ਇੰਡੀਆ ਦੀ ਉੱਤਰ ਪ੍ਰਦੇਸ਼ ਦੇ ਮੇਰਠ ਨਾਲ ਸਬੰਧਤ ਜੈਵਲਿਨ ਥ੍ਰੋਅਰ ਅਨੁ ਰਾਣੀ ਨੇ ਆਪਣੀ ਆਖਰੀ ਕੋਸ਼ਿਸ਼ ’ਚ 59.60 ਮੀਟਰ ਜੈਵਲਿਨ ਥਰੋਅ ਕਰਕੇ ਵਿਸ਼ਵ ਅਥਲੈਟਿਕਸ ਚੈਂਪੀਅਨਸ਼ਿਪ ਦੇ ਫਾਈਨਲ ਲਈ ਕੁਆਲੀਫਾਈ ਕਰ ਲਿਆ। ਅਨੁ ’ਤੇ ਸ਼ੁਰੂ ਤੋਂ ਹੀ ਬਾਹਰ ਹੋਣ ਦਾ ਖ਼ਤਰਾ ਸੀ ਕਿਉਂਕਿ ਉਸ ਦੀ ਪਹਿਲੀ ਕੋਸ਼ਿਸ਼ ‘ਫਾਊਲ’ ਹੋ ਗਈ ਸੀ ਜਦੋਂਕਿ ਦੂਜੀ ਕੋਸ਼ਿਸ਼ ’ਚ ਉਹ 55.35 ਮੀਟਰ ਤੱਕ ਹੀ ਜੈਵਲਿਨ ਸੁੱਟ ਸਕੀ ਸੀ। ਅੰਤ ’ਚ ਉਹ 59.60 ਮੀਟਰ ਜੈਵਲਿਨ ਸੁੱਟਣ ’ਚ ਕਾਮਯਾਬ ਰਹੀ ਜੋ ਫਾਈਨਲ ’ਚ ਜਗ੍ਹਾ ਬਣਾਉਣ ਲਈ ਕਾਫ਼ੀ ਸੀ। ਉਹ ਗਰੁੱਪ ਬੀ ਦੇ ਕੁਆਲੀਫਿਕੇਸ਼ਨ ਰਾਊਂਡ ’ਚ ਪੰਜਵੇਂ ਸਥਾਨ ’ਤੇ ਰਹੀ ਅਤੇ ਦੋਵਾਂ ਗਰੁੱਪਾਂ ’ਚ ਅੱਠਵੇਂ ਸਥਾਨ ਦੀ ਆਪਣੀ ਸਰਵੋਤਮ ਕੋਸ਼ਿਸ਼ ਦੇ ਆਧਾਰ ’ਤੇ ਫਾਈਨਲ ’ਚ ਪਹੁੰਚ ਗਈ। 29 ਸਾਲਾ ਰਾਸ਼ਟਰੀ ਰਿਕਾਰਡ ਧਾਰਕ 60 ਮੀਟਰ ਤੱਕ ਨਹੀਂ ਪਹੁੰਚ ਸਕੀ ਪਰ ਸ਼ਨੀਵਾਰ ਦੇ ਫਾਈਨਲ ’ਚ ਉਸ ਕੋਲ ਆਪਣੇ ਪ੍ਰਦਰਸ਼ਨ ਨੂੰ ਸੁਧਾਰਨ ਦਾ ਮੌਕਾ ਹੋਵੇਗਾ। ਸੀਜ਼ਨ ਦਾ ਉਸ ਦਾ ਨਿੱਜੀ ਸਰਵੋਤਮ ਪ੍ਰਦਰਸ਼ਨ 63.82 ਮੀਟਰ ਹੈ। ਦੋ ਵਰਗਾਂ ’ਚ 62.50 ਮੀਟਰ ਜਾਂ 12 ਦੇ ਸਰਵੋਤਮ ਪ੍ਰਦਰਸ਼ਨ ਕਰਨ ਵਾਲਿਆਂ ਨੇ ਫਾਈਨਲ ’ਚ ਥਾਂ ਬਣਾਈ। ਸਿਰਫ਼ ਤਿੰਨ ਪ੍ਰਤੀਯੋਗੀ ਹੀ 62.50 ਮੀਟਰ ਦੇ ਆਟੋਮੈਟਿਕ ਕੁਆਲੀਫਾਇੰਗ ਮਾਰਕ ਨੂੰ ਪ੍ਰਾਪਤ ਕਰ ਸਕੇ। ਵਿਸ਼ਵ ਚੈਂਪੀਅਨਸ਼ਿਪ ’ਚ ਤੀਜੀ ਵਾਰ ਹਿੱਸਾ ਲੈ ਰਹੀ ਅਨੁ ਨੇ ਲਗਾਤਾਰ ਦੂਜੀ ਵਾਰ ਇਸ ਮੁਕਾਬਲੇ ਦੇ ਫਾਈਨਲ ਲਈ ਕੁਆਲੀਫਾਈ ਕੀਤਾ ਹੈ। ਉਹ 2019 ’ਚ ਦੋਹਾ ’ਚ ਹੋਈ ਪਿਛਲੀ ਵਿਸ਼ਵ ਚੈਂਪੀਅਨਸ਼ਿਪ ਵਿੱਚ 61.12 ਮੀਟਰ ਦੇ ਸਰਬੋਤਮ ਥਰੋਅ ਨਾਲ ਫਾਈਨਲ ’ਚ ਅੱਠਵੇਂ ਸਥਾਨ ’ਤੇ ਰਹੀ ਸੀ। ਇਸ ਦੌਰਾਨ ਔਰਤਾਂ ਦੀ 5000 ਮੀਟਰ ਵਿੱਚ ਪਾਰੁਲ ਚੌਧਰੀ ਹੀਟ ਨੰਬਰ ਦੋ ਵਿੱਚ 15:54.03 ਸਕਿੰਟ ਨਾਲ 17ਵੇਂ ਅਤੇ ਕੁੱਲ ਮਿਲਾ ਕੇ 31ਵੇਂ ਸਥਾਨ ’ਤੇ ਰਹਿ ਕੇ ਸੈਮੀਫਾਈਨਲ ’ਚ ਥਾਂ ਬਣਾਉਣ ਵਿੱਚ ਅਸਫ਼ਲ ਰਹੀ।
