ਅਮਰੀਕਾ ‘ਚ ਇਕ ਭਾਰਤੀ ਦਵਾਈ ਕੰਪਨੀ ਦੀ ਅੱਖਾਂ ‘ਚ ਪਾਉਣ ਵਾਲੀ ਦਵਾਈ ਨੇ ਤਰਥੱਲੀ ਮਚਾ ਦਿੱਤੀ ਹੈ ਅਤੇ ਵੱਡਾ ਵਿਵਾਦ ਖੜ੍ਹਾ ਹੋ ਗਿਆ ਹੈ। ਅਸਲ ‘ਚ ਭਾਰਤੀ ਕੰਪਨੀ ਦੇ ‘ਡਾਈ ਡਰਾਪ’ ਕਾਰਨ 8 ਲੋਕਾਂ ਦੀ ਅੱਖਾਂ ਦੀ ਰੋਸ਼ਨੀ ਜਾਂਦੀ ਰਹੀ, ਜਦਕਿ ਤਿੰਨ ਦੀ ਇਸ ਕਾਰਨ ਮੌਤ ਵੀ ਹੋ ਗਈ ਹੈ। ਇਸ ਬਾਰੇ ਜਾਰੀ ਇਕ ਰਿਪੋਰਟ ਮੁਤਾਬਕ 3 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ ਤੇ 8 ਨੂੰ ਇਸ ਦੀ ਵਰਤੋਂ ਕਾਰਨ ਆਪਣੀ ਰੋਸ਼ਨੀ ਗੁਆਉਣੀ ਪਈ ਹੈ। ਅਮਰੀਕਾ ਦੇ ਟਾਪ ਮੈਡੀਕਲ ਵਾਚਡੌਗ ਨੇ ਇਸ ਆਈ ਡਰਾਪ ‘ਚ ਡਰੱਗ-ਰੋਧਕ ਬੈਕਟੀਰੀਆ ਦੀ ਸੰਭਾਵਨਾ ਜ਼ਾਹਰ ਕੀਤੀ ਹੈ। ਮੀਡੀਆ ਰਿਪੋਰਟਾਂ ਮੁਤਾਬਕ ਇਸ ਦੀ ਵਰਤੋਂ ਨਾਲ ਇਨਫੈਕਸ਼ਨ ਦੇ ਦਰਜਨਾਂ ਮਾਮਲੇ ਵੀ ਸਾਹਮਣੇ ਆ ਚੁੱਕੇ ਹਨ। ਇਹ ਦਵਾਈ ਚੇਨਈ-ਅਧਾਰਤ ਗਲੋਬਲ ਫਾਰਮਾ ਹੈਲਥਕੇਅਰ ਦੁਆਰਾ ਅਜ਼ਰੀਕੇਅਰ ਆਰਟੀਫਿਸ਼ੀਅਲ ਟੀਅਰਸ ਬ੍ਰਾਂਡ ਨਾਮ ਤਹਿਤ ਬਣਾਈ ਗਈ ਹੈ। ਸੀ.ਡੀ.ਸੀ. ਨੇ ਚਿੰਤਾ ਜ਼ਾਹਰ ਕੀਤੀ ਹੈ ਕਿ ਇੰਡੀਆ ਤੋਂ ਦਰਾਮਦ ਕੀਤੀਆਂ ਆਈ ਡਰੋਪਸ ‘ਚ ਪਾਇਆ ਜਾਣ ਵਾਲਾ ਇਹ ਡਰੱਗ-ਰੋਧਕ ਬੈਕਟੀਰੀਆ ਅਮਰੀਕਾ ‘ਚ ਪੈਰ ਜਮਾ ਸਕਦਾ ਹੈ। ਛੂਤ ਦੀਆਂ ਬਿਮਾਰੀਆਂ ਦੇ ਮਾਹਿਰਾਂ ਦਾ ਕਹਿਣਾ ਹੈ ਕਿ ਇਹ ਸਟ੍ਰੇਨ ਅਮਰੀਕਾ ‘ਚ ਇਸ ਤੋਂ ਪਹਿਲਾਂ ਨਹੀਂ ਮਿਲਿਆ ਹੈ। ਅਜਿਹੇ ‘ਚ ਦੇਸ਼ ਕੋਲ ਮੌਜੂਦ ਐਂਟੀਬਾਇਓਟਿਕਸ ਨਾਲ ਇਸ ਦਾ ਇਲਾਜ ਕਰਨਾ ਮੁਸ਼ਕਿਲ ਹੈ। ਜ਼ਿਕਰਯੋਗ ਹੈ ਕਿ ਗਲੋਬਲ ਫਾਰਮਾ ਹੈਲਥਕੇਅਰ ਚੇਨਈ ਤੋਂ ਲਗਪਗ 40 ਕਿਲੋਮੀਟਰ ਦੱਖਣ ‘ਚ ਸਥਿਤ ਹੈ। ਇਸ ਨੇ ਫਰਵਰੀ ‘ਚ ਹੀ ਅਮਰੀਕਨ ਬਾਜ਼ਾਰ ਲਈ ਆਈ ਡਰਾਪ ਦਾ ਉਤਪਾਦਨ ਬੰਦ ਕਰ ਦਿੱਤਾ ਸੀ। ਨਾਲ ਹੀ ਗਾਹਕ ਪੱਧਰ ‘ਤੇ ਅਜ਼ਰੀਕੇਅਰ ਆਰਟੀਫਿਸ਼ੀਅਲ ਟੀਅਰਸ ਤੇ ਡੇਲਸਮ ਫਾਰਮਾ ਆਰਟੀਫੀਸ਼ੀਅਲ ਟੀਅਰਸ ਦੇ ਸਾਰੇ ਬਚੇ ਹੋਏ ਲਾਟ ਨੂੰ ਵੀ ਵਾਪਸ ਲੈ ਲਿਆ ਗਿਆ।
