ਕੁਸਲ ਮੇਂਡਿਸ ਦੀਆਂ 79 ਦੌੜਾਂ ਦੀ ਮਦਦ ਨਾਲ ਏਸ਼ੀਆ ਚੈਂਪੀਅਨ ਸ੍ਰੀਲੰਕਾ ਨੇ ਨੀਦਰਲੈਂਡ ਨੂੰ 16 ਦੌੜਾਂ ਨਾਲ ਹਰਾ ਕੇ ਟੀ-20 ਵਰਲਡ ਕੱਪ ਦੇ ਸੁਪਰ 12 ਦੌਰ ‘ਚ ਪ੍ਰਵੇਸ਼ ਕਰ ਲਿਆ। ਮੇਂਡਿਸ ਨੇ ਪਹਿਲੇ ਮੈਚ ‘ਚ ਨਾਮੀਬੀਆ ਤੋਂ ਹਾਰੀ ਸ੍ਰੀਲੰਕਾ ਟੀਮ ਲਈ 44 ਗੇਂਦਾਂ ‘ਚ 79 ਦੌੜਾਂ ਦੀ ਪਾਰੀ ਖੇਡੀ ਜਿਸ ਦੀ ਮਦਦ ਨਾਲ ਉਸ ਦੀ ਟੀਮ ਨੇ ਪਹਿਲਾਂ ਬੱਲੇਬਾਜ਼ੀ ਕਰਦੇ ਹੋਏ ਛੇ ਵਿਕਟਾਂ ‘ਤੇ 162 ਦੌੜਾਂ ਬਣਾਈਆਂ। ਇਸ ਦੇ ਜਵਾਬ ‘ਚ ਗਰੁੱਪ ਏ ‘ਚ ਨਾਮੀਬੀਆ ਅਤੇ ਯੂ.ਏ.ਈ. ਨੂੰ ਹਰਾ ਕੇ ਸਿਖਰ ‘ਤੇ ਰਹੀ ਨੀਦਰਲੈਂਡ ਦੀ ਟੀਮ ਨੌਂ ਵਿਕਟਾਂ ‘ਤੇ 146 ਦੌੜਾਂ ਹੀ ਬਣਾ ਸਕੀ। ਵਨਿੰਦੂ ਹਸਾਰੰਗਾ ਨੇ ਚਾਰ ਓਵਰਾਂ ‘ਚ 28 ਦੌੜਾਂ ਦੇ ਕੇ ਤਿੰਨ ਵਿਕਟਾਂ ਲਈਆਂ ਜਦੋਂਕਿ ਮਹਿਸ਼ ਤੀਕਸ਼ਨਾ ਨੇ ਦੋ ਵਿਕਟਾਂ ਹਾਸਲ ਕੀਤੀਆਂ। ਨੀਦਰਲੈਂਡ ਲਈ ਸਲਾਮੀ ਬੱਲੇਬਾਜ਼ ਮੈਕਸ ਓ’ਡਾਊਡ ਨੇ 53 ਗੇਂਦਾਂ ‘ਚ ਛੇ ਚੌਕਿਆਂ ਤੇ ਤਿੰਨ ਛੱਕਿਆਂ ਦੀ ਮਦਦ ਨਾਲ ਨਾਬਾਦ 71 ਦੌੜਾਂ ਬਣਾਈਆਂ। ਹਾਲਾਂਕਿ ਉਸ ਨੂੰ ਦੂਜੇ ਪਾਸਿਓਂ ਕੋਈ ਸਹਿਯੋਗ ਨਹੀਂ ਮਿਲ ਸਕਿਆ। ਸ੍ਰੀਲੰਕਾ ਦੀ ਟੀਮ ਤਿੰਨ ਮੈਚਾਂ ‘ਚ ਚਾਰ ਅੰਕ ਲੈ ਕੇ ਸੁਪਰ 12 ਪੜਾਅ ‘ਚ ਪਹੁੰਚ ਗਈ ਹੈ।
