ਲੁਧਿਆਣਾ ‘ਚ ਹਿੰਦੂ ਜਥੇਬੰਦੀਆਂ ਉਸ ਵੇਲੇ ਭਿੜ ਗਈਆਂ ਜਦੋਂ ਗਣਪਤੀ ਵਿਸਰਜਣ ‘ਤੇ ਇਤਰਾਜ਼ਯੋਗ ਗੀਤ ਗਾਉਣ ਵਾਲੇ ਜੀ ਖਾਨ ਮੁਆਫ਼ੀ ਮੰਗਣ ਪਹੁੰਚੇ ਸਨ। ਹਿੰਦੂ ਸੰਗਠਨਾਂ ‘ਚ ਰੋਸ ਪਾਏ ਜਾਣ ਕਰਕੇ ਜੀ ਖਾਨ ਆਪਣੀ ਗਲਤੀ ਦੀ ਮੁਆਫ਼ੀ ਮੰਗਣ ਲਈ ਸੰਗਲਾਂਵਾਲਾ ਸ਼ਿਵਾਲਾ ਮੰਦਰ ਆਇਆ ਸੀ ਜਿਥੇ ਸਿੰਗਰ ਦੀ ਮੁਆਫ਼ੀ ‘ਤੇ ਹੰਗਾਮਾ ਹੋ ਗਿਆ। ਮੁਆਫ਼ੀ ਨੂੰ ਲੈ ਕੇ ਹਿੰਦੂ ਜਥੇਬੰਦੀਆਂ ਆਹਮੋ-ਸਾਹਮਣੇ ਹੋ ਗਈਆਂ ਅਤੇ ਮੰਦਰ ਨੂੰ ਜੰਗ ਦਾ ਮੈਦਾਨ ਬਣਾ ਦਿੱਤਾ। ਇਕ-ਦੂਜੇ ਨਾਲ ਹੱਥੋਪਾਈ ਤੋਂ ਬਾਅਦ ਨੌਬਤ ਇੱਟਾਂ ਪੱਥਰ ਮਾਰਨ ‘ਤੇ ਪਹੁੰਚ ਗਈ। ਇਸ ਦੌਰਾਨ ਕਈ ਹਿੰਦੂ ਨੇਤਾਵਾਂ ਦੇ ਸੱਟਾਂ ਵੀ ਲੱਗੀਆਂ। ਸੂਚਨਾ ਤੋਂ ਬਾਅਦ ਪੁਲੀਸ ਅਧਿਕਾਰੀ ਅਤੇ ਥਾਣਾ ਪੁਲੀਸ ਮੌਕੇ ‘ਤੇ ਪੁੱਜ ਗਈ। ਕਿਸੇ ਤਰ੍ਹਾਂ ਉਨ੍ਹਾਂ ਨੇ ਮਾਮਲਾ ਸ਼ਾਂਤ ਕਰਵਾਇਆ। ਦੋਵੇਂ ਧਿਰਾਂ ਨੇ ਪੁਲੀਸ ਨੂੰ ਸ਼ਿਕਾਇਤ ਦਿੱਤੀ ਹੈ। ਦਰਅਸਲ ਪੰਜਾਬੀ ਗਾਇਕ ਜੀ ਖਾਨ ਐਤਵਾਰ ਸ਼ਾਮ ਨੂੰ ਸੰਗਲਾਂਵਾਲਾ ਸ਼ਿਵਾਲਾ ਮੰਦਰ ‘ਚ ਮੁਆਫ਼ੀ ਮੰਗਣ ਲਈ ਪੁੱਜਾ ਸੀ। ਇਸ ਦੌਰਾਨ ਸ਼ਿਵ ਸੈਨਾ ਪੰਜਾਬ ਦੇ ਰਾਜੀਵ ਟੰਡਨ ਤੇ ਉਸ ਦੇ ਮੈਂਬਰ ਅੰਦਰ ਬੈਠੇ ਹੋਏ ਸਨ, ਜਿਨ੍ਹਾਂ ਨੇ ਆਪਸੀ ਸਹਿਮਤੀ ਨਾਲ ਜੀ ਖਾਨ ਨੂੰ ਮੁਆਫ਼ ਕਰ ਦਿੱਤਾ ਸੀ। ਇਸ ਦੌਰਾਨ ਦੂਜੇ ਹਿੰਦੂ ਸੰਗਠਨ ਦੇ ਲੋਕ ਪੁੱਜ ਗਏ, ਜਿਨ੍ਹਾਂ ਨੇ ਮੰਦਰ ਦੇ ਅੰਦਰ ਹੀ ਜੀ ਖਾਨ ਖ਼ਿਲਾਫ਼ ਨਾਅਰੇਬਾਜ਼ੀ ਸ਼ੁਰੂ ਕਰ ਦਿੱਤੀ। ਨਾਅਰੇਬਾਜ਼ੀ ਹੋਣ ਦੀ ਵਜ੍ਹਾ ਜਾਣਨ ਲਈ ਜਿਵੇਂ ਹੀ ਸ਼ਿਵ ਸੈਨਾ ਪੰਜਾਬ ਦੇ ਮੈਂਬਰ ਉਨ੍ਹਾਂ ਵਿਅਕਤੀਆਂ ਕੋਲ ਗਏ ਤਾਂ ਉਨ੍ਹਾਂ ਦੀ ਆਪਸੀ ਬਹਿਸ ਹੋਣ ਤੋਂ ਬਾਅਦ ਝੜਪ ਹੋ ਗਈ। ਦੇਖਦੇ ਹੀ ਦੇਖਦੇ ਮੰਦਰ ਦਾ ਮਾਹੌਲ ਖਰਾਬ ਹੋਣ ਲੱਗ ਪਿਆ ਤੇ ਮੱਥਾ ਟੇਕਣ ਆਏ ਸ਼ਰਧਾਲੂ ਇਧਰ-ਉਧਰ ਭੱਜਣ ਲੱਗੇ। ਹਿੰਦੂ ਨੇਤਾਵਾਂ ‘ਚ ਆਪਸੀ ਝੜਪ ਦੇਖ ਕੇ ਇਲਾਕੇ ‘ਚ ਦਹਿਸ਼ਤ ਦਾ ਮਾਹੌਲ ਬਣ ਗਿਆ। ਦੋਵੇਂ ਹਿੰਦੂ ਸੰਗਠਨਾਂ ਦੇ ਮੈਂਬਰਾਂ ‘ਚ ਜੰਮ ਕੇ ਹੱਥੋਪਾਈ ਹੋਈ ਅਤੇ ਉਨ੍ਹਾਂ ਇੱਟਾਂ-ਰੋੜੇ ਇਕ-ਦੂਜੇ ‘ਤੇ ਵਰ੍ਹਾਏ।
