ਪੁਲੀਸ ਦੇ ਨਾਰਕੋਟਿਕ ਸੈੱਲ ਨੇ ਕੋਰੀਅਰ ਰਾਹੀਂ ਲੁਧਿਆਣਾ ਤੋਂ ਕੈਨੇਡਾ ਭੇਜੀ ਜਾ ਰਹੀ ਢਾਈ ਕਿੱਲੋ ਅਫੀਮ ਫੜੀ ਹੈ। ਸਮੱਗਲਰ ਡਰੱਗ ਭੇਜਣ ਲਈ ਨਵੇਂ ਨਵੇਂ ਤਰੀਕੇ ਅਪਣਾਉਂਦੇ ਰਹਿੰਦੇ ਹਨ ਅਤੇ ਹੁਣ ਨਵਾਂ ਤਰੀਕਾ ਅਪਣਾਉਂਦੇ ਹੋਏ ਜੈਕੇਟਾਂ ਅੰਦਰ ਸਿਲਾਈ ਕਰ ਕੇ ਅਫੀਮ ਦੀ ਖੇਪ ਕੈਨੇਡਾ ਭੇਜਣ ਲਈ ਕੋਰੀਅਰ ਕੀਤੀ ਸੀ ਪਰ ਫੜੀ ਗਈ। ਇਸ ਤੋਂ ਪਹਿਲਾਂ ਕਿ ਇਨ੍ਹਾਂ ਜੈਕੇਟਾਂ ਅਤੇ ਇਨ੍ਹਾਂ ਅੰਦਰ ਸਿਲਾਈ ਕਰ ਕੇ ਲੁਕਾਈ ਗਈ ਅਫੀਮ ਕੈਨੇਡਾ ਪਹੁੰਚਦੀ ਇਨ੍ਹਾਂ ਨੂੰ ਨਾਰਕੋਟਿਕ ਵਿਭਾਗ ਵੱਲੋਂ ਲੱਭ ਕੇ ਕਬਜ਼ੇ ‘ਚ ਲੈ ਲਿਆ ਗਿਆ। ਨਾਰਕੋਟਿਕ ਵਿਭਾਗ ਵਲੋਂ ਇਸ ਸਬੰਧ ‘ਚ ਤਿੰਨ ਵੱਖ-ਵੱਖ ਕੇਸ ਦਰਜ ਕੀਤੇ ਹਨ। ਮੁਲਜ਼ਮਾਂ ਨੇ ਇਸ ਵਾਰ ਡਰੱਗ ਤਸਕਰੀ ਲਈ ਲੁਧਿਆਣਾ ਤੋਂ ਕੈਨੇਡਾ ਭੇਜੀਆਂ ਜਾਣ ਵਾਲੀਆਂ ਜੈਕੇਟਾਂ ਦਾ ਪ੍ਰਯੋਗ ਕੀਤਾ। ਬੇਹੱਦ ਚਲਾਕ ਤਰੀਕੇ ਨਾਲ ਜੈਕੇਟਾਂ ਅੰਦਰ ਅਫੀਮ ਦੀ ਖੇਪ ਨੂੰ ਲੁਕਾ ਦਿੱਤਾ ਗਿਆ। ਇਸ ਤੋਂ ਬਾਅਦ ਅਫੀਮ ਉਪਰ ਕਾਰਬਨ ਦੇ ਟੁਕੜੇ ਨੂੰ ਸਿਉਂ ਦਿੱਤਾ ਗਿਆ ਜਿਸ ਨਾਲ ਸਕੈਨਰ ‘ਚ ਚੈਕਿੰਗ ਦੌਰਾਨ ਅਫੀਮ ਦਾ ਪਤਾ ਨਾ ਲੱਗੇ ਸਕੇ। ਇਸ ਨਵੇਂ ਤਰੀਕੇ ਦਾ ਖ਼ਖੁਲਾਸਾ ਕਰਦੇ ਹੋਏ ਨਾਰਕੋਟਿਕ ਵਿਭਾਗ ਨੇ ਪਿਛਲੇ ਹਫਤੇ ਲੁਧਿਆਣਾ ਤੋਂ ਅਜਿਹੀਆਂ ਤਿੰਨ ਵੱਖ-ਵੱਖ ਜੈਕੇਟਾਂ ਨੂੰ ਫੜਿਆ ਹੈ। ਨਾਰਕੋਟਿਕ ਵਿਭਾਗ ਵੱਲੋਂ ਤਿੰਨੇ ਕੇਸਾਂ ‘ਚ ਮੁਲਜ਼ਮਾਂ ਖ਼ਿਲਾਫ਼ ਅਪਰਾਧਿਕ ਧਾਰਾਵਾਂ ਤਹਿਤ ਕੇਸ ਦਰਜ ਕੀਤੇ ਗਏ ਹਨ। ਦੱਸਿਆ ਗਿਆ ਕਿ ਇਹ ਜੈਕੇਟਾਂ ਲੁਧਿਆਣਾ ਤੋਂ ਕੋਰੀਅਰ ਦੇ ਜ਼ਰੀਏ ਕੈਨੇਡਾ ਭੇਜੀਆਂ ਜਾ ਰਹੀਆਂ ਸਨ। ਇਥੋਂ ਇਨ੍ਹਾਂ ਨੂੰ ਕੋਰੀਅਰ ਭੇਜਣ ਵਾਲੀਆਂ ਤਿੰਨੇ ਪਾਰਟੀਆਂ ਵੀ ਵੱਖ-ਵੱਖ ਸਨ, ਜਦਕਿ ਕੈਨੇਡਾ ‘ਚ ਵੀ ਇਨ੍ਹਾਂ ਨੂੰ ਵੱਖ-ਵੱਖ ਤਿੰਨ ਪਤਿਆਂ ‘ਤੇ ਭੇਜਿਆ ਜਾ ਰਿਹਾ ਸੀ। ਮੁਲਜ਼ਮਾਂ ਨੇ ਅਫੀਮ ਨੂੰ ਵਿਦੇਸ਼ ‘ਚ ਸਪਲਾਈ ਕਰਨ ਦਾ ਇਹ ਨਵਾਂ ਤਰੀਕਾ ਲੱਭਿਆ ਹੈ। ਨਾਰਕੋਟਿਕ ਵਿਭਾਗ ਨੇ ਇਸ ਮਾਮਲੇ ‘ਚ ਦੋ ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਜਾਂਚ ਦੌਰਾਨ ਨਾਰਕੋਟਿਕ ਦੀ ਟੀਮ ਨੂੰ ਇਕ ਜੈਕੇਟ ‘ਚੋਂ 2 ਕਿੱਲੋ, ਦੂਜੀ ਜੈਕੇਟ ‘ਚੋਂ ਅੱਧਾ ਕਿੱਲੋ ਤਾਂ ਤੀਜੀ ਜੈਕੇਟ ‘ਚੋਂ 80 ਗਰਾਮ ਅਫੀਮ ਦੀ ਖੇਪ ਬਰਾਮਦ ਹੋਈ। ਨਾਰਕੋਟਿਕ ਵਿਭਾਗ ਦੇ ਜ਼ੋਨਲ ਡਾਇਰੈਕਟਰ ਅਮਨਜੀਤ ਸਿੰਘ ਨੇ ਦੱਸਿਆ ਕਿ ਅੰਤਰਾਸ਼ਟਰੀ ਪੱਧਰ ‘ਤੇ ਅਫੀਮ ਸਮੱਗਲਿੰਗ ਦੇ 3 ਮਾਮਲਿਆਂ ਦਾ ਖੁਲਾਸਾ ਹੋਇਆ ਹੈ।
