ਬ੍ਰਿਟੇਨ ਦੀ ਰਾਜਧਾਨੀ ਲੰਡਨ ‘ਚ ਸਥਿਤ ਭਾਰਤੀ ਹਾਈ ਕਮਿਸ਼ਨ ਨੇ ਇੰਡੀਆ ਦੇ ਵਿਦਿਆਰਥੀਆਂ ਨੂੰ ਮਦਦ ਅਤੇ ਸਲਾਹ ਲਈ ਉਸ ਨਾਲ ਸੰਪਰਕ ਕਰਨ ਦੀ ਅਪੀਲ ਕੀਤੀ ਹੈ। ਭਾਰਤੀ ਵਿਦਿਆਰਥੀਆਂ ਨੂੰ ਭਾਰਤੀ ਹਾਈ ਕਮਿਸ਼ਨ ਦੀ ਅਪੀਲ ਇਸ ਡਰ ਦੇ ਵਿਚਕਾਰ ਆਈ ਹੈ ਕਿ ਹੋ ਸਕਦਾ ਹੈ ਕਿ ਉਨ੍ਹਾਂ ਵਿੱਚੋਂ 50 ਤੋਂ ਵੱਧ ਨੌਰਥ ਵੇਲਜ਼ ‘ਚ ਭਾਰਤੀ ਮੂਲ ਦੇ 5 ਵਿਅਕਤੀਆਂ ਵੱਲੋਂ ਚਲਾਏ ਜਾ ਰਹੇ ਦੇਖ਼ਭਾਲ ਕੇਂਦਰਾਂ ‘ਚ ਕੰਮ ਕਰਦੇ ਹੋਏ ਆਧੁਨਿਕ ਗੁਲਾਮੀ ‘ਚ ਫਸ ਗਏ ਹੋਣ। ਯੂ.ਕੇ. ਸਰਕਾਰ ਦੀ ਇਕ ਖੁਫੀਆ ਅਤੇ ਮਜ਼ਦੂਰ ਦੁਰਵਿਵਹਾਰ ਜਾਂਚ ਏਜੰਸੀ ‘ਗੈਂਗਮਾਸਟਰਸ ਐਂਡ ਲੇਬਰ ਅਬਿਊਜ਼ ਅਥਾਰਟੀ’ ਨੇ ਇਸ ਹਫ਼ਤੇ ਦੇ ਸ਼ੁਰੂ ‘ਚ ਰਿਪੋਰਟ ਦਿੱਤੀ ਸੀ ਕਿ ਉਹ 5 ਵਿਅਕਤੀਆਂ ਦੇ ਖ਼ਿਲਾਫ਼ ਮਜ਼ਦੂਰੀ ਦੁਰਵਿਵਹਾਰ ਲਈ ਅਦਾਲਤੀ ਆਦੇਸ਼ ਪ੍ਰਾਪਤ ਕਰਨ ‘ਚ ਸਫ਼ਲ ਹੋ ਗਈ ਹੈ। ਜੀ.ਐੱਲ.ਏ.ਏ. ਨੇ ਕਿਹਾ ਕਿ ਉਸ ਨੇ ਮਾਮਲੇ ਦੇ ਸਬੰਧ ਵਿੱਚ ‘ਪਿਛਲੇ 14 ਮਹੀਨਿਆਂ ‘ਚ 50 ਤੋਂ ਵੱਧ ਭਾਰਤੀ ਵਿਦਿਆਰਥੀਆਂ ਨੂੰ ਆਧੁਨਿਕ ਗੁਲਾਮੀ ਅਤੇ ਮਜ਼ਦੂਰਾਂ ਦੇ ਸ਼ੋਸ਼ਣ ਦੇ ਸੰਭਾਵਿਤ ਸ਼ਿਕਾਰ ਵਜੋਂ ਪਛਾਣਿਆ ਹੈ।’ ਹਾਈ ਕਮਿਸ਼ਨ ਨੇ ਟਵੀਟ ਕੀਤਾ, ‘ਅਸੀਂ ਇਸ ਸਬੰਧ ‘ਚ ਖ਼ਬਰਾਂ ਤੋਂ ਚਿੰਤਤ ਹਾਂ। ਜਿਨ੍ਹਾਂ ਭਾਰਤੀ ਵਿਦਿਆਰਥੀ ਨੇ ਇਸ ਦਾ ਸਾਹਮਣਾ ਕੀਤਾ ਹੈ, ਕਿਰਪਾ ਕਰਕੇ ਸਾਡੇ ਨਾਲ ਸੰਪਰਕ ਕਰਨ ਅਤੇ ਅਸੀਂ ਸਹਾਇਤਾ/ਕਾਊਂਸਲਿੰਗ ਪ੍ਰਦਾਨ ਕਰਾਂਗੇ। ਅਸੀਂ ਤੁਹਾਨੂੰ ਤੁਹਾਡੇ ਜਵਾਬ ‘ਚ ਗੁਪਤਤਾ ਦਾ ਭਰੋਸਾ ਦਿਵਾਉਂਦੇ ਹਾਂ।’ 5 ਵਿਅਕਤੀਆਂ – ਮੈਥਿਊ ਇਸਾਕ (32), ਜੀਨੂ ਚੈਰਿਅਨ (30), ਐਲਡਹੋਜ ਚੈਰਿਅਨ (25), ਐਲਡਹੋਜ ਕੁਰਿਆਚਨ (25) ਅਤੇ ਜੈਕਬ ਲੀਜੂ (47) ‘ਤੇ ਨੌਰਧ ਵੇਲਜ਼ ‘ਚ ਦੇਖ਼ਭਾਲ ਕੇਂਦਰਾਂ ‘ਚ ਕੰਮ ਕਰਨ ਵਾਲੇ ਭਾਰਤੀ ਵਿਦਿਆਰਥੀਆਂ ਨੂੰ ਭਰਤੀ ਕਰਨ ਅਤੇ ਉਨ੍ਹਾਂ ਦਾ ਸ਼ੋਸ਼ਣ ਕਰਨ ਦਾ ਸ਼ੱਕ ਹੈ। ਮੂਲ ਰੂਪ ‘ਚ ਕੇਰਲਾ ਦੇ ਰਹਿਣ ਵਾਲੇ ਇਨ੍ਹਾਂ ਪੰਜ ਵਿਅਕਤੀਆਂ ਨੂੰ ਦਸੰਬਰ 2021 ਅਤੇ ਮਈ 2022 ਦੇ ਵਿਚਕਾਰ ਗ੍ਰਿਫ਼ਤਾਰ ਕੀਤਾ ਗਿਆ ਸੀ ਅਤੇ ਉਦੋਂ ਤੋਂ ਜਾਂਚ ਜਾਰੀ ਹੈ।
