ਆਈ.ਪੀ.ਐੱਲ. ਦੇ ਇਕ ਹੋਰ ਮੈਚ ‘ਚ ਕੋਲਕਾਤਾ ਨੇ ਚੇਨਈ ਨੂੰ 6 ਵਿਕਟਾਂ ਨਾਲ ਹਰਾ ਦਿੱਤਾ। ਸੁਨੀਲ ਨਾਰਾਇਣ (15 ਦੌੜਾਂ ‘ਤੇ 2 ਵਿਕਟਾਂ) ਦੀ ਅਗਵਾਈ ‘ਚ ਗੇਂਦਬਾਜ਼ਾਂ ਦੇ ਸ਼ਾਨਦਾਰ ਪ੍ਰਦਰਸ਼ਨ ਤੋਂ ਬਾਅਦ ਕਪਤਾਨ ਨਿਤਿਸ਼ ਰਾਣਾ (ਅਜੇਤੂ 57) ਤੇ ਰਿੰਕੂ ਸਿੰਘ (54) ਵਿਚਾਲੇ 76 ਗੇਂਦਾਂ ‘ਚ 99 ਦੌੜਾਂ ਦੀ ਸਾਂਝੇਦਾਰੀ ਦੇ ਦਮ ‘ਤੇ ਕੋਲਕਾਤਾ ਨਾਈਟ ਰਾਈਡਰਜ਼ ਨੇ ਇਹ ਜਿੱਤ ਦਰਜ ਕੀਤੀ। ਚੇਨਈ ਨੂੰ 6 ਵਿਕਟਾਂ ‘ਤੇ 144 ਦੌੜਾਂ ‘ਤੇ ਰੋਕਣ ਤੋਂ ਬਾਅਦ ਕੋਲਕਾਤਾ ਨੇ 18.3 ਓਵਰਾਂ ‘ਚ 4 ਵਿਕਟਾਂ ‘ਤੇ ਟੀਚਾ ਹਾਸਲ ਕਰ ਲਿਆ। ਕੇ.ਕੇ.ਆਰ. ਦੀ 13 ਮੈਚਾਂ ‘ਚੋਂ ਇਹ 6ਵੀਂ ਜਿੱਤ ਹੈ ਤੇ ਟੀਮ 12 ਅੰਕਾਂ ਨਾਲ ਅਗਰ-ਮਗਰ ਦੇ ਪਲੇਅ ਆਫ ਦੀ ਦੌੜ ‘ਚ ਬਰਕਰਾਰ ਹੈ। ਚੇਨਈ ਕੋਲ ਇਸ ਮੈਚ ਨੂੰ ਜਿੱਤ ਕੇ ਪਲੇਅ ਆਫ ‘ਚ ਜਗ੍ਹਾ ਪੱਕੀ ਕਰਨ ਦਾ ਮੌਕਾ ਸੀ ਪਰ ਉਸ ਨੂੰ ਹੁਣ ਇੰਤਜ਼ਾਰ ਕਰਨਾ ਪਵੇਗਾ। ਟੀਚੇ ਦਾ ਪਿੱਛਾ ਕਰਦਿਆਂ ਚੇਨਈ ਨੇ ਪਾਵਰਪਲੇਅ ‘ਚ 3 ਵਿਕਟਾਂ ਲੈ ਕੇ ਚੰਗੀ ਸ਼ੁਰੂਆਤ ਕੀਤੀ ਸੀ ਪਰ ਰਿੰਕੂ ਤੇ ਨਿਤਿਸ਼ ਨੇ ਇਸ ਮੈਦਾਨ ‘ਤੇ ਚੌਥੀ ਵਿਕਟ ਲਈ ਰਿਕਾਰਡ ਸਾਂਝੇਦਾਰੀ ਕਰਕੇ ਟੀਮ ਦੀ ਜਿੱਤ ਤੈਅ ਕਰ ਦਿੱਤੀ। ਨਿਤਿਸ਼ ਨੂੰ 11ਵੇਂ ਓਵਰ ‘ਚ ਮੋਇਨ ਅਲੀ ਦੀ ਗੇਂਦ ‘ਤੇ ਮਥੀਸ਼ਾ ਪਥਿਰਾਨਾ ਨੇ ਕੈਚ ਛੱਡ ਕੇ ਜੀਵਨਦਾਨ ਦਿੱਤਾ। ਉਸ ਸਮੇਂ ਉਹ 18 ਦੌੜਾਂ ‘ਤੇ ਬੱਲੇਬਾਜ਼ੀ ਕਰ ਰਿਹਾ ਸੀ। ਉਸ ਨੇ 44 ਗੇਂਦਾਂ ਦੀ ਅਜੇਤੂ ਪਾਰੀ ‘ਚ 6 ਚੌਕੇ ਤੇ 1 ਛੱਕਾ ਲਾਇਆ। ਮੈਨ ਆਫ ਦਿ ਮੈਚ ਰਿੰਕੂ ਨੇ 43 ਗੇਂਦਾਂ ਦੀ ਪਾਰੀ ‘ਚ 4 ਚੌਕੇ ਤੇ 3 ਛੱਕੇ ਲਾਏ। ਚੇਨਈ ਲਈ ਦੀਪਕ ਚਾਹਰ ਨੇ 3 ਓਵਰਾਂ ‘ਚ 27 ਦੌੜਾਂ ਦੇ ਕੇ 3 ਵਿਕਟਾਂ ਲਈਆਂ। ਉਹ ਇਸ ਦੌਰਾਨ ਆਈ.ਪੀ.ਐੱਲ. ਦੇ ਪਾਵਰ ਪਲੇਅ ‘ਚ 50 ਵਿਕਟਾਂ ਲੈਣ ਵਾਲਾ ਪਹਿਲਾ ਗੇਂਦਬਾਜ਼ ਬਣਿਆ।
