ਰਵਾਇਤੀ ਤੌਰ ‘ਤੇ ਫੀਫਾ ਵਰਲਡ ਕੱਪ ‘ਚ 64 ਮੈਚ ਖੇਡੇ ਜਾਂਦੇ ਹਨ ਪਰ 2026 ਦੇ ਫੀਫਾ ਵਰਲਡ ਕੱਪ ‘ਚ 104 ਮੈਚ ਖੇਡੇ ਜਾਣਗੇ ਅਤੇ ਟੂਰਨਾਮੈਂਟ ‘ਚ 48 ਟੀਮਾਂ ਹਿੱਸਾ ਲੈਣਗੀਆਂ। ਫੀਫਾ ਨੇ ਇਸ ਵਾਰ ਫਾਰਮੈਟ ਦੇ ਵਿਸਥਾਰ ਦਾ ਐਲਾਨ ਕੀਤਾ ਹੈ। ਸੰਯੁਕਤ ਰਾਜ ਕੈਨੇਡਾ ਅਤੇ ਮੈਕਸੀਕੋ ਸਾਂਝੇ ਤੌਰ ‘ਤੇ ਫੀਫਾ 2026 ਵਰਲਡ ਕੱਪ ਦੀ ਮੇਜ਼ਬਾਨੀ ਕਰਨਗੇ। ਇਹ ਪਹਿਲੀ ਵਾਰ ਹੋਵੇਗਾ ਜਦੋਂ ਟੂਰਨਾਮੈਂਟ ‘ਚ 48 ਟੀਮਾਂ ਹਿੱਸਾ ਲੈਣਗੀਆਂ। ਫੈਸਲੇ ਦਾ ਐਲਾਨ ਕਰਦਿਆਂ ਫੀਫਾ ਨੇ ਇਕ ਬਿਆਨ ‘ਚ ਕਿਹਾ ਕਿ ਕਈ ਪਹਿਲੂਆਂ ਨੂੰ ਧਿਆਨ ‘ਚ ਰੱਖਦਿਆਂ ਫੀਫਾ ਕੌਂਸਲ ਨੇ 2026 ਐਡੀਸ਼ਨ ਲਈ ਚਾਰ ਟੀਮਾਂ ਦੇ 12 ਸਮੂਹ ਬਣਾਉਣ ਲਈ ਇਕ ਸੋਧਿਆ ਪ੍ਰਸਤਾਵ ਰੱਖਿਆ ਹੈ। ਇਸ ਤੋਂ ਪਹਿਲਾਂ ਤਿੰਨ ਟੀਮਾਂ ਦੇ 16 ਗਰੁੱਪ ਬਣਾਏ ਗਏ ਸਨ। ਚੋਟੀ ਦੀਆਂ ਦੋ ਟੀਮਾਂ ਅਤੇ ਅੱਠ ਸਰਵੋਤਮ ਤੀਜੇ ਸਥਾਨ ‘ਤੇ ਰਹਿਣ ਵਾਲੀਆਂ ਟੀਮਾਂ ਰਾਊਂਡ ਆਫ 32 ‘ਚ ਪਹੁੰਚਣਗੀਆਂ। ਫੀਫਾ ਨੇ ਆਪਣੇ ਬਿਆਨ ‘ਚ ਕਿਹਾ ਕਿ ਖੇਡ ਦੀ ਅਸਧਾਰਨਤਾ, ਖਿਡਾਰੀਆਂ ਦੀ ਭਲਾਈ, ਟੀਮ ਯਾਤਰਾ, ਵਪਾਰਕ ਅਤੇ ਖੇਡ ਆਕਰਸ਼ਕਤਾ ਅਤੇ ਟੀਮ ਅਤੇ ਪ੍ਰਸ਼ੰਸਕਾਂ ਦੇ ਅਨੁਭਵ ਦੀ ਸਮੀਖਿਆ ਦੇ ਆਧਾਰ ‘ਤੇ ਫੀਫਾ ਕੌਂਸਲ ਨੇ ਸਰਬਸੰਮਤੀ ਨਾਲ ਇਕ ਸੋਧੇ ਪ੍ਰਸਤਾਵ ਨੂੰ ਮਨਜ਼ੂਰੀ ਦਿੱਤੀ ਕਿ ਫੀਫਾ ਵਰਲਡ ਕੱਪ 2026 ਦੇ ਮੁਕਾਬਲੇ ਦਾ ਫਾਰਮੈਟ ‘ਚ ਤਿੰਨ ਟੀਮਾਂ ਦੇ 16 ਗਰੁੱਪਾਂ ਦੀ ਬਜਾਏ ਚਾਰ ਟੀਮਾਂ ਦੇ 12 ਗਰੁੱਪ ਹੋਣਗੇ। ਚੋਟੀ ਦੀਆਂ ਦੋ ਟੀਮਾਂ ਅਤੇ ਅੱਠ ਸਰਬੋਤਮ ਤੀਜੇ ਸਥਾਨ ‘ਤੇ ਰਹਿਣ ਵਾਲੀਆਂ ਟੀਮਾਂ ਰਾਊਂਡ ਆਫ 32 ‘ਚ ਦਾਖ਼ਲ ਹੋਣਗੀਆਂ। ਯਾਦ ਰਹੇ ਕਿ ਪਿਛਲੇ ਸਾਲ ਫੀਫਾ ਵਰਲਡ ਕੱਪ ਕਤਰ ‘ਚ ਹੋਇਆ ਸੀ ਜਿਸ ਵਿਚ 32 ਟੀਮਾਂ ਨੇ ਭਾਗ ਲਿਆ ਸੀ ਅਤੇ 29 ਦਿਨਾਂ ‘ਚ ਕੁੱਲ 64 ਮੈਚ ਖੇਡੇ ਗਏ ਸਨ। ਧਿਆਨ ਰਹੇ ਕਿ ਜਦੋਂ ਆਖ਼ਰੀ ਵਾਰ ਅਮਰੀਕਾ ਅਤੇ ਮੈਕਸੀਕੋ ਨੇ ਫੀਫਾ ਵਰਲਡ ਕੱਪ ਦੀ ਮੇਜ਼ਬਾਨੀ ਕੀਤੀ ਸੀ, ਉਦੋਂ ਸਿਰਫ 24 ਟੀਮਾਂ ਨੇ ਹਿੱਸਾ ਲਿਆ ਸੀ। 1998 ਦੇ ਵਰਲਡ ਕੱਪ ਤੋਂ ਬਾਅਦ ਵਰਲਡ ਕੱਪ ‘ਚ 32 ਟੀਮਾਂ ਹਿੱਸਾ ਲੈ ਰਹੀਆਂ ਹਨ। ਚਾਰ ਟੀਮਾਂ ਦੇ ਅੱਠ ਗਰੁੱਪ ਹਨ ਅਤੇ ਫਾਈਨਲਿਸਟ ਕੁੱਲ ਸੱਤ ਮੈਚ ਖੇਡਦੇ ਹਨ। ਫਾਈਨਲਿਸਟ ਟੀਮਾਂ ਨੂੰ 2026 ਵਰਲਡ ਕੱਪ ‘ਚ ਕੁੱਲ ਅੱਠ ਮੈਚ ਖੇਡਣ ਦਾ ਮੌਕਾ ਮਿਲੇਗਾ।
