ਅਮਰੀਕਾ ਦੇ ਮੈਸੇਚਿਊਸੇਟਸ ਸੂਬੇ ‘ਚ ਅਯਰ ਜ਼ਿਲ੍ਹਾ ਅਦਾਲਤ ‘ਚ ਭਾਰਤੀ ਮੂਲ ਦੀ ਤੇਜਲ ਮਹਿਤਾ ਨੇ ਪਹਿਲੇ ਜੱਜ ਵਜੋਂ ਸਹੁੰ ਚੁੱਕੀ ਹੈ। ਤੇਜਲ ਨੇ ਇਸ ਅਦਾਲਤ ‘ਚ ਪਹਿਲਾਂ ਸਹਾਇਕ ਜੱਜ ਵਜੋਂ ਸੇਵਾ ਨਿਭਾਈ ਸੀ। ਤੇਜਲ ਨੂੰ ਸਰਬਸੰਮਤੀ ਨਾਲ ਜੱਜ ਚੁਣਿਆ ਗਿਆ ਅਤੇ ਜ਼ਿਲ੍ਹਾ ਅਦਾਲਤ ਦੇ ਚੀਫ਼ ਜਸਟਿਸ ਸਟੈਸੀ ਫੋਰਟਸ ਨੇ ਉਸ ਨੂੰ ਸਹੁੰ ਚੁਕਾਈ। ਫੋਰਟਸ ਨੇ ਕਿਹਾ ਕਿ ‘ਮੈਨੂੰ ਭਰੋਸਾ ਹੈ ਕਿ ਉਸਦੀ ਅਗਵਾਈ ‘ਚ ਅਯਰ ਜ਼ਿਲ੍ਹਾ ਅਦਾਲਤ ਲਈ ਸਭ ਤੋਂ ਵਧੀਆ ਪ੍ਰਦਰਸ਼ਨ ਕਰੇਗੀ। ਇਕ ਖ਼ਬਰ ‘ਚ ਤੇਜਲ ਦੇ ਹਵਾਲੇ ਨਾਲ ਕਿਹਾ ਗਿਆ ਕਿ ‘ਇਕ ਵਕੀਲ ਦੇ ਤੌਰ ‘ਤੇ ਤੁਸੀਂ ਲੋਕਾਂ ਦੀ ਮਦਦ ਕਰ ਸਕਦੇ ਹੋ। ਹਾਲਾਂਕਿ, ਇਸ ਦੀ ਇਕ ਸੀਮਾ ਹੈ। ਇਕ ਜੱਜ ਵਜੋਂ ਤੁਸੀਂ ਬਹੁਤ ਕੁਝ ਕਰ ਸਕਦੇ ਹੋ ਅਤੇ ਮੁੱਦਿਆਂ ਦੀ ਤਹਿ ਤੱਕ ਜਾ ਸਕਦੇ ਹੋ।’ ਤੇਜਲ ਨੇ ਕਿਹਾ ਕਿ ਉਸਦਾ ਟੀਚਾ ਉਸ ਭਾਈਚਾਰੇ ‘ਤੇ ਸਕਾਰਾਤਮਕ ਪ੍ਰਭਾਵ ਪਾਉਣਾ ਹੈ ਜਿਸ ਨਾਲ ਉਹ ਵੱਡੀ ਹੋਈ ਹੈ। ਉਸ ਨੇ ਹਰ ਉਸ ਅਦਾਲਤ ਦੇ ਕਮਰੇ ‘ਚ ਉਹੀ ਉਮੀਦ ਅਤੇ ਨਿਰਾਸ਼ਾ ਦੇਖੀ ਹੈ ਜਿਸ ‘ਚ ਉਹ ਇਕ ਟ੍ਰੈਵਲਿੰਗ ਜੱਜ ਵਜੋਂ ਬੈਠੀ ਹੈ। ਪਰ ਜਦੋਂ ਤੁਸੀਂ ਜੱਜ ਹੁੰਦੇ ਹੋ ਤਾਂ ਤੁਸੀਂ ਸੱਚਮੁੱਚ ਭਾਈਚਾਰੇ ਨੂੰ ਜਾਣ ਸਕਦੇ ਹੋ ਅਤੇ ਅਸਲ ਪ੍ਰਭਾਵ ਪਾ ਸਕਦੇ ਹੋ। ਤੇਜਲ ਦੇ ਪਿਤਾ ਇਕ ਕੈਮਿਸਟ ਸਨ ਅਤੇ ਉਸਦੀ ਮਾਂ ਇਕ ਹਸਪਤਾਲ ‘ਚ ਕੰਮ ਕਰਦੀ ਸੀ। ਤੇਜਲ ਨੇ 1997 ‘ਚ ਨੋਟਰ ਡੈਮ ਯੂਨੀਵਰਸਿਟੀ ਤੋਂ ਅੰਗਰੇਜ਼ੀ ‘ਚ ਬੈਚਲਰ ਦੀ ਡਿਗਰੀ ਹਾਸਲ ਕੀਤੀ। ਫਿਰ ਉਸਨੇ ਬੋਸਟਨ ਯੂਨੀਵਰਸਿਟੀ ਸਕੂਲ ਆਫ ਲਾਅ ਤੋਂ ਸਾਲ 2000 ‘ਚ ਆਪਣੀ ਜੇਡੀ ਪੂਰੀ ਕੀਤੀ। ਲਾਅ ਸਕੂਲ ਤੋਂ ਗ੍ਰੈਜੂਏਟ ਹੋਣ ਤੋਂ ਬਾਅਦ ਤੇਜਲ ਨੇ ਸੁਫੋਲਕ ਕਾਉਂਟੀ ਸੁਪੀਰੀਅਰ ਕੋਰਟ ‘ਚ ਇਕ ਸਹਾਇਕ ਕਲਰਕ ਵਜੋਂ ਆਪਣੇ ਕਾਨੂੰਨੀ ਕੈਰੀਅਰ ਦੀ ਸ਼ੁਰੂਆਤ ਕੀਤੀ। ਇਸ ਤੋਂ ਬਾਅਦ ਉਸ ਨੇ ਪ੍ਰਾਈਵੇਟ ਪ੍ਰੈਕਟਿਸ ਕਰਨੀ ਸ਼ੁਰੂ ਕਰ ਦਿੱਤੀ। 2005 ‘ਚ ਭਾਰਤੀ-ਅਮਰੀਕਨ ਜੱਜ ਮਿਡਲਸੈਕਸ ਕਾਉਂਟੀ ਜ਼ਿਲ੍ਹਾ ਅਟਾਰਨੀ ਦੇ ਦਫ਼ਤਰ ‘ਚ ਸਹਾਇਕ ਜ਼ਿਲ੍ਹਾ ਅਟਾਰਨੀ ਵਜੋਂ ਸ਼ਾਮਲ ਹੋਈ ਅਤੇ 2016 ਤੱਕ ਕੰਮ ਕੀਤਾ। ਇਸ ਤੋਂ ਬਾਅਦ ਉਸ ਨੇ ਆਪਣੀ ਪ੍ਰਾਈਵੇਟ ਪ੍ਰੈਕਟਿਸ ਸ਼ੁਰੂ ਕਰ ਦਿੱਤੀ। ਤੇਜਲ ਮਹਿਤਾ ਮੈਸੇਚਿਉਸੇਟਸ ਬਾਰ ਐਸੋਸੀਏਸ਼ਨ ਅਤੇ ਸਾਊਥ ਏਸ਼ੀਅਨ ਬਾਰ ਐਸੋਸੀਏਸ਼ਨ ‘ਚ ਮੈਂਬਰਸ਼ਿਪ ਰੱਖਦੀ ਹੈ। ਉਹ ਬਾਰ ਓਵਰਸੀਅਰਜ਼ ਦੇ ਬੋਰਡ ਦੇ ਨਾਲ-ਨਾਲ ਬੈੱਡਫੋਰਡ ਮੋਂਟੇਸਰੀ ਸਕੂਲ ਦੇ ਕਾਰਜਕਾਰੀ ਬੋਰਡ ‘ਚ ਵੀ ਹੈ।
