ਬਰਮਿੰਘਮ (ਇੰਗਲੈਂਡ) ਵਿਖੇ ਕਾਮਨਵੈਲਥ ਗੇਮਜ਼ ਦੇ ਕੁਸ਼ਤੀ ਮੁਕਾਬਲਿਆਂ ‘ਚ ਭਾਰਤੀ ਪਹਿਲਵਾਨ ਰਵੀ ਦਹੀਆ, ਵਿਨੇਸ਼ ਫੋਗਾਟ ਤੇ ਨਵੀਨ ਕੁਮਾਰ ਨੇ ਸੋਨ ਤਗ਼ਮੇ ਜਦਕਿ ਪੂਜਾ ਗਹਿਲੋਤ ਨੇ ਕਾਂਸੀ ਦਾ ਤਗ਼ਮਾ ਹਾਸਲ ਕੀਤਾ ਹੈ। ਇਸ ਤਰ੍ਹਾਂ ਕੁਸ਼ਤੀ ‘ਚ ਇੰਡੀਆ ਦੀ ‘ਗੋਲਡਨ ਹੈਟ੍ਰਿਕ’ ਰਹੀ। ਟੋਕੀਓ ਓਲੰਪਿਕਸ ‘ਚ ਚਾਂਦੀ ਦਾ ਤਗ਼ਮਾ ਜੇਤੂ ਰਵੀ ਦਹੀਆ ਨੇ ਫਾਈਨਲ ਮੁਕਾਬਲੇ ‘ਚ ਨਾਇਜੀਰੀਆ ਦੇ ਐਬੀਕੇਵੇਨਿਮੋ ਵੈਲਸਨ ਨੂੰ ਹਰਾਇਆ। ਇਸ ਤੋਂ ਪਹਿਲਾਂ ਉਸ ਨੇ ਨਿਊਜ਼ੀਲੈਂਡ ਦੇ ਸੂਰਜ ਸਿੰਘ ਤੇ ਪਾਕਿਸਤਾਨ ਦੇ ਅਸਲ ਅਲੀ ਨੂੰ ਤਕਨੀਕੀ ਆਧਾਰ ‘ਤੇ ਹਰਾਇਆ। ਨਵੀਨ ਕੁਮਾਰ ਨੇ 74 ਕਿਲੋ ਭਾਰ ਵਰਗ ‘ਚ ਪਾਕਿਸਤਾਨ ਮੁਹੰਮਦ ਸ਼ਰੀਫ਼ ਤਾਹਿਰ ਨੂੰ ਮਾਤ ਦਿੱਤੀ। ਇਸੇ ਤਰ੍ਹਾਂ ਵਿਨੇਸ਼ ਫੋਗਾਟ ਨੇ ਵੀ ਰਾਸ਼ਟਰਮੰਡਲ ਖੇਡਾਂ ‘ਚ ਸੋਨੇ ਦਾ ਤਗ਼ਮਾ ਹਾਸਲ ਕੀਤਾ ਹੈ। ਉਸ ਨੇ ਫਾਈਨਲ ‘ਚ ਸ੍ਰੀਲੰਕਾ ਦੀ ਪਹਿਲਵਾਨ ਚਾਮੋਡੀਆ ਕੇਸ਼ਾਨੀ ਮਦੁਰਾਵਲਾਗੇ ਨੂੰ ਹਰਾਇਆ। ਫਾਈਨਲ ਤੋਂ ਪਹਿਲਾਂ ਉਸ ਨੇ ਵਿਸ਼ਵ ਚੈਂਪੀਅਨਸ਼ਿਪ ‘ਚ ਕਾਂਸੀ ਤਗ਼ਮਾ ਜੇਤੂ ਕੈਨੇਡਾ ਦੀ ਸਾਮੰਥਾ ਲੀ ਸਟੀਵਰਟ ਨੂੰ ਹਰਾਇਆ। ਵਿਨੇਸ਼ ਲਈ ਇਹ ਮੁਕਾਬਲਾ ਮੁਸ਼ਕਲ ਸੀ ਪਰ ਉਸ ਨੇ ਸਿਰਫ਼ 36 ਸਕਿੰਟ ‘ਚ ਇਹ ਮੁਕਾਬਲਾ ਜਿੱਤ ਲਿਆ। ਇਸ ਮਗਰੋਂ ਉਸ ਨੇ ਨਾਇਜੀਰੀਆ ਦੀ ਮਰਸੀ ਬੋਲਾਫੁਨੋਲੁਵਾ ਐਡੇਕੁਰੋਏ ਨੂੰ ਮਾਤ ਦਿੱਤੀ। ਇਸੇ ਤਰ੍ਹਾਂ ਭਾਰਤੀ ਮਹਿਲਾ ਪਹਿਲਵਾਨ ਪੂਜਾ ਗਹਿਲੋਤ ਨੇ ਮਹਿਲਾਵਾਂ ਦੇ 50 ਕਿਲੋਗ੍ਰਾਮ ਭਾਰ ਵਰਗ ‘ਚ ਕਾਂਸੀ ਦਾ ਤਗ਼ਮਾ ਹਾਸਲ ਕੀਤਾ। ਉਸ ਨੇ ਸਕਾਟਲੈਂਡ ਦੀ ਕ੍ਰਿਸਟੈਲੇ ਐੱਲ ਨੂੰ ਮਾਤ ਦਿੱਤੀ। ਇਸ ਤੋਂ ਪਹਿਲਾਂ ਲੰਘੀ ਰਾਤ ਹੋਏ ਮੁਕਾਬਲਿਆਂ ‘ਚ ਦਿਵਿਆ ਕਾਕਰਾਨ ਤੇ ਮੋਹਿਤ ਗਰੇਵਾਲ ਨੇ ਇੰਡੀਆ ਲਈ ਕਾਂਸੀ ਦੇ ਤਗ਼ਮੇ ਜਿੱਤੇ। ਦਿਵਿਆ ਕਾਕਰਾਨ ਨੇ ਮਹਿਲਾਵਾਂ ਦੇ 68 ਕਿਲੋ ਭਾਰ ਵਰਗ ‘ਚ ਕਾਂਸੀ ਦਾ ਤਗ਼ਮੇ ਦੇ ਪਲੇਆਫ ਮੁਕਾਬਲੇ ‘ਚ ਟੌਂਗਾ ਦੀ ਟਾਈਗਰ ਲਿਲੀ ਨੂੰ ਸਿਰਫ਼ 26 ਸਕਿੰਟ ‘ਚ ਹਰਾ ਕੇ ਕਾਂਸੀ ਦਾ ਤਗ਼ਮਾ ਜਿੱਤਿਆ। ਪੁਰਸ਼ਾਂ ਦੇ 125 ਕਿਲੋ ਭਾਰ ਵਰਗ ‘ਚ ਮੋਹਿਤ ਗਰੇਵਾਲ ਨੇ ਜਮਾਇਕਾ ਦੇ ਆਰੋਨ ਜੌਹਨਸਨ ਨੂੰ 6-0 ਨਾਲ ਹਰਾ ਕੇ ਕਾਂਸੀ ਦਾ ਤਗ਼ਮਾ ਆਪਣੇ ਨਾਂ ਕੀਤਾ।
ਇਸੇ ਦੌਰਾਨ ਅਵਿਨਾਸ਼ ਸਾਬਲੇ ਨੇ ਆਪਣਾ ਹੀ ਕੌਮੀ ਰਿਕਾਰਡ ਤੋੜ ਕੇ ਰਾਸ਼ਟਰਮੰਡਲ ਖੇਡਾਂ ‘ਚ ਪੁਰਸ਼ਾਂ ਦੇ 3000 ਮੀਟਰ ਸਟੀਪਲਚੇਜ਼ ਮੁਕਾਬਲੇ ‘ਚ ਚਾਂਦੀ ਦਾ ਤਗ਼ਮਾ ਜਿੱਤਿਆ ਜਦਕਿ ਪ੍ਰਿਯੰਕਾ ਗੋਸਵਾਮੀ ਨੇ 10 ਹਜ਼ਾਰ ਮੀਟਰ ਪੈਦਲ ਚਾਲ ਮੁਕਾਬਲੇ ‘ਚ ਚਾਂਦੀ ਦਾ ਤਗ਼ਮਾ ਹਾਸਲ ਕੀਤਾ। ਭਾਰਤ ਲਈ ਅਥਲੈਟਿਕਸ ‘ਚ ਦਿਨ ਚੰਗਾ ਰਿਹਾ। ਗੋਸਵਾਮੀ ਨੇ ਪੈਦਲ ਚਾਲ ‘ਚ ਚਾਂਦੀ ਦਾ ਤਗ਼ਮਾ ਜਿੱਤਣ ਵਾਲੀ ਪਹਿਲੀ ਭਾਰਤੀ ਮਹਿਲਾ ਬਣ ਕੇ ਨਵਾਂ ਇਤਿਹਾਸ ਰਚਿਆ। ਦੋ ਚਾਂਦੀ ਦੇ ਤਗ਼ਮਿਆਂ ਨਾਲ ਭਾਰਤੀ ਅਥਲੈਟਿਕਸ ਟੀਮ ਦੇ ਚਾਰ ਤਗ਼ਮੇ ਹੋ ਗਏ ਹਨ। ਉੱਚੀ ਛਾਲ ‘ਚ ਤੇਜਸਵਿਨ ਸ਼ੰਕਰ ਤੇ ਲੰਮੀ ਛਾਲ ‘ਚ ਮੁਰਲੀ ਸ੍ਰੀਸ਼ੰਕਰ ਕ੍ਰਮਵਾਰ ਕਾਂਸੀ ਤੇ ਚਾਂਦੀ ਦਾ ਤਗ਼ਮਾ ਜਿੱਤ ਚੁੱਕੇ ਹਨ। ਸਾਬਲੇ ਨੇ 8:11.20 ਮਿੰਟ ਦਾ ਸਮਾਂ ਕੱਢ ਕੇ 8:12.48 ਮਿੰਟ ਦਾ ਆਪਣਾ ਕੌਮੀ ਰਿਕਾਰਡ ਤੋੜ ਦਿੱਤਾ ਹੈ। ਉਹ ਕੀਨੀਆ ਦੇ ਅਬਰਾਹਮ ਕਿਬੀਵੋਟ ਤੋਂ ਸਿਰਫ਼ 0.5 ਸਕਿੰਟ ਨਾਲ ਪੱਛੜ ਗਿਆ। ਕੀਨੀਆ ਦੇ ਹੀ ਐਮੋਮ ਸੈਰੇਮ ਨੇ ਕਾਂਸੀ ਦਾ ਤਗ਼ਮਾ ਜਿੱਤਿਆ। ਅਥਲੈਟਿਕਸ ‘ਚ ਆਉਣ ਤੋਂ ਪਹਿਲਾਂ ਸੈਨਾ ਦੀ ਨੌਕਰੀ ਦੌਰਾਨ ਸਿਆਚਿਨ ‘ਚ ਤਾਇਨਾਤ ਰਹਿ ਚੁੱਕਾ ਸਾਬਲੇ ਡਾਇਮੰਡ ਲੀਗ ‘ਚ ਪੰਜਵੇਂ ਸਥਾਨ ‘ਤੇ ਰਿਹਾ ਸੀ।
