ਇਕ ਨਾਬਾਲਗ ਮੁੰਡੇ ਵੱਲੋਂ ਸਰਬੀਆ ‘ਚ ਬੇਲਗ੍ਰੇਡ ਦੇ ਇਕ ਸਕੂਲ ‘ਚ ਕੀਤੀ ਫਾਇਰਿੰਗ ਕਰ ਦਿੱਤੀ ਜਿਸ ‘ਚ ਅੱਠ ਬੱਚੇ ਅਤੇ ਇਕ ਸੁਰੱਖਿਆ ਗਾਰਡ ਦੀ ਮੌਤ ਹੋ ਗਈ ਹੈ। ਸਰਬੀਆ ਪੁਲੀਸ ਨੇ ਇਕ ਬਿਆਨ ਜਾਰੀ ਕਰਕੇ ਇਹ ਜਾਣਕਾਰੀ ਦਿੱਤੀ। ਬਿਆਨ ਅਨੁਸਾਰ ਪੁਲਸ ਨੂੰ ਸਵੇਰੇ 8:40 ਵਜੇ ਦੇ ਕਰੀਬ ਵਲਾਦਿਸਲਾਵ ਰਿਬਨੀਕਰ ਪ੍ਰਾਇਮਰੀ ਸਕੂਲ ‘ਚ ਗੋਲੀਆਂ ਚੱਲਣ ਦੀ ਸੂਚਨਾ ਮਿਲੀ। ਬਿਆਨ ਮੁਤਾਬਕ ਨਾਬਾਲਗ ਸ਼ੱਕੀ ਸੱਤਵੀਂ ਜਮਾਤ ਦਾ ਵਿਦਿਆਰਥੀ ਹੈ ਅਤੇ ਉਸ ਨੂੰ ਹਿਰਾਸਤ ‘ਚ ਲੈ ਲਿਆ ਗਿਆ ਹੈ। ਬਿਆਨ ‘ਚ ਕਿਹਾ ਗਿਆ ਹੈ ਕਿ ਗੋਲੀਬਾਰੀ ‘ਚ ਇਕ ਅਧਿਆਪਕ ਅਤੇ ਛੇ ਬੱਚੇ ਵੀ ਜ਼ਖਮੀ ਹੋਏ ਹਨ, ਉਨ੍ਹਾਂ ਨੂੰ ਨੇੜਲੇ ਹਸਪਤਾਲ ‘ਚ ਦਾਖਲ ਕਰਵਾਇਆ ਗਿਆ ਹੈ। ਬਿਆਨ ਮੁਤਾਬਕ ਸ਼ੱਕੀ ਨੇ ਆਪਣੇ ਪਿਤਾ ਦੀ ਬੰਦੂਕ ਤੋਂ ਹੋਰ ਵਿਦਿਆਰਥੀਆਂ ਅਤੇ ਸਕੂਲ ਦੇ ਗਾਰਡ ‘ਤੇ ਕਈ ਗੋਲੀਆਂ ਚਲਾਈਆਂ। ਮੀਡੀਆ ਦੀਆਂ ਰਿਪੋਰਟਾਂ ਮੁਤਾਬਕ ਗੋਲੀਬਾਰੀ ‘ਚ 8 ਬੱਚਿਆਂ ਸਮੇਤ ਸਕੂਲ ਦਾ ਗਾਰਡ ਮਾਰਿਆ ਗਿਆ। ਗੋਲੀਬਾਰੀ ਦੇ ਸਮੇਂ ਸਕੂਲ ‘ਚ ਮੌਜੂਦ ਇਕ ਵਿਦਿਆਰਥੀ ਨੇ ਕਿਹਾ ਕਿ ‘ਮੈਂ ਗੋਲੀਆਂ ਚੱਲਣ ਦੀ ਆਵਾਜ਼ ਸੁਣੀ। ਉਹ ਗੋਲੀਆਂ ਚਲਾ ਰਿਹਾ ਸੀ। ਮੈਨੂੰ ਨਹੀਂ ਪਤਾ ਸੀ ਕਿ ਉਥੇ ਕੀ ਹੋ ਰਿਹਾ ਸੀ। ਸਾਨੂੰ ਫ਼ੋਨ ‘ਤੇ ਕੁਝ ਸੁਨੇਹੇ ਮਿਲ ਰਹੇ ਸਨ।’ ਗੋਲੀਬਾਰੀ ਦੌਰਾਨ ਸਕੂਲ ‘ਚ ਮੌਜੂਦ ਇਕ ਵਿਦਿਆਰਥਣ ਨੇ ਦੱਸਿਆ ਕਿ ‘ਸ਼ੱਕੀ ਬਹੁਤ ਸ਼ਾਂਤ ਅਤੇ ਨਰਮ ਸੁਭਾਅ ਵਾਲਾ ਸੀ। ਉਹ ਪੜ੍ਹਾਈ ‘ਚ ਵੀ ਚੰਗਾ ਸੀ, ਪਰ ਅਸੀਂ ਉਸ ਬਾਰੇ ਬਹੁਤਾ ਨਹੀਂ ਜਾਣਦੇ ਸੀ।’ ਵਿਦਿਆਰਥਣ ਨੇ ਕਿਹਾ, ‘ਉਹ (ਸ਼ੱਕੀ ਨਾਬਾਲਗ) ਦੂਜਿਆਂ ਨਾਲ ਜ਼ਿਆਦਾ ਮੇਲ-ਜੋਲ ਨਹੀਂ ਕਰਦਾ ਸੀ। ਮੈਨੂੰ ਯਕੀਨਨ ਅਜਿਹਾ ਕੁਝ ਹੋਣ ਦੀ ਉਮੀਦ ਨਹੀਂ ਸੀ।’ ਇਕ ਹੋਰ ਵਿਦਿਆਰਥੀ ਨੇ ਦੱਸਿਆ ਕਿ ਨਾਬਾਲਗ ਸ਼ੱਕੀ ਨੇ ਪਹਿਲਾਂ ਅਧਿਆਪਕ ‘ਤੇ ਗੋਲੀ ਚਲਾਈ ਅਤੇ ਫਿਰ ਵਿਦਿਆਰਥੀਆਂ ‘ਤੇ ਬੰਦੂਕ ਚਲਾ ਦਿੱਤੀ, ਜੋ ਆਪਣੀ ਜਾਨ ਬਚਾਉਣ ਲਈ ਮੇਜ਼ ਦੇ ਹੇਠਾਂ ਲੁਕ ਗਏ ਸਨ। ਸਥਾਨਕ ਮੀਡੀਆ ਚੈਨਲਾਂ ‘ਤੇ ਪ੍ਰਸਾਰਿਤ ਫੁਟੇਜ ‘ਚ ਸਕੂਲ ਦੇ ਬਾਹਰ ਚਿੰਤਤ ਮਾਪਿਆਂ ਦੀ ਭੀੜ ਦਿਖਾਈ ਦਿੱਤੀ। ਇਸ ਦੇ ਨਾਲ ਹੀ ਪੁਲੀਸ ਕਰਮਚਾਰੀ ਸ਼ੱਕੀ ਵਿਅਕਤੀ ਨੂੰ ਫੜ ਕੇ ਸੜਕ ‘ਤੇ ਖੜ੍ਹੀ ਪੁਲੀਸ ਗੱਡੀ ਵੱਲ ਲਿਜਾਂਦੇ ਦੇਖੇ ਗਏ। ਵਲਾਦਿਸਲਾਵ ਰਿਬਨੀਕਰ ਪ੍ਰਾਇਮਰੀ ਸਕੂਲ ਕੇਂਦਰੀ ਬੇਲਗ੍ਰੇਡ ‘ਚ ਇਕ ਮਸ਼ਹੂਰ ਸਕੂਲ ਹੈ। ਗੋਲੀਬਾਰੀ ਦੀ ਘਟਨਾ ਤੋਂ ਬਾਅਦ ਇਸ ਸਕੂਲ ਦੇ ਆਲੇ-ਦੁਆਲੇ ਦੇ ਇਲਾਕੇ ਨੂੰ ਪੁਲੀਸ ਵੱਲੋਂ ਸੀਲ ਕਰ ਦਿੱਤਾ ਗਿਆ। ਸਰਬੀਆ ‘ਚ ਪ੍ਰਾਇਮਰੀ ਸਕੂਲਾਂ ‘ਚ ਬੱਚੇ ਅੱਠਵੀਂ ਜਮਾਤ ਤੱਕ ਪੜ੍ਹਦੇ ਹਨ। ਸਰਬੀਆ ‘ਚ ਜਨਤਕ ਥਾਵਾਂ, ਖਾਸ ਕਰਕੇ ਸਕੂਲਾਂ ‘ਚ ਗੋਲੀਬਾਰੀ ਬਹੁਤ ਘੱਟ ਹੁੰਦੀ ਹੈ। ਇਸ ਦੇਸ਼ ‘ਚ ਗੋਲੀਬਾਰੀ ਦੀ ਆਖਰੀ ਘਟਨਾ 2013 ‘ਚ ਹੋਈ ਸੀ ਜਿਸ ‘ਚ ਇਕ ਸਾਬਕਾ ਫੌਜੀ ਨੇ 13 ਲੋਕਾਂ ਦੀ ਗੋਲੀ ਮਾਰ ਕੇ ਹੱਤਿਆ ਕਰ ਦਿੱਤੀ ਸੀ।
