ ਉਨ੍ਹਾਂ ਨੂੰ ਪਤਾ ਲੱਗਾ ਕਿ ਉਨ੍ਹਾਂ ਨੂੰ ਮੂਰਖ ਬਣਾਇਆ ਜਾ ਰਿਹਾ ਹੈ। ਫੌਕਸਕਾਨ ਨੇ ਇਕ ਬਿਆਨ ‘ਚ ਕਿਹਾ ਕਿ ਕਾਰਜ ਭੱਤਾ ‘ਹਮੇਸ਼ਾ ਇਕਰਾਰਨਾਮੇ ਦੀ ਜ਼ਿੰਮੇਵਾਰੀ ਦੇ ਆਧਾਰ ‘ਤੇ ਪ੍ਰਦਾਨ ਕੀਤਾ ਗਿਆ।’ ਫੌਕਸਕਾਨ ਨੇ ਇਸ ਗੱਲ ਤੋਂ ਇਨਕਾਰ ਕੀਤਾ ਕਿ ਸੰਕਰਮਿਤ ਵਰਕਰਾਂ ਨੂੰ ਉਚਿਤ ਸਹੂਲਤਾਂ ਨਹੀਂ ਦਿੱਤੀਆਂ ਗਈਆਂ। ਇਸ ਨੇ ਕਿਹਾ ਕਿ ਸਹੂਲਤਾਂ ਨੂੰ ਰੋਗਾਣੂ ਮੁਕਤ ਕਰ ਦਿੱਤਾ ਗਿਆ ਸੀ ਅਤੇ ਸਟਾਫ ਦੇ ਆਉਣ ਤੋਂ ਪਹਿਲਾਂ ਸਰਕਾਰੀ ਜਾਂਚਾਂ ਪਾਸ ਕਰ ਦਿੱਤੀਆਂ ਸਨ। ਬੀਜਿੰਗ ਸਮੇਤ ਚੀਨ ‘ਚ ਸੰਕਰਮਣ ਦੇ ਮਾਮਲਿਆਂ ‘ਚ ਮੁੜ ਉਭਾਰ ਦੇ ਵਿਚਕਾਰ ਪ੍ਰਦਰਸ਼ਨਾਂ ‘ਚ ਵਾਧਾ ਹੋਇਆ ਹੈ। ਅਧਿਕਾਰੀਆਂ ਨੇ ਇਸ ਹਫ਼ਤੇ ਛੇ ਮਹੀਨਿਆਂ ‘ਚ ਸੰਕਰਮਣ ਤੋਂ ਦੇਸ਼ ਦੀ ਪਹਿਲੀ ਮੌਤ ਦੀ ਰਿਪੋਰਟ ਕੀਤੀ। ਸਰਕਾਰ ਨੇ ਦੱਸਿਆ ਕਿ ਪਿਛਲੇ ਤਿੰਨ ਹਫ਼ਤਿਆਂ ‘ਚ ਸੰਕਰਮਣ ਦੇ 2,53,000 ਤੋਂ ਵੱਧ ਮਾਮਲੇ ਪਾਏ ਗਏ ਹਨ ਅਤੇ ਰੋਜ਼ਾਨਾ ਔਸਤ ਵੱਧ ਰਹੀ ਹੈ।
