ਰੀਓ ਓਪਨ ਟੈਨਿਸ ਟੂਰਨਾਮੈਂਟ ਦੇ ਫਾਈਨਲ ‘ਚ ਕਾਰਲੋਸ ਅਲਕਰਾਜ ਖ਼ਿਲਾਫ਼ ਇਕ ਸੈੱਟ ਤੇ 0-3 ਨਾਲ ਪੱਛੜਨ ਤੋਂ ਬਾਅਦ ਸ਼ਾਨਦਾਰ ਵਾਪਸੀ ਕਰਦੇ ਹੋਏ ਕੈਮਰਨ ਨੋਰੀ ਨੇ ਸਾਲ ਦਾ ਪਹਿਲਾ ਖ਼ਿਤਾਬ ਜਿੱਤਿਆ। ਨੋਰੀ ਨੇ ਇਸ ਨਾਲ ਹੀ ਇਕ ਹਫ਼ਤੇ ਪਹਿਲਾਂ ਫਾਈਨਲ ‘ਚ ਸਪੇਨ ਦੇ ਅਲਕਰਾਜ ਖ਼ਿਲਾਫ਼ ਮਿਲੀ ਹਾਰ ਦਾ ਬਦਲਾ ਵੀ ਲੈ ਲਿਆ। ਦੂਜਾ ਦਰਜਾ ਹਾਸਲ ਨੋਰੀ ਨੇ ਅਲਕਰਾਜ ਨੂੰ 5-7, 6-4, 7-5 ਨਾਲ ਹਰਾ ਕੇ ਆਪਣੇ ਕਰੀਅਰ ਦਾ ਪੰਜਵਾਂ ਖ਼ਿਤਾਬ ਜਿੱਤਿਆ। ਨੋਰੀ ਨੂੰ ਇਸ ਤੋਂ ਪਹਿਲਾਂ ਜਨਵਰੀ ‘ਚ ਆਕਲੈਂਡ ‘ਚ ਫਾਈਨਲ ‘ਚ ਰਿਚਰਡ ਗਾਸਕੇਟ ਤੇ ਪਿਛਲੇ ਹਫ਼ਤੇ ਅਰਜਨਟੀਨਾ ਓਪਨ ਚੈਂਪੀਅਨਸ਼ਿਪ ਦੇ ਫਾਈਨਲ ‘ਚ ਅਲਕਰਾਜ ਖ਼ਿਲਾਫ਼ ਹਾਰ ਦਾ ਸਾਹਮਣਾ ਕਰਨਾ ਪਿਆ ਸੀ। ਫਾਈਨਲ ‘ਚ ਹਾਰ ਦੇ ਨਾਲ ਅਲਕਰਾਜ ਨੇ ਏ.ਟੀ.ਪੀ. ਰੈਂਕਿੰਗ ਦੇ ਸਿਖਰ ‘ਤੇ ਨੋਵਾਕ ਜੋਕੋਵਿਕ ਦੇ ਬਰਾਬਰ ਅੰਕ ਹਾਸਲ ਕਰਨ ਦਾ ਮੌਕਾ ਵੀ ਗੁਆ ਦਿੱਤਾ।
