ਸੁਕੇਸ਼ ਚੰਦਰਸ਼ੇਖਰ ਨਾਲ ਜੁੜੇ ਜਬਰੀ ਵਸੂਲੀ ਮਾਮਲੇ ‘ਚ ਬੁੱਧਵਾਰ ਨੂੰ ਬੌਲੀਵੁੱਡ ਅਦਾਕਾਰਾ ਜੈਕਲਿਨ ਫਰਨਾਂਡੇਜ਼ ਦਿੱਲੀ ਪੁਲੀਸ ਦੀ ਆਰਥਿਕ ਅਪਰਾਧ ਸ਼ਾਖਾ ਸਾਹਮਣੇ ਪੇਸ਼ ਹੋਈ। ਅਧਿਕਾਰੀਆਂ ਨੇ ਦੱਸਿਆ ਕਿ ਸ੍ਰੀਲੰਕਾ ਦੀ ਨਾਗਰਿਕ ਫਰਨਾਂਡੇਜ਼ ਤੀਜਾ ਸੰਮਨ ਜਾਰੀ ਹੋਣ ਬਾਅਦ ਜਾਂਚ ‘ਚ ਸ਼ਾਮਲ ਹੋਈ ਹੈ। ਪੁਲੀਸ ਦੇ ਇਕ ਸੀਨੀਅਰ ਅਧਿਕਾਰੀ ਨੇ ਦੱਸਿਆ ਕਿ ਅਦਾਕਾਰਾ ਦੇ ਨਾਲ ਪਿੰਕੀ ਇਰਾਨੀ ਵੀ ਸੀ। ਇਰਾਨੀ ਨੇ ਹੀ ਫਰਨਾਂਡੇਜ਼ ਦੀ ਚੰਦਰਸ਼ੇਖਰ ਨਾਲ ਕਥਿਤ ਜਾਣ-ਪਛਾਣ ਕਰਵਾਈ ਸੀ। ਅਦਾਕਾਰਾ ਨੂੰ ਸੋਮਵਾਰ ਨੂੰ ਜਾਂਚ ‘ਚ ਸ਼ਾਮਲ ਹੋਣ ਲਈ ਕਿਹਾ ਗਿਆ ਸੀ ਪਰ ਉਸ ਨੇ ਰੁਝੇਵਿਆਂ ਦਾ ਹਵਾਲਾ ਦਿੰਦਿਆ ਕੋਈ ਹੋਰ ਤਰੀਕ ਦੇਣ ਦੀ ਬੇਨਤੀ ਕੀਤੀ ਸੀ। ਇਸ ਮਹੀਨੇ ਦੇ ਸ਼ੁਰੂ ‘ਚ ਬੌਲੀਵੁੱਡ ਦੀ ਇਕ ਹੋਰ ਅਦਾਕਾਰਾ ਨੋਰਾ ਫਤੇਹੀ ਤੋਂ ਵੀ ਈ.ਡੀ. ਨੇ ਇਸੇ ਮਾਮਲੇ ‘ਚ ਛੇ ਘੰਟਿਆਂ ਦੇ ਕਰੀਬ ਪੁੱਛਗਿਛ ਕੀਤੀ ਸੀ। ਈ.ਡੀ. ਮੁਤਾਬਕ ਫਤੇਹੀ ਅਤੇ ਫਰਨਾਂਡੇਜ਼ ਨੇ ਚੰਦਰਸ਼ੇਖਰ ਤੋਂ ਮਹਿੰਗੀਆਂ ਕਾਰਾਂ ਤੇ ਹੋਰ ਤੋਹਫ਼ੇ ਲਏ ਸਨ। ਈ.ਡੀ. ਹੁਣ ਇਸੇ ਸਬੰਧੀ ਜਾਂਚ ਕਰ ਰਹੀ ਹੈ। ਜੈਕਲਿਨ ਤੋਂ ਹੋਈ ਪੁੱਛਗਿੱਛ ਦੇ ਹੋਰ ਵੇਰਵੇ ਹਾਲੇ ਨਹੀਂ ਮਿਲੇ।
