ਓਲੰਪਿਕ ਚੈਂਪੀਅਨ ਨੀਰਜ ਚੋਪਡ਼ਾ ਇਸ ਸਾਲ ਜੈਵਲਿਨ ਥਰੋਅ ’ਚ 90 ਮੀਟਰ ਦਾ ਰਿਕਾਰਡ ਤੋਡ਼ਨ ਪ੍ਰਤੀ ਆਸਵੰਦ ਹੈ ਪਰ ਉਹ ਵਰਲਡ ਚੈਂਪੀਅਨਸ਼ਿਪ ’ਚ ਜਾਣ ਬਾਰੇ ਨਹੀਂ ਸੋਚ ਰਿਹਾ। ਉਸ ਨੂੰ ਲੱਗਦਾ ਹੈ ਕਿ ਇਸ ਬਾਰੇ ਸੋਚਣ ਨਾਲ ਉਸ ’ਤੇ ਵਾਧੂ ਬੋਝ ਪਵੇਗਾ। 24 ਸਾਲਾ ਨੀਰਜ 90 ਮੀਟਰ ਤੱਕ ਪਹੁੰਚਣ ਤੋਂ ਕਾਫੀ ਨੇਡ਼ੇ ਹੈ। ਇਸ ਸੀਜ਼ਨ ’ਚ ਆਪਣੇ ਤਿੰਨ ਮੁਕਾਬਲਿਆਂ ’ਚ ਉਸ ਨੇ ਦੋ ਵਾਰ ਆਪਣੇ ਨਿੱਜੀ ਸਰਬੋਤਮ ਪ੍ਰਦਰਸ਼ਨ ’ਚ ਸੁਧਾਰ ਕੀਤਾ। ਪਿਛਲੇ ਮਹੀਨੇ ਉਸ ਨੇ ਪਾਵੋ ਨਰਮੀ ਖੇਡਾਂ ’ਚ 89.30 ਮੀਟਰ ਜੈਵਲਿਨ ਸੁੱਟਿਆ ਸੀ ਅਤੇ ਬੀਤੇ ਦਿਨ ਡਾਇਮੰਡ ਲੀਗ ਮੀਟ ’ਚ ਉਸ ਨੇ 89.94 ਮੀਟਰ ਦਾ ਰਿਕਾਰਡ ਬਣਾਇਆ, ਜੋ 90 ਮੀਟਰ ਤੋਂ ਸਿਰਫ ਛੇ ਸੈਂਟੀਮੀਟਰ ਘੱਟ ਹੈ। ਡਾਇਮੰਡ ਲੀਗ ਵਿੱਚ ਪਹਿਲਾ ਸਥਾਨ ਹਾਸਲ ਕਰਨ ਮਗਰੋਂ ਚੋਪਡ਼ਾ ਨੇ ਕਿਹਾ, ‘ਹੁਣ ਮੈਂ 90 ਮੀਟਰ ਦੇ ਨੇਡ਼ੇ ਹਾਂ ਅਤੇ ਮੈਂ ਇਸ ਸਾਲ ਇਹ ਟੀਚਾ ਪੂਰਾ ਕਰ ਸਕਦਾ ਹਾਂ। ਅੱਜ ਹਾਰਨ ਦੇ ਬਾਵਜੂਦ ਮੈਂ ਚੰਗਾ ਮਹਿਸੂਸ ਕਰ ਰਿਹਾ ਹਾਂ। ਮੈਂ ਆਪਣਾ ਸਰਬੋਤਮ ਪ੍ਰਦਰਸ਼ਨ ਕੀਤਾ।’
