ਵਰਲਡ ਦੀ ਨੰਬਰ ਇਕ ਟੈਨਿਸ ਖਿਡਾਰਨ ਇਗਾ ਸਵੀਆਟੇਕ ਉਸ ਰੈਕੇਟ ਦੀ ਨਿਲਾਮੀ ਕਰਨ ਜਾ ਰਹੀ ਹੈ ਜਿਸ ਨਾਲ ਉਸ ਨੇ ਰੋਲਾਂ ਗੈਰੋ ਅਤੇ ਯੂ.ਐੱਸ. ਓਪਨ 2022 ਜਿੱਤਿਆ ਸੀ। ਪੋਲੈਂਡ ਦੀ 21 ਸਾਲਾ ਖਿਡਾਰਨ ਨੇ ਇਸ ਗੱਲ ਦਾ ਐਲਾਨ ਸੋਸ਼ਲ ਮੀਡੀਆ ‘ਤੇ ਕਰਦੇ ਹੋਏ ਕਿਹਾ ਕਿ ਮੈਂ ਨਿਲਾਮੀ ‘ਚ ਇਕ ਰੈਕੇਟ ਦਾਨ ਕਰ ਰਹੀ ਹਾਂ ਜਿਸ ‘ਤੇ ਮੇਰੇ ਦਸਤਖਤ ਹਨ। ਇਸ ਸਾਲ ਮੈਂ ਇਸ ਰੈਕੇਟ ਨਾਲ ਖੇਡਦੇ ਹੋਏ ਰੋਲਾਂ ਗੈਰੋ ਅਤੇ ਯੂ.ਐੱਸ. ਓਪਨ ਦੇ ਰੂਪ ‘ਚ ਦੋ ਗ੍ਰੈਂਡ ਸਲੈਮ ਜਿੱਤੇ। ਜ਼ਿਕਰਯੋਗ ਹੈ ਕਿ ਸਵੀਆਟੇਕ ‘ਦਿ ਗ੍ਰੇਟ ਆਰਕੈਸਟਰਾ ਆਫ਼ ਕ੍ਰਿਸਮਸ ਚੈਰਿਟੀ’ ਨਾਂ ਦੀ ਸੰਸਥਾ ਨਾਲ ਮਿਲ ਕੇ ਕੰਮ ਕਰ ਰਹੀ ਹੈ, ਜੋ ਪੋਲੈਂਡ ‘ਚ ਬਾਲ ਰੋਗਾਂ ਅਤੇ ਬਜ਼ੁਰਗਾਂ ਦੀ ਦੇਖਭਾਲ ਲਈ ਪੈਸਾ ਇਕੱਠਾ ਕਰਦੀ ਹੈ। ਸਵੀਆਟੇਕ ਦੇ ਰੈਕੇਟ ਦੀ ਨਿਲਾਮੀ ਤੋਂ ਹੋਣ ਵਾਲੀ ਕਮਾਈ ਸੇਪਸਿਸ ਨਾਂ ਦੀ ਬੀਮਾਰੀ ਦੇ ਇਲਾਜ ਲਈ ਵਰਤੀ ਜਾਵੇਗੀ। ਸਵੀਆਟੇਕ ਨੇ ਕਿਹਾ ਕਿ ਮੈਨੂੰ ਉਮੀਦ ਹੈ ਕਿ ਤੁਸੀਂ ਇਸ ਸਾਲ ਨਿਲਾਮੀ ਦਾ ਆਨੰਦ ਮਾਣੋਗੇ। ਸਾਡਾ ਸਾਂਝਾ ਉਦੇਸ਼ ਮਹੱਤਵਪੂਰਨ ਹੈ। ਕ੍ਰਿਸਮਸ ਚੈਰਿਟੀ ਦਾ ਮਹਾਨ ਆਰਕੈਸਟਰਾ ਪੋਲੈਂਡ ਦੇ ਹਸਪਤਾਲਾਂ ‘ਚ ਸੇਪਸਿਸ ਨਾਲ ਲੜਨ ਲਈ ਪੈਸਾ ਇਕੱਠਾ ਕਰ ਰਿਹਾ ਹੈ। ਸਵੀਆਟੇਕ ਨੇ ਇਸ ਤੋਂ ਪਹਿਲਾਂ ਰੂਸੀ ਹਮਲੇ ਤੋਂ ਪ੍ਰਭਾਵਿਤ ਯੂਕਰੇਨ ਦੇ ਲੋਕਾਂ ਲਈ ਫੰਡ ਇਕੱਠਾ ਕਰਨ ਲਈ ਹੋਰ ਟੈਨਿਸ ਖਿਡਾਰੀਆਂ ਦੇ ਨਾਲ ਮਿਲ ਕੇ 23 ਜੁਲਾਈ ਨੂੰ ਕ੍ਰੇਕੋ ‘ਚ ਇਕ ਵਿਸ਼ੇਸ਼ ਸਮਾਗਮ ‘ਚ ਹਿੱਸਾ ਲਿਆ ਸੀ। ਨੀਲੇ ਅਤੇ ਪੀਲੇ ਰਿਬਨ ਵਾਲੀ ਟੋਪੀ ਪਹਿਨ ਕੇ ਸਵੀਆਟੇਕ ਨੇ ਯੂਕਰੇਨ ਲਈ ਆਪਣੇ ਸਮਰਥਨ ਦੀ ਆਵਾਜ਼ ਉਠਾਈ ਸੀ। ਸਵੀਆਟੇਕ ਨੇ 2022 ‘ਚ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ ਦੋ ਗ੍ਰੈਂਡ ਸਲੈਮ ਸਮੇਤ 8 ਖਿਤਾਬ ਜਿੱਤੇ। ਇਸੇ ਸਾਲ ਉਸਨੇ ਲਗਾਤਾਰ 37 ਮੈਚ ਜਿੱਤਣ ਦਾ ਰਿਕਾਰਡ ਕਾਇਮ ਕਰਦੇ ਹੋਏ ਮਹਿਲਾ ਟੈਨਿਸ ਰੈਂਕਿੰਗ ‘ਚ ਵੀ ਸਿਖਰਲਾ ਸਥਾਨ ਹਾਸਲ ਕੀਤਾ।
