ਇੰਡੀਆ ਦਾ ਰੋਹਨ ਬੋਪੰਨਾ ਬੀ.ਐਨ.ਪੀ. ਪਰਿਬਾਸ ਓਪਨ ਟੈਨਿਸ ਟੂਰਨਾਮੈਂਟ ‘ਚ ਆਪਣੇ ਆਸਟਰੇਲੀਅਨ ਸਾਥੀ ਮੈਟ ਐਬਡੇਨ ਨਾਲ ਪੁਰਸ਼ ਡਬਲਜ਼ ਦਾ ਖਿਤਾਬ ਜਿੱਤ ਕੇ ਏ.ਟੀ.ਪੀ. ਮਾਸਟਰਜ਼ 1000 ਈਵੈਂਟ ਜਿੱਤਣ ਵਾਲਾ ਸਭ ਤੋਂ ਵੱਧ ਉਮਰ ਦਾ ਖਿਡਾਰੀ ਬਣ ਗਿਆ ਹੈ। ਬੋਪੰਨਾ ਹੁਣ 43 ਸਾਲ ਦੇ ਹਨ। ਉਸ ਨੇ ਅਤੇ 35 ਸਾਲਾ ਐਬਡੇਨ ਨੇ ਫਾਈਨਲ ‘ਚ ਵੇਸਲੇ ਕੁਲਹੋਫ ਅਤੇ ਬ੍ਰਿਟੇਨ ਦੇ ਨੀਲ ਸਕੁਪਸਕੀ ਦੀ ਚੋਟੀ ਦਾ ਦਰਜਾ ਪ੍ਰਾਪਤ ਜੋੜੀ ਨੂੰ 6-3, 2-6, 10-8 ਨਾਲ ਹਰਾਇਆ। ਆਪਣੇ 10ਵੇਂ ਏ.ਟੀ.ਪੀ. ਮਾਸਟਰਸ 1000 ਫਾਈਨਲ ‘ਚ ਖੇਡ ਰਹੇ ਬੋਪੰਨਾ ਨੇ ਕਿਹਾ, ‘ਸੱਚਮੁੱਚ ਖਾਸ। ਇਸੇ ਕਰਕੇ ਇਸ ਨੂੰ ਟੈਨਿਸ ਦਾ ਸਵਰਗ ਕਿਹਾ ਜਾਂਦਾ ਹੈ। ਮੈਂ ਸਾਲਾਂ ਤੋਂ ਇਥੇ ਆ ਰਿਹਾ ਹਾਂ ਅਤੇ ਲੋਕਾਂ ਨੂੰ ਇੱਥੇ ਖਿਤਾਬ ਜਿੱਤਦੇ ਦੇਖ ਰਿਹਾ ਹਾਂ। ਮੈਂ ਸੱਚਮੁੱਚ ਖੁਸ਼ ਹਾਂ ਕਿ ਮੈਂ ਅਤੇ ਮੈਟ ਇਥੇ ਖਿਤਾਬ ਜਿੱਤਣ ‘ਚ ਕਾਮਯਾਬ ਰਹੇ।’ ਉਸ ਨੇ ਕਿਹਾ, ‘ਅਸੀਂ ਸਖ਼ਤ ਅਤੇ ਕਰੀਬੀ ਮੈਚ ਖੇਡੇ। ਅੱਜ ਅਸੀਂ ਇੱਥੇ ਸਭ ਤੋਂ ਵਧੀਆ ਟੀਮ ਦਾ ਸਾਹਮਣਾ ਕੀਤਾ। ਮੈਂ ਸੱਚਮੁੱਚ ਬਹੁਤ ਖੁਸ਼ ਹਾਂ ਕਿ ਅਸੀਂ ਟਰਾਫੀ ਜਿੱਤਣ ‘ਚ ਕਾਮਯਾਬ ਰਹੇ।’ ਬੋਪੰਨਾ ਨੇ ਇਸ ਤਰ੍ਹਾਂ 42 ਸਾਲ ਦੀ ਉਮਰ ‘ਚ 2015 ਸਿਨਸਿਨਾਟੀ ਮਾਸਟਰਸ ਜਿੱਤਣ ਵਾਲੇ ਕੈਨੇਡੀਅਨ ਡੇਨੀਅਲ ਨੇਸਟਰ ਨੂੰ ਪਿੱਛੇ ਛੱਡ ਦਿੱਤਾ। ਉਸਨੇ ਮਜ਼ਾਕ ‘ਚ ਕਿਹਾ, ‘ਮੈਂ ਡੈਨੀ ਨੇਸਟਰ ਨਾਲ ਗੱਲ ਕੀਤੀ ਸੀ ਅਤੇ ਮੈਂ ਉਸਨੂੰ ਕਿਹਾ ਸੀ ਕਿ ਮੈਨੂੰ ਅਫਸੋਸ ਹੈ ਕਿ ਮੈਂ ਉਸਦਾ ਰਿਕਾਰਡ ਤੋੜਨ ਜਾ ਰਿਹਾ ਹਾਂ। ਇਹ ਖਿਤਾਬ ਹਮੇਸ਼ਾ ਮੇਰੇ ਕੋਲ ਰਹੇਗਾ ਅਤੇ ਮੈਂ ਇਸ ਤੋਂ ਬਹੁਤ ਖੁਸ਼ ਹਾਂ। 2017 ‘ਚ ਮੋਂਟੇਕਾਰਲੋ ਓਪਨ ਤੋਂ ਬਾਅਦ ਇਹ ਬੋਪੰਨਾ ਦਾ ਕੁੱਲ ਪੰਜਵਾਂ ਅਤੇ ਪਹਿਲਾ ਮਾਸਟਰਜ਼ 1000 ਡਬਲਜ਼ ਖਿਤਾਬ ਸੀ। ਇਸ ਸਾਲ ਇੰਡੀਆ ਅਤੇ ਆਸਟਰੇਲੀਆ ਦੀ ਜੋੜੀ ਦਾ ਇਹ ਤੀਜਾ ਫਾਈਨਲ ਸੀ। ਬੋਪੰਨਾ ਨੇ ਹੁਣ ਤੱਕ ਟੂਰ ਪੱਧਰ ‘ਤੇ ਕੁੱਲ 24 ਖਿਤਾਬ ਜਿੱਤੇ ਹਨ। ਬੋਪੰਨਾ ਅਤੇ ਐਬਡੇਨ ਦੀ ਜੋੜੀ ਨੇ ਸੈਮੀਫਾਈਨਲ ‘ਚ ਮੌਜੂਦਾ ਚੈਂਪੀਅਨ ਅਤੇ ਦੋ ਵਾਰ ਦੇ ਖਿਤਾਬ ਜੇਤੂ ਜੌਹਨ ਇਸਨਰ ਅਤੇ ਜੈਕ ਸਾਕ ਨੂੰ ਹਰਾਇਆ। ਇਸ ਤੋਂ ਪਹਿਲਾਂ ਕੁਆਰਟਰ ਫਾਈਨਲ ‘ਚ ਉਨ੍ਹਾਂ ਨੇ ਕੈਨੇਡਾ ਦੇ ਫੇਲਿਕਸ ਔਗਰ ਐਲਿਸੀਮ ਅਤੇ ਡੇਨਿਸ ਸ਼ਾਪੋਵਾਲੋਵ ਨੂੰ ਹਰਾਇਆ।
