ਕਾਮਨਵੈਲਥ ਗੇਮਜ਼ 2026 ਆਸਟਰੇਲੀਆ ਦੇ ਵਿਕਟੋਰੀਆ ‘ਚ ਹੋਣਗੀਆਂ ਜਿਸ ਦੀ ਖੇਡਾਂ ਦੀ ਸੂਚੀ ‘ਚ ਨਿਸ਼ਾਨੇਬਾਜ਼ੀ ਵਾਪਸ ਆ ਜਾਵੇਗੀ ਪਰ ਕੁਸ਼ਤੀ ਤੇ ਤੀਰਅੰਦਾਜ਼ੀ ਨੂੰ ਬਾਹਰ ਰੱਖਿਆ ਜਾਵੇਗਾ। ਇਸ ਨਾਲ ਇੰਡੀਆ ਨੂੰ ਵੱਡਾ ਝਟਕਾ ਲੱਗਾ ਹੈ। ਕਾਮਨਵੈਲਥ ਗੇਮਜ਼ ਫੈਡਰੇਸ਼ਨ ਅਤੇ ਕਾਮਨਵੈਲਥ ਗੇਮਜ਼ ਆਸਟਰੇਲੀਆ ਨੇ ਵਿਕਟੋਰੀਆ 2026 ਕਾਮਨਵੈਲਥ ਗੇਮਜ਼ ਲਈ ਪੂਰੇ ਖੇਡ ਪ੍ਰੋਗਰਾਮ ਦਾ ਐਲਾਨ ਕੀਤਾ ਹੈ ਜਿਸ ‘ਚ 20 ਖੇਡਾਂ ਅਤੇ 26 ਮੁਕਾਬਲੇ ਸ਼ਾਮਲ ਹਨ। ਇਨ੍ਹਾਂ ‘ਚੋਂ 9 ਸਿਰਫ ਪੈਰਾ ਖੇਡਾਂ ਲਈ ਹਨ। ਇਨ੍ਹਾਂ ਖੇਡਾਂ ‘ਚ ਨਿਸ਼ਾਨੇਬਾਜ਼ੀ ਦੀ ਵਾਪਸੀ ਇੰਡੀਆ ਲਈ ਸਵਾਗਤਯੋਗ ਕਦਮ ਹੈ। ਨਿਸ਼ਾਨੇਬਾਜ਼ੀ ਨੂੰ ਬਰਮਿੰਘਮ ‘ਚ ਹੋਈਆਂ ਪਿਛਲੀਆਂ ਖੇਡਾਂ ਦੀ ਸੂਚੀ ‘ਚੋਂ ਬਾਹਰ ਕਰ ਦਿੱਤਾ ਗਿਆ ਸੀ। ਕਾਮਨਵੈਲਥ ਗੇਮਜ਼ ‘ਚ ਨਿਸ਼ਾਨੇਬਾਜ਼ੀ ‘ਚ ਦਿੰਡੀਆ ਨੇ ਹੁਣ ਤੱਕ 135 ਤਗ਼ਮੇ (63 ਸੋਨ, 44 ਚਾਂਦੀ ਤੇ 28 ਕਾਂਸੇ) ਅਤੇ ਕੁਸ਼ਤੀ ‘ਚ 114 ਤਗ਼ਮੇ (49 ਸੋਨ, 39 ਚਾਂਦੀ ਅਤੇ 26 ਕਾਂਸੇ) ਜਿੱਤੇ ਹਨ। 2026 ਦੀਆਂ ਖੇਡਾਂ ‘ਚ ਪੈਰਾ-ਸ਼ੂਟਿੰਗ ਨੂੰ ਸ਼ਾਮਲ ਕਰਨ ਨਾਲ ਦਿੰਡੀਆ ਨੂੰ ਫਾਇਦਾ ਹੋ ਸਕਦਾ ਹੈ ਪਰ ਕੁਸ਼ਤੀ ਦੇ ਮੁਕਾਬਲੇ ਨਾ ਹੋਣ ਕਾਰਨ ਇੰਡੀਆ ਨੂੰ ਨੁਕਸਾਨ ਹੋਵੇਗਾ। ਇੰਡੀਆ ਨੇ ਬਰਮਿੰਘਮ ਖੇਡਾਂ ‘ਚ ਕੁਸ਼ਤੀ ‘ਚ ਸਭ ਤੋਂ ਵੱਧ 12 ਤਗ਼ਮੇ (ਛੇ ਸੋਨ, ਇੱਕ ਚਾਂਦੀ, ਪੰਜ ਕਾਂਸੇ) ਜਿੱਤੇ ਸਨ। ਇਹ ਖੇਡ 2010 ਤੋਂ ਲਗਾਤਾਰ ਕਾਮਨਵੈਲਥ ਗੇਮਜ਼ ‘ਚ ਸ਼ਾਮਲ ਰਹੀ ਹੈ, ਦੂਜੇ ਪਾਸੇ ਤੀਰਅੰਦਾਜ਼ੀ ਸਿਰਫ ਦੋ ਵਾਰ 1982 ਅਤੇ 2010 ‘ਚ ਹੀ ਇਨ੍ਹਾਂ ਖੇਡਾਂ ਦਾ ਹਿੱਸਾ ਰਹੀ ਹੈ। ਕੁਸ਼ਤੀ ਆਸਟਰੇਲੀਆ ‘ਚ ਬਹੁਤੀ ਮਸ਼ਹੂਰ ਨਹੀਂ ਹੈ ਅਤੇ ਮੇਜ਼ਬਾਨ ਦੇਸ਼ ਆਮ ਤੌਰ ‘ਤੇ ਉਨ੍ਹਾਂ ਖੇਡਾਂ ਦੀ ਚੋਣ ਕਰਦਾ ਹੈ, ਜਿਨ੍ਹਾਂ ‘ਚ ਘਰੇਲੂ ਅਥਲੀਟ ਚੰਗਾ ਪ੍ਰਦਰਸ਼ਨ ਕਰਦੇ ਹੋਣ। ਨਿਸ਼ਾਨੇਬਾਜ਼ੀ ਆਸਟਰੇਲੀਆ ‘ਚ ਮਸ਼ਹੂਰ ਖੇਡ ਹੈ।
