ਸੰਨਿਆਸ ਲੈ ਚੁੱਕੇ ਬ੍ਰਿਟੇਨ ਦੇ ਮੁੱਕੇਬਾਜ਼ ਆਮਿਰ ਖਾਨ ‘ਤੇ ਕਰੀਅਰ ਦੇ ਆਖਰੀ ਮੁਕਾਬਲੇ ਮਗਰੋਂ ਪਾਬੰਦੀਸ਼ੁਦਾ ਦਵਾਈ ਲੈਣ ਲਈ ਪਾਜ਼ੇਟਿਵ ਪਾਏ ਜਾਣ ‘ਤੇ ਦੋ ਸਾਲਾਂ ਦੀ ਪਾਬੰਦੀ ਲਾਈ ਗਈ ਹੈ। ਸਾਬਕਾ ਲਾਈਟ ਵੈਲਟਰਵੇਟ ਵਿਸ਼ਵ ਚੈਂਪੀਅਨ ਅਤੇ ਓਲੰਪਿਕ ਖੇਡਾਂ ‘ਚ ਚਾਂਦੀ ਦਾ ਤਗ਼ਮਾ ਜੇਤੂ ਆਮਿਰ ਖ਼ਾਨ ਫਰਵਰੀ 2022 ‘ਚ ਮਾਨਚੈਸਟਰ ‘ਚ ਕੈਲ ਬਰੁੱਕ ਵਿਰੁੱਧ ਮੁਕਾਬਲੇ ‘ਚ ਹਾਰ ਤੋਂ ਬਾਅਦ ਓਸਟਰਾਈਨ ਲਈ ਪਾਜ਼ੇਟਿਵ ਪਾਇਆ ਗਿਆ ਸੀ ਜੋ ਐਨਾਬੌਲਿਕ ਏਜੰਟ ਹੈ। ਬਰਤਾਨੀਆ ਦੀ ਡੋਪਿੰਗ ਰੋਕੂ ਸੰਸਥਾ ਨੇ ਇਹ ਜਾਣਕਾਰੀ ਦਿੱਤੀ। ਦੱਸਣਯੋਗ ਹੈ ਕਿ ‘ਓਸਟਰਾਈਨ’ ਇਕ ਸਿਲੈਕਟਿਵ ਐਂਡਰੋਜੈਨ ਰਿਸੈਪਟਰ ਮੌਡਿਊਲੇਟਰ ਹੈ ਜਿਹੜਾ ਮਾਸਪੇਸ਼ੀਆਂ ਬਣਾਉਣ ‘ਚ ਮਦਦ ਕਰਦਾ ਹੈ। ਬਰੁੱਕ ਖ਼ਿਲਾਫ਼ ਮੁਕਾਬਲੇ ਤੋਂ ਤਿੰਨ ਮਹੀਨੇ ਬਾਅਦ ਸੰਨਿਆਸ ਦਾ ਐਲਾਨ ਕਰਨ ਵਾਲੇ ਆਮਿਰ ਨੇ ਡੋਪਿੰਗ ਰੋਕੂ ਨਿਯਮਾਂ ਦੀ ਉਲੰਘਣਾ ਸਵੀਕਾਰ ਕੀਤੀ ਸੀ ਪਰ ਉਸ ਨੇ ਕਿਹਾ ਸੀ ਕਿ ਉਸ ਨੇ ਜਾਣਬੁੱਝ ਕੇ ਇਹ ਦਵਾਈ ਨਹੀਂ ਖਾਧੀ। ਆਮਿਰ ਦੇ ਇਸ ਦਾਅਵੇ ਨੂੰ ਜਨਵਰੀ ‘ਚ ਸੁਣਵਾਈ ਤੋਂ ਬਾਅਦ ਸੁਤੰਤਰ ਪੈਨਲ ਨੇ ਮਨਜ਼ੂਰ ਕੀਤਾ ਸੀ। ਉਸ ‘ਤੇ ਪਾਬੰਦੀ 5 ਅਪ੍ਰੈਲ 2024 ਨੂੰ ਖਤਮ ਹੋਵੇਗੀ।
