ਇੰਡੀਆ ਦੇ ਰਾਕੇਸ਼ ਸ਼ਰਮਾ ਨੇ ਸੰਨ 1983 ‘ਚ ਇਤਿਹਾਸ ਰਚਿਆ ਜਦੋਂ ਉਹ ਪੁਲਾੜ ਦੀ ਯਾਤਰਾ ਕਰਨ ਵਾਲੇ ਪਹਿਲੇ ਭਾਰਤੀ ਬਣੇ। ਫਿਰ ਸੰਨ 1997 ‘ਚ ਕਲਪਨਾ ਚਾਵਲਾ ਪੁਲਾੜ ‘ਚ ਜਾਣ ਵਾਲੀ ਪਹਿਲੀ ਭਾਰਤੀ ਔਰਤ ਬਣੀ ਜਿਸ ਦਾ ਨਾਂ ਦੁਨੀਆਂ ਭਰ ‘ਚ ਕਿਸੇ ਤੋਂ ਲੁਕਿਆ ਨਹੀਂ। ਇਸ ਮਗਰੋਂ ਸੰਨ 2006 ‘ਚ ਸੁਨੀਤਾ ਵਿਲੀਅਮਜ਼ ਪੁਲਾੜ ‘ਚ ਯਾਤਰਾ ਕਰਨ ਵਾਲੀ ਦੂਜੀ ਭਾਰਤੀ ਅਮਰੀਕਨ ਬਣ ਗਈ। ਇਨ੍ਹਾਂ ਮਹਾਨ ਪੁਲਾੜ ਯਾਤਰੀਆਂ ਦੇ ਨਕਸ਼ੇ ਕਦਮਾਂ ‘ਤੇ ਚੱਲਦਿਆਂ ਕੇਰਲਾ ਨਾਲ ਸਬੰਧਤ ਤੇ ਕੈਨੇਡਾ ਦੀ ਰਹਿਣ ਵਾਲੀ ਇਕ ਹੋਰ ਭਾਰਤੀ ਪੁਲਾੜ ਮਿਸ਼ਨ ‘ਤੇ ਆਰਬਿਟ ਤੋਂ ਬਾਹਰ ਜਾਣ ਵਾਲੀ ਹੈ। 24 ਸਾਲਾ ਅਥੀਰਾ ਪ੍ਰੀਥਰਾਨੀ ਕੇਰਲ ਦੀ ਰਾਜਧਾਨੀ ਤਿਰੂਵਨੰਤਪੁਰਮ ਦੀ ਮੂਲ ਨਿਵਾਸੀ ਹੈ ਜਿਸ ਨੂੰ ਇਸ ਮੁਹਿੰਮ ਲਈ ਚੁਣਿਆ ਗਿਆ ਹੈ। ਉਹ ਇਕ ਪੁਲਾੜ ਯਾਤਰੀ ਸਿਖਲਾਈ ਪ੍ਰੋਗਰਾਮ ‘ਚ ਸ਼ਾਮਲ ਹੋਵੇਗੀ, ਜੋ ਅੰਤਰਰਾਸ਼ਟਰੀ ਪੁਲਾੜ ਵਿਗਿਆਨ ਸੰਸਥਾ ਦੁਆਰਾ ਪ੍ਰੋਗਰਾਮ ਨਾਸਾ, ਕੈਨੇਡੀਅਨ ਸਪੇਸ ਏਜੰਸੀ ਅਤੇ ਨੈਸ਼ਨਲ ਰਿਸਰਚ ਕੌਂਸਲ ਆਫ਼ ਕੈਨੇਡਾ ਦੁਆਰਾ ਸਾਂਝੇ ਤੌਰ ‘ਤੇ ਆਯੋਜਿਤ ਕੀਤਾ ਜਾਂਦਾ ਹੈ। ਉਹ ਹੁਣ ਜਲਦੀ ਹੀ ਅਮਰੀਕਾ ਦੇ ਫਲੋਰਿਡਾ ‘ਚ ਸਿਖਲਾਈ ਪ੍ਰੋਗਰਾਮ ‘ਚ ਸ਼ਾਮਲ ਹੋਵੇਗੀ। ਉਸ ਦੀ ਸਿਖਲਾਈ ਦੇ ਸਫਲਤਾਪੂਰਵਕ ਮੁਕੰਮਲ ਹੋਣ ‘ਤੇ ਪ੍ਰੀਥਰਾਨੀ, ਕਲਪਨਾ ਚਾਵਲਾ ਅਤੇ ਸੁਨੀਤਾ ਵਿਲੀਅਮਜ਼ ਤੋਂ ਬਾਅਦ ਪੁਲਾੜ ਦੀ ਖੋਜ ਕਰਨ ਵਾਲੀ ਤੀਜੀ ਭਾਰਤੀ ਮੂਲ ਦੀ ਔਰਤ ਹੋਵੇਗੀ। ਵਰਤਮਾਨ ‘ਚ ਉਹ ਕੈਨੇਡਾ ‘ਚ ਇਕ ਲੜਾਕੂ ਪਾਇਲਟ ਵਜੋਂ ਸਿਖਲਾਈ ਲੈ ਰਹੀ ਹੈ। ਹਾਲ ਹੀ ‘ਚ ਉਸਨੇ ਸੋਸ਼ਲ ਮੀਡੀਆ ‘ਤੇ ਇਕ ਨੋਟ ਸਾਂਝਾ ਕੀਤਾ ਜਿਸ ‘ਚ ਲੜਾਕੂ ਜਹਾਜ਼ ਉਡਾਉਣ ਦੀ ਖੁਸ਼ੀ ਜ਼ਾਹਰ ਕੀਤੀ। ਪੁਲਾੜ, ਪੁਲਾੜ ਵਿਗਿਆਨ, ਹਵਾਬਾਜ਼ੀ ਅਤੇ ਹਵਾਈ ਸੈਨਾ ‘ਚ ਉਸ ਦੀ ਬਚਪਨ ਤੋਂ ਹੀ ਦਿਲਚਸਪੀ ਰਹੀ ਹੈ। ਸਪੇਸ ਅਤੇ ਹਵਾਬਾਜ਼ੀ ਨਾਲ ਉਸਦਾ ਅਜਿਹਾ ਜਨੂੰਨ ਸੀ ਕਿ ਉਸਨੇ ਦੋਸਤਾਂ ਨਾਲ ਖੇਡਣ ਜਾਂ ਸਮੂਹ ਗਤੀਵਿਧੀਆਂ ‘ਚ ਹਿੱਸਾ ਲੈਣ ਦੀ ਬਜਾਏ ਸਕੂਲ ਅਤੇ ਕਾਲਜ ‘ਚ ਕਿਤਾਬਾਂ ਦਾ ਅਧਿਐਨ ਕਰਨ ‘ਚ ਲੰਬੇ ਘੰਟੇ ਬਿਤਾਏ। ਐਸਟਰਾ, ਤਿਰੂਵਨੰਤਪੁਰਮ ‘ਚ ਇਕ ਖਗੋਲ-ਵਿਗਿਆਨ ਸਮਾਜ, ਜਿੱਥੇ ਉਹ ਆਪਣੇ ਜੀਵਨ ਸਾਥੀ ਨੂੰ ਮਿਲੀ, ਨੇ ਪੁਲਾੜ ਦੀ ਖੋਜ ਕਰਨ ਦੇ ਉਸਦੇ ਜਨੂੰਨ ਨੂੰ ਹੋਰ ਵਧਾ ਦਿੱਤਾ। ਉਸ ਦੇ ਜਨੂੰਨ ਨੂੰ ਉਦੋਂ ਖੰਭ ਮਿਲੇ ਜਦੋਂ ਉਹ ਰੋਬੋਟਿਕਸ ਦੀ ਪੜ੍ਹਾਈ ਕਰਨ ਲਈ ਕੈਨੇਡਾ ਪੁੱਜੀ। ਕੈਨੇਡਾ ‘ਚ ਉਸਨੂੰ ਪਤਾ ਲੱਗਾ ਕਿ ਕੈਨੇਡਾ ਹਵਾਈ ਸੈਨਾ ‘ਚ ਸ਼ਾਮਲ ਹੋਏ ਬਿਨਾਂ ਪਾਇਲਟ ਵਜੋਂ ਸਿਖਲਾਈ ਲੈਣ ਦੀ ਇਜਾਜ਼ਤ ਦਿੰਦਾ ਹੈ ਤਾਂ ਉਸਨੇ ਰੋਬੋਟਿਕਸ ਕੋਰਸ ਕਰਦੇ ਹੋਏ ਪੈਸੇ ਇਕੱਠੇ ਕਰਨ ਲਈ ਸਾਈਡ ਕਾਰੋਬਾਰ ਕਰਨਾ ਸ਼ੁਰੂ ਕਰ ਦਿੱਤਾ। ਇਸ ਕੰਮ ‘ਚ ਉਸਦੇ ਪਤੀ ਨੇ ਵੀ ਪੂਰਾ ਸਾਥ ਦਿੱਤਾ ਜਿਸ ਸਦਕਾ ਉਹ ਆਪਣਾ ਸੁਪਨਾ ਪੂਰਾ ਕਰਨ ਦੇ ਨੇੜੇ ਪੁੱਜੀ ਹੈ।
