ਗਾਇਕ ਸਿੱਧੂ ਮੂਸੇਵਾਲਾ ਕਤਲ ਕਾਂਡ ‘ਚ ਸ਼ਾਮਲ ਗੈਂਗਸਟਰ ਦੀਪਕ ਟੀਨੂ ਦੇ ਪੁਲੀਸ ਹਿਰਾਸਤ ‘ਚੋਂ ਫਰਾਰ ਹੋਣ ਸਮੇਂ ਚਰਚਾ ‘ਚ ਆਏ ਸੀ.ਆਈ.ਏ. ਮਾਨਸਾ ਦੇ ਸਾਬਕਾ ਇੰਚਾਰਜ ਪ੍ਰਿਤਪਾਲ ਸਿੰਘ ਮੁੜ ਸੁਰਖੀਆਂ ‘ਚ ਹਨ। ਇਕ ਵੀਡੀਓ ਸਾਹਮਣੇ ਆਈ ਹੈ ਜਿਸ ‘ਚ ਉਹ ਡਿਸਕੋ ‘ਚ ਗੈਂਸਗਟਰਾਂ ਨਾਲ ਦਿਖਾਈ ਦਿੰਦੇ ਹਨ ਅਤੇ ਇਸ ਨਾਲ ਇਹ ਵੀ ਖੁਲਾਸਾ ਹੋਇਆ ਹੈ ਕਿ ਟੀਨੂੰ ਅਚਨਚੇਤ ਨਹੀਂ ਭੱਜਿਆ ਸੀ ਸਗੋਂ ਇਹ ਸਾਰਾ ਕੁਝ ਯੋਜਨਾਬੱਧ ਤਰੀਕੇ ਨਾਲ ਸਿਰੇ ਚੜ੍ਹਿਆ ਸੀ। ਟੀਨੂ ਲਗਭਗ ਇਕ ਮਹੀਨੇ ਪਹਿਲਾਂ ਮਾਨਸਾ ‘ਚ ਸੀ.ਆਈ.ਸਟਾਫ. ਦੇ ਉਸ ਸਮੇਂ ਦੇ ਇੰਚਾਰਜ ਪ੍ਰਿਤਪਾਲ ਸਿੰਘ ਦੇ ਘਰੋਂ ਅਚਾਨਕ ਨਹੀਂ ਭੱਜਿਆ ਸੀ ਸਗੋਂ ਇਸ ਦੀ ਪੂਰੀ ਪਲਾਨਿੰਗ ਕੀਤੀ ਗਈ ਸੀ। ਇਸ ਦੇ ਸਬੂਤ ਚੰਡੀਗੜ੍ਹ ਪੁਲੀਸ ਵਲੋਂ ਗ੍ਰਿਫ਼ਤਾਰ ਕੀਤੇ ਗਏ ਮੋਹਿਤ ਭਾਰਦਵਾਜ ਤੋਂ ਮਿਲੇ ਹਨ। ਮੋਹਿਤ ਨੂੰ ਟੀਨੂ ਦਾ ਖਾਸਮਖਾਸ ਮੰਨਿਆ ਜਾਂਦਾ ਹੈ ਅਤੇ ਉਸ ਲਈ ਹੀ ਕੰਮ ਕਰਦਾ ਸੀ, ਉਸ ਨੇ ਪੁੱਛਗਿੱਛ ‘ਚ ਦੱਸਿਆ ਕਿ ਟੀਨੂ ਨੂੰ ਭਜਾਉਣ ਦੀ ਪਲਾਨਿੰਗ ਉਸ ਸਮੇਂ ਕੀਤੀ ਜਾ ਰਹੀ ਸੀ ਜਦੋਂ ਉਸ ਨੂੰ 4 ਜੁਲਾਈ ਨੂੰ ਦਿੱਲੀ ਦੀ ਤਿਹਾੜ ਜੇਲ ਤੋਂ ਟਰਾਜ਼ਿਟ ਰਿਮਾਂਡ ‘ਤੇ ਮਾਨਸਾ ਲਿਆਂਦਾ ਗਿਆ ਸੀ। ਇਸ ਦੇ ਬਦਲੇ ਸਬ-ਇੰਸਪੈਕਟਰ ਪ੍ਰਿਤਪਾਲ ਨੂੰ 13 ਅਤੇ 14 ਜੁਲਾਈ ਨੂੰ ਚੰਡੀਗੜ੍ਹ ਦੇ ਡਿਸਕੋਥੈੱਕ ‘ਚ ਐਸ਼ ਕਰਵਾਉਣ, ਸ਼ਾਪਿੰਗ ਕਰਵਾਉਣ, ਹੋਟਲ ‘ਚ ਰੁਕਵਾਉਣ ਦੀ ਜ਼ਿੰਮੇਵਾਰੀ ਮੋਹਿਤ ਨੂੰ ਹੀ ਦਿੱਤੀ ਗਈ ਸੀ। ਮੋਹਿਤ ਨੂੰ ਸੋਮਵਾਰ ਨੂੰ ਅਦਾਲਤ ‘ਚ ਪੇਸ਼ ਕੀਤਾ ਗਿਆ। ਡਿਸਟ੍ਰਿਕ ਕ੍ਰਾਈਮ ਸੈੱਲ ਨੇ ਗੁਪਤ ਸੂਚਨਾ ਦੇ ਆਧਾਰ ‘ਤੇ ਲਾਰੈਂਸ ਬਿਸ਼ਨੋਈ ਗੈਂਗ ਦੇ ਨਜ਼ਦੀਕੀ ਮੋਹਿਤ ਭਾਰਦਵਾਜ (32) ਨੂੰ ਗ੍ਰਿਫ਼ਤਾਰ ਕੀਤਾ ਸੀ। ਉਸ ਦੇ ਕਬਜ਼ੇ ਵਿੱਚੋਂ ਪਿਸਤੌਲ ਵੀ ਬਰਾਮਦ ਕੀਤਾ ਹੈ। ਪੁਲੀਸ ਦਾ ਕਹਿਣਾ ਹੈ ਕਿ ਉਹ ਗੈਂਗਸਟਰ ਦੀਪਕ ਉਰਫ਼ ਟੀਨੂ ਦੇ ਵੀ ਕਾਫ਼ੀ ਨਜ਼ਦੀਕ ਹੈ। ਟੀਨੂ ਹਾਲ ਹੀ ‘ਚ ਪੰਜਾਬ ਪੁਲੀਸ ਦੀ ਹਿਰਾਸਤ ‘ਚੋਂ ਭੱਜ ਗਿਆ ਸੀ ਅਤੇ ਉਸ ਨੂੰ ਅਜਮੇਰ ਤੋਂ ਗ੍ਰਿਫ਼ਤਾਰ ਕੀਤਾ ਗਿਆ ਸੀ। ਉਹ ਗਾਇਕ ਸਿੱਧੂ ਮੂਸੇਵਾਲਾ ਹੱਤਿਆ ਕਾਂਡ ‘ਚ ਮੁਲਜ਼ਮ ਹੈ। ਦੱਸਣਯੋਗ ਹੈ ਕਿ ਟੀਨੂ ਮਾਨਸਾ ਪੁਲੀਸ ਦੀ ਹਿਰਾਸਤ ‘ਚੋਂ ਫਰਾਰ ਹੋਇਆ ਸੀ। ਦਿੱਲੀ ਪੁਲੀਸ ਨੇ ਉਸ ਨੂੰ ਫੜਿਆ ਸੀ। ਪੁਲੀਸ ਨੇ ਮੋਹਿਤ ਖ਼ਿਲਾਫ਼ ਆਰਮਜ਼ ਐਕਟ ਦਾ ਕੇਸ ਦਰਜ ਕੀਤਾ ਹੈ। ਪੁਲੀਸ ਜਾਂਚ ‘ਚ ਸਾਹਮਣੇ ਆਇਆ ਹੈ ਕਿ ਮੋਹਿਤ ਗੈਂਗਸਟਰ ਸੰਪਤ ਨਹਿਰਾ ਦੇ ਨਾਲ ਪੜ੍ਹਦਾ ਸੀ। ਸੰਪਤ ‘ਤੇ ਐਕਟਰ ਸਲਮਾਨ ਖਾਨ ਦੇ ਕਤਲ ਲਈ ਰੇਕੀ ਕਰਨ ਦਾ ਦੋਸ਼ ਵੀ ਹੈ। ਮੋਹਿਤ ਲਾਰੈਂਸ ਗਿਰੋਹ ਦਾ ਸਰਗਰਮ ਮੈਂਬਰ ਹੈ। ਪੁਲੀਸ ਮੋਹਿਤ ਤੋਂ ਅੱਗੇ ਅਹਿਮ ਜਾਣਕਾਰੀਆਂ ਹਾਸਲ ਕਰਨ ‘ਚ ਲੱਗੀ ਹੋਈ ਹੈ। ਡਿਸਟ੍ਰਿਕ ਕ੍ਰਾਈਮ ਸੈੱਲ ਦੇ ਹੱਥ 14 ਜੁਲਾਈ ਦੀ ਇਕ ਵੀਡੀਓ ਵੀ ਲੱਗੀ ਹੈ। ਇਸ ‘ਚ ਦੋਸ਼ੀ ਮੋਹਿਤ ਭਾਰਦਵਾਜ ਅਤੇ ਪ੍ਰਿਤਪਾਲ ਡਿਸਕੋਥੈੱਕ ‘ਚ ਨਜ਼ਰ ਆ ਰਹੇ ਹਨ। 41 ਸੈਕੰਡ ਦੀ ਇਹ ਵੀਡੀਓ ਮੋਹਿਤ ਆਪਣੇ ਫੋਨ ‘ਚ ਬਣਾ ਰਿਹਾ ਹੈ ਜਿਸ ‘ਚ ਉਹ ਅਤੇ ਸੋਫੇ ‘ਤੇ ਬੈਠਾ ਪ੍ਰਿਤਪਾਲ ਸਿੰਘ ਵੀ ਨਜ਼ਰ ਆ ਰਿਹਾ ਹੈ। ਪ੍ਰਿਤਪਾਲ ਹੱਥ ਅਤੇ ਸਿਰ ਹਿਲਾਉਂਦਾ, ਵਿਕਟਰੀ ਸਾਈਨ ਬਣਾਉਂਦਾ ਦਿਖ ਰਿਹਾ ਹੈ। ਮੋਹਿਤ ਨੇ ਪੁੱਛਗਿੱਛ ‘ਚ ਖੁਲਾਸਾ ਕੀਤਾ ਕਿ ਜੁਲਾਈ ‘ਚ ਉਸ ਨੂੰ ਜੇਲ ਤੋਂ ਦੀਪਕ ਟੀਨੂ ਦਾ ਫੋਨ ਆਇਆ ਸੀ। ਫੋਨ ‘ਤੇ ਉਸ ਨੇ ਕਿਹਾ ਕਿ ਉਸ ਦਾ ਬਹੁਤ ਹੀ ਖਾਸ ਮਹਿਮਾਨ ਸਬ ਇੰਸਪੈਸਟਰ ਪ੍ਰਿਤਪਾਲ ਸਿੰਘ ਚੰਡੀਗੜ੍ਹ ਆ ਰਿਹਾ ਹੈ। ਉਸ ਨੂੰ ਖਰੜ ਤੋਂ ਜਾ ਕੇ ਲੈ ਆਣਾ ਅਤੇ ਚੰਡੀਗੜ੍ਹ ‘ਚ ਪੂਰੀ ਐਸ਼ ਕਰਵਾਉਣਾ। ਇਸ ਤੋਂ ਬਾਅਦ ਮੋਹਿਤ ਪ੍ਰਿਤਪਾਲ ਨੂੰ ਲੈ ਕੇ ਆਇਆ। ਪ੍ਰਿਤਪਾਲ ਇਥੇ ਦੋ ਦਿਨ 13 ਅਤੇ 14 ਜੁਲਾਈ ਨੂੰ ਰੁਕਿਆ। ਉਸ ਨੂੰ ਜ਼ੀਰਕਪੁਰ ਦੇ ਇਕ ਨਾਮੀ ਹੋਟਲ ‘ਚ ਠਹਿਰਾਇਆ ਗਿਆ। ਉਥੇ ਉਸ ਨੂੰ ਕੰਪਨੀ ਦੇਣ ਲਈ ਦੋ ਕੁੜੀਆਂ ਵੀ ਭੇਜੀਆਂ ਗਈਆਂ। ਮੋਹਿਤ ਪ੍ਰਿਤਪਾਲ ਨੂੰ ਚੰਡੀਗੜ੍ਹ ਦੇ ਨਾਮੀ ਡਿਸਕੋਥੈੱਕ ‘ਚ ਲੈ ਗਿਆ। ਇਸ ਤੋਂ ਇਲਾਵਾ ਪ੍ਰਿਤਪਾਲ ਨੂੰ ਚੰਡੀਗੜ੍ਹ ਦੇ ਮਸ਼ਹੂਰ ਮਾਲ ‘ਚ ਸ਼ਾਪਿੰਗ ਵੀ ਕਰਵਾਈ ਗਈ ਜਿੱਥੇ ਉਸ ਦਾ ਬਿੱਲ ਲਗਭਗ ਸਵਾ ਲੱਖ ਰੁਪਏ ਬਣਿਆ। ਡਿਸਕੋ ਵਿਚ ਮਹਿੰਗੀ ਸ਼ਰਾਬ ਪਿਲਾਈ ਗਈ, ਖਾਣੇ ਦੇ ਬਿੱਲ ਵੀ ਮੋਟਾ ਬਣਿਆ।
