ਅਮਰੀਕਾ ਦੇ ਵਿਸਕਾਨਸਿਨ ‘ਚ 2012 ‘ਚ ਗੁਰਦੁਆਰੇ ‘ਤੇ ਹੋਏ ਹਮਲੇ ਦੀ 11ਵੀਂ ਬਰਸੀ ਮੌਕੇ ਇਕ ਸਿੱਖ 2700 ਮੀਲ ਦੀ ਮੋਟਰਸਾਈਕਲ ਰਾਈਡ ਕਰ ਰਿਹਾ ਹੈ ਜਿਸ ਦਾ ਉਦੇਸ਼ ਨਸਲੀ ਹਮਲੇ ਖ਼ਿਲਾਫ਼ ਸੁਨੇਹਾ ਦੇਣਾ ਹੈ। ਇਸ ਓਕ ਕਰੀਕ ਗੁਰਦੁਆਰੇ ਹਮਲੇ ‘ਚ ਭਾਈਚਾਰੇ ਦੇ ਸੱਤ ਲੋਕਾਂ ਦੀ ਮੌਤ ਹੋ ਗਈ ਸੀ। ਇਹ 37 ਸਾਲਾ ਗੁਰਦੀਪ ਸਿੰਘ ਸੱਗੂ ਨਾਂ ਦਾ ਸਿੱਖ ਨੌਜਵਾਨ ਮੋਟਰਸਾਈਕਲ ਕਲੱਬ ਯੂ.ਐਸ.ਏ. ਦੇ ਨਾਲ ਆਪਣੇ ਸੱਭਿਆਚਾਰ ਅਤੇ ਵਿਸ਼ਵਾਸ ਬਾਰੇ ਜਾਗਰੂਕਤਾ ਪੈਦਾ ਕਰਨ ਲਈ ਓਕ ਕਰੀਕ ਗੁਰਦੁਆਰੇ ਦੀ ਇਕ ਹਫ਼ਤੇ ਦੀ ਯਾਤਰਾ ਦੀ ਯੋਜਨਾ ਬਣਾਈ ਹੈ। ਇਹ ਰਾਈਡ ਜੋ 5 ਅਗਸਤ ਨੂੰ ਓਕ ਕਰੀਕ ‘ਚ ਸਮਾਪਤ ਹੋਵੇਗੀ, ਐਰੀਜ਼ੋਨਾ ਵਰਗੇ ਰਾਜਾਂ ਵਿੱਚੋਂ ਦੀ ਲੰਘੇਗੀ, ਜਿੱਥੇ ਇਕ ਸਿੱਖ ਵਿਅਕਤੀ ਨੂੰ ਮੁਸਲਮਾਨ ਸਮਝ ਕੇ 9/11 ਤੋਂ ਚਾਰ ਦਿਨ ਬਾਅਦ ਇਕ ਨਫ਼ਰਤੀ ਅਪਰਾਧ ‘ਚ ਮਾਰਿਆ ਗਿਆ ਸੀ। ਇਸ ਤੋਂ ਪਹਿਲਾਂ ਗੁਰਦੀਪ ਸਿੰਘ ਸੱਗੂ, ਜੋ ਕਿ ਇਕ ਸ਼ਿਪਿੰਗ ਕੰਪਨੀ ‘ਚ ਸੁਪਰਵਾਈਜ਼ਰ ਹੈ, ਆਪਣੇ ਪਰਿਵਾਰ ਨੂੰ ਇਸ ਡਰ ਕਾਰਨ ਛੱਡਣ ਤੋਂ ਝਿਜਕ ਰਿਹਾ ਸੀ ਕਿ ਉਨ੍ਹਾਂ ‘ਤੇ ਧਰਮ ਲਈ ਹਮਲਾ ਕੀਤਾ ਜਾ ਸਕਦਾ ਹੈ। ਲਾਸ ਏਂਜਲਸ ਟਾਈਮਜ਼ ਦੀ ਰਿਪੋਰਟ ਅਨੁਸਾਰ ਉਸਦਾ ਪਿਛਲੇ ਸਮੇਂ ‘ਚ ਇਕ ਸਹਿ-ਕਰਮਚਾਰੀ ਨਾਲ ਸਾਹਮਣਾ ਹੋਇਆ ਸੀ, ਜਿਸਨੇ ਉਸਦੀ ਦਾੜ੍ਹੀ ਅਤੇ ਪੱਗ ਕਾਰਨ ਉਸ ”ਤੇ ਇਕ ਅੱਤਵਾਦੀ ਸਮੂਹ ਨਾਲ ਸਬੰਧਤ ਹੋਣ ਦਾ ਦੋਸ਼ ਲਗਾਇਆ ਸੀ। ਉਸ ਦਾ 10 ਸਾਲਾ ਪੁੱਤਰ ਅਕਾਲਦੀਪ, ਜੋ ਕਿ ਉਸ ਦੀ ਪੱਗ ਕਾਰਨ ਸਕੂਲ ‘ਚ ਧੱਕੇਸ਼ਾਹੀ ਦਾ ਸ਼ਿਕਾਰ ਹੋਇਆ ਸੀ ਅਤੇ ਹਰ ਰੋਜ਼ ਰੋਂਦਾ ਹੋਇਆ ਘਰ ਆਉਂਦਾ ਸੀ, ਉਸ ਨੂੰ ਘਰ ਰਹਿਣ ਲਈ ਬੇਨਤੀ ਕਰਦਾ ਸੀ। ਪਰ ਜਦੋਂ ਅਕਾਲਦੀਪ ਨੇ ਸਟਾਕਟਨ ਸਿੱਖ ਗੁਰਦੁਆਰਾ ਪ੍ਰਾਰਥਨਾ ਹਾਲ ‘ਚ ਇਕ ਐਫ.ਬੀ.ਆਈ. ਏਜੰਟ ਨੂੰ ਸੁਣਿਆ ਕਿ ਕਿਵੇਂ ਇਕ ਗੋਰਾ ਵਿਅਕਤੀ ਸਿੱਖ ਗੁਰਦੁਆਰਾ ਸਾਹਿਬ ‘ਚ ਬੇਕਸੂਰ ਲੋਕਾਂ ਨੂੰ ਗੋਲੀ ਮਾਰ ਰਿਹਾ ਸੀ ਤਾਂ ਉਸਨੇ ਆਪਣੇ ਪਿਤਾ ਨੂੰ ਗਲੇ ਲਗਾ ਲਿਆ ਅਤੇ ਕਿਹਾ ਕਿ ‘ਡੈਡੀ, ਹੁਣ ਮੈਂ ਚਾਹੁੰਦਾ ਹਾਂ ਕਿ ਤੁਸੀਂ ਜਾਓ।’ ਲਾਸ ਏਂਜਲਸ ਟਾਈਮਜ਼ ਦੀ ਰਿਪੋਰਟ ਅਨੁਸਾਰ ਪ੍ਰਾਰਥਨਾ ਹਾਲ ‘ਚ ਆਪਣੇ ਬੇਟੇ ਨੂੰ ਜੱਫੀ ਪਾ ਕੇ ਸੱਗੂ ਨੇ ਫਿਰ ਆਪਣੇ ਆਪ ਨੂੰ ਕਿਹਾ: ‘ਮੈਨੂੰ ਇਹ ਕਰਨਾ ਪਏਗਾ।’ ਜ਼ਿਕਰਯੋਗ ਹੈ ਕਿ 5 ਅਗਸਤ 2012 ਨੂੰ ਓਕ ਕ੍ਰਰੀਕ ਦੇ ਸਿੱਖ ਭਾਈਚਾਰੇ ‘ਤੇ ਹਮਲਾ ਹੋਇਆ ਸੀ ਅਤੇ ਹਮਲਵਰ ਨੇ ਖ਼ੁਦ ਨੂੰ ਗੋਲੀ ਮਾਰਨ ਤੋਂ ਪਹਿਲਾਂ 6 ਸ਼ਰਧਾਲੂਆਂ ਨੂੰ ਗੋਲੀ ਮਾਰ ਦਿੱਤੀ। ਇਕ ਸੱਤਵਾਂ ਵਿਅਕਤੀ ਜੋ ਬੁਰੀ ਤਰ੍ਹਾਂ ਅਧਰੰਗ ਨਾਲ ਪੀੜਤ ਸੀ ਜਿਸ ਦੀ 2020 ‘ਚ ਸੱਟਾਂ ਕਾਰਨ ਉਸ ਦੀ ਮੌਤ ਹੋ ਗਈ। ਰਿਪੋਰਟ ‘ਚ ਕਿਹਾ ਗਿਆ ਕਿ ਕੈਲੀਫੋਰਨੀਆ ‘ਚ 100,000 ਤੋਂ ਵੱਧ ਅਤੇ ਦੇਸ਼ ਭਰ ‘ਚ 500,000 ਤੋਂ ਵੱਧ ਪੰਜਾਬੀ ਰਹਿੰਦੇ ਹਨ। ਸਿੱਖ ਲੰਬੇ ਸਮੇਂ ਤੋਂ ਅਮਰੀਕਾ ‘ਚ ਨਫ਼ਰਤ ਅਤੇ ਨਸਲੀ ਅਪਰਾਧਾਂ ਦਾ ਸ਼ਿਕਾਰ ਰਹੇ ਹਨ ਅਤੇ 11 ਸਤੰਬਰ ਦੇ ਹਮਲਿਆਂ ਤੋਂ ਬਾਅਦ ਹਾਲਾਤ ਹੋਰ ਵਿਗੜ ਗਏ।
