ਦੁਨੀਆਂ ਦੇ ਵੱਧ ਰੁਝੇਵੇਂ ਵਾਲੇ ਏਅਰਪੋਰਟਾਂ ‘ਚ ਸ਼ੁਮਾਰ ਟੋਰਾਂਟੋ ਦੇ ਪੀਅਰਸਨ ਇੰਟਰਨੈਸ਼ਨਲ ਏਅਰਪੋਰਟ ਤੋਂ ਦੋ ਕਰੋੜ ਕੈਨੇਡੀਅਨ ਡਾਲਰ ਤੋਂ ਵੱਧ ਦੀ ਕੀਮਤ ਦਾ ਸੋਨਾ ਅਤੇ ਹੋਰ ਵਸਤੂਆਂ ਨਾਲ ਭਰਿਆ ਇਕ ਕਾਰਗੋ ਕੰਟੇਨਰ ਚੋਰੀ ਹੋ ਗਿਆ। ਜਿਵੇਂ ਹੀ ਇਹ ਖ਼ਬਰ ਬਾਹਰ ਆਈ ਤਾਂ ਇਕ ਵਾਰ ਹੜਕੰਮ ਮੱਚ ਗਿਆ। ਲੋਕ ਵੀ ਇਹ ਖ਼ਬਰ ਸੁਣ ਕੇ ਹੈਰਾਨ ਹਨ। ਅਧਿਕਾਰੀਆਂ ਨੇ ਪੜਤਾਲ ਸ਼ੁਰੂ ਕਰ ਦਿੱਤੀ ਹੈ ਅਤੇ ਪੁਲੀਸ ਵੀ ਮਾਮਲੇ ਦੀ ਜਾਂਚ ਕਰਕੇ ਚੋਰੀ ਹੋਏ ਕੰਟੇਨਰ ਤੇ ਚੋਰਾਂ ਬਾਰੇ ਪਤਾ ਲਾਉਣ ਲਈ ਸਿਰਤੋੜ ਯਤਨ ਕਰ ਰਹੀ ਹੈ। ਪੀਲ ਰੀਜਨਲ ਪੁਲਸ ਇੰਸਪੈਕਟਰ ਸਟੀਫਨ ਡੂਵੈਸਟੇਨ ਨੇ ਕਿਹਾ ਕਿ ਸੋਮਵਾਰ ਸ਼ਾਮ ਨੂੰ ਇਕ ਜਹਾਜ਼ ਤੋਂ ਉਤਾਰੇ ਜਾਣ ਤੋਂ ਬਾਅਦ ‘ਉਚ ਮੁੱਲ’ ਵਾਲਾ ਕੰਟੇਨਰ ਇਕ ਹੋਲਡਿੰਗ ਏਰੀਆ ਦੀ ਸਹੂਲਤ ‘ਤੇ ਲਿਆਂਦਾ ਗਿਆ ਸੀ। ਉਨ੍ਹਾਂ ਕਿਹਾ ਕਿ ‘ਆਮ ਪ੍ਰਕਿਰਿਆ ਦੇ ਅਨੁਸਾਰ ਜਹਾਜ਼ ਨੂੰ ਉਤਾਰਿਆ ਗਿਆ ਸੀ ਅਤੇ ਜਹਾਜ਼ ਤੋਂ ਮਾਲ ਨੂੰ ਇਕ ਹੋਲਡਿੰਗ ਕਾਰਗੋ ਸਹੂਲਤ ‘ਚ ਲਿਜਾਇਆ ਗਿਆ ਸੀ।’ ਪੁਲੀਸ ਅਧਿਕਾਰੀ ਨੇ ਦੱਸਿਆ ਕਿ ‘ਕੰਟੇਨਰ ‘ਚ ਇਕ ਉੱਚ ਕੀਮਤ ਵਾਲੀ ਸ਼ਿਪਮੈਂਟ ਸੀ। ਇਸ ‘ਚ ਸੋਨਾ ਸੀ ਅਤੇ ਨਾਲ ਹੀ ਮੁਦਰਾ ਮੁੱਲ ਦੀਆਂ ਹੋਰ ਵਸਤੂਆਂ ਸਨ। ਕੁਝ ਦੇਰ ਬਾਅਦ ਗੁੰਮ ਹੋਏ ਸਾਮਾਨ ਦੀ ਸੂਚਨਾ ਪੁਲੀਸ ਨੂੰ ਦਿੱਤੀ ਗਈ। ਡੂਵੈਸਟੇਨ ਨੇ ਕਿਹਾ ਕਿ ‘ਅਸੀਂ ਤਿੰਨ ਦਿਨ ਤੋਂ ਜਾਂਚ ਕਰ ਰਹੇ ਹਾਂ, ਇਸ ਲਈ ਸਾਡੇ ਜਾਂਚਕਰਤਾ ਸਾਮਾਨ ਦੀ ਭਾਲ ਲਈ ਪੂਰੀ ਕੋਸ਼ਿਸ਼ ਕਰ ਰਹੇ ਹਨ।’ ਪੁਲੀਸ ਨੇ ਹੋਰ ਵੇਰਵੇ ਦੇਣ ਤੋਂ ਇਨਕਾਰ ਕਰ ਦਿੱਤਾ। ਫਿਲਹਾਲ ਕੋਈ ਗ੍ਰਿਫ਼ਤਾਰੀ ਨਹੀਂ ਹੋਈ ਹੈ ਅਤੇ ਜਾਂਚ ਜਾਰੀ ਹੈ।
