ਨਰਮਦਾ ਬਚਾਓ ਅੰਦੋਲਨ ਦੀ ਆਗੂ ਮੇਧਾ ਪਾਟਕਰ ਤੇ 11 ਹੋਰਨਾਂ ਖ਼ਿਲਾਫ਼ ਮੱਧ ਪ੍ਰਦੇਸ਼ ਦੇ ਬਰਵਾਨੀ ਦੇ ਕੋਤਵਾਲੀ ਥਾਣੇ ਨੇ ਧੋਖਾਧਡ਼ੀ ਦਾ ਮਾਮਲਾ ਦਰਜ ਕੀਤਾ ਹੈ। ਉਨ੍ਹਾਂ ਦੇ ਐੱਨ.ਜੀ.ਓ. ਵੱਲੋਂ ਕਬਾਇਲੀ ਬੱਚਿਆਂ ਦੀ ਸਿੱਖਿਆ ਅਤੇ ਹੋਰ ਸਮਾਜਿਕ ਕੰਮਾਂ ਦੇ ਨਾਂ ’ਤੇ 13.5 ਕਰੋਡ਼ ਰੁਪਏ ਤੋਂ ਵੱਧ ਜਮ੍ਹਾਂ ਕਰਵਾ ਕੇ ਸਿਆਸੀ ਗਤੀਵਿਧੀਆਂ ਅਤੇ ਵਿਕਾਸ ਪ੍ਰੋਜੈਕਟਾਂ ਖ਼ਿਲਾਫ਼ ਵਿਰੋਧ ਪ੍ਰਦਰਸ਼ਨ ’ਚ ਦੁਰਵਰਤੋਂ ਕਰਨ ਦੇ ਦੋਸ਼ ਲਗਾਏ ਗਏ ਹਨ। ਪੁਲੀਸ ਸੁਪਰਡੈਂਟ ਦੀਪਕ ਕੁਮਾਰ ਸ਼ੁਕਲਾ ਨੇ ਕਿਹਾ ਕਿ ਮੇਧਾ ਪਾਟਕਰ ਸਮੇਤ ਹੋਰ ਟਰੱਸਟੀਆਂ ’ਤੇ ਉਨ੍ਹਾਂ ਦੀ ਸੰਸਥਾ ਨਰਮਦਾ ਨਵਨਿਰਮਾਣ ਅਭਿਆਨ ਰਾਹੀਂ 2007 ਤੋਂ 2022 ਦਰਮਿਆਨ ਫੰਡਾਂ ਦੀ ਦੁਰਵਰਤੋਂ ਦਾ ਦੋਸ਼ ਹੈ। ਜਾਂਚ ’ਚ ਧਾਰਾਵਾਂ ਤੇ ਮੁਲਜ਼ਮ ਵਧ ਸਕਦੇ ਹਨ। ਐੱਫ.ਆਈ.ਆਰ. ’ਚ ਦੱਸਿਆ ਗਿਆ ਹੈ ਕਿ ਕਰੀਬ 14 ਸਾਲਾਂ ’ਚ ਜਦੋਂ ਟਰੱਸਟੀਆਂ ਨੇ ਕਰੀਬ 13 ਕਰੋਡ਼ 52 ਲੱਖ 59 ਹਜ਼ਾਰ 304 ਰੁਪਏ ਦੀ ਰਾਸ਼ੀ ਜਮ੍ਹਾਂ ਕੀਤੀ ਤੇ ਓਨੀ ਹੀ ਰਕਮ ਖਰਚ ਕੀਤੀ, ਪਰ ਨਾ ਤਾਂ ਪੈਸੇ ਦਾ ਸਰੋਤ ਤੇ ਨਾ ਹੀ ਇਸ ਲਈ ਕੀਤੇ ਗਏ ਖਰਚੇ ਬਾਰੇ ਸਪੱਸ਼ਟ ਖੁਲਾਸਾ ਕੀਤਾ ਹੈ। ਸਾਲ 2020 ਤੋਂ 2022 ਦੌਰਾਨ ਜਦੋਂ ਪੂਰੀ ਦੁਨੀਆ ’ਚ ਕਰੋਨਾ ਦੇ ਦੌਰ ’ਚ ਮਹਾਮਾਰੀ ਸੀ, ਉਕਤ ਟਰੱਸਟ ਸੀ.ਐੱਸ.ਆਰ. ਨੀਤੀ ਰਾਹੀਂ ਮਝਗਾਓਂ ਡਕ ਲਿਮਟਿਡ ਤੋਂ ਪ੍ਰਾਪਤ 65 ਲੱਖ ਰੁਪਏ ਤੋਂ ਵੱਧ ਖਰਚ ਕਰਨ ’ਚ ਕਾਮਯਾਬ ਰਿਹਾ। ਇਸ ਦਾ ਹਿਸਾਬ ਵੀ ਦਰਜ ਨਹੀਂ ਹੈ। ਮੇਧਾ ਪਾਟਕਰ ਨੇ ਪੱਤਰਕਾਰਾਂ ਨੂੰ ਦੱਸਿਆ ਕਿ ਫਿਲਹਾਲ ਉਨ੍ਹਾਂ ਨੂੰ ਅਜਿਹਾ ਕੋਈ ਮਾਮਲਾ ਦਰਜ ਹੋਣ ਦੀ ਜਾਣਕਾਰੀ ਨਹੀਂ ਹੈ। ਉਨ੍ਹਾਂ ਮੁਤਾਬਕ ਆਮਦਨ ਅਤੇ ਖਰਚ ਨਾਲ ਸਬੰਧਤ ਦਸਤਾਵੇਜ਼, ਆਡਿਟ ਉਨ੍ਹਾਂ ਕੋਲ ਉਪਲਬਧ ਹਨ। ਸ਼ਿਕਾਇਤਕਰਤਾ ਆਰ.ਐੱਸ.ਐੱਸ. ਤੇ ਏ.ਬੀ.ਵੀ.ਪੀ. ਨਾਲ ਜੁਡ਼ੇ ਹੋਏ ਹਨ। ਦੂਜੇ ਪਾਸੇ ਸ਼ਿਕਾਇਤਕਰਤਾ ਪ੍ਰੀਤਮ ਰਾਜ ਦਾ ਕਹਿਣਾ ਹੈ ਕਿ ਉਹ ਬੇਸ਼ੱਕ ਆਰ.ਐੱਸ.ਐੱਸ. ਤੇ ਏ.ਬੀ.ਵੀ.ਪੀ. ਨਾਲ ਜੁਡ਼ੇ ਹੋਏ ਹਨ ਪਰ ਇਸ ਦਾ ਘਟਨਾਕ੍ਰਮ ਨਾਲ ਕੋਈ ਸਬੰਧ ਨਹੀਂ ਹੈ।
