ਮਿਆਮੀ ਓਪਨ ਟੈਨਿਸ ਦੇ ਫਾਈਨਲ ‘ਚ ਡੇਨੀਅਲ ਮੈਦਵੇਦੇਵ ਨੇ ਜਾਨਿਕ ਸਿਨਰ ਨੂੰ 7-5, 6-3 ਨਾਲ ਹਰਾ ਕੇ ਸਾਲ ਦਾ ਆਪਣਾ ਚੌਥਾ ਏ.ਟੀ.ਪੀ. ਖਿਤਾਬ ਜਿੱਤਿਆ। ਮੈਦਵੇਦੇਵ ਦੀ ਸਿਨਰ ਖ਼ਿਲਾਫ਼ ਖੇਡੇ ਛੇ ਮੈਚਾਂ ‘ਚ ਲਗਾਤਾਰ ਇਹ ਛੇਵੀਂ ਜਿੱਤ ਹੈ ਅਤੇ ਇਸ ਸਾਲ ਹੁਣ ਤੱਕ ਖੇਡੇ ਗਏ ਆਪਣੇ 25 ਮੁਕਾਬਲਿਆਂ ਵਿੱਚੋਂ ਉਸ ਨੇ 24 ਮੁਕਾਬਲੇ ਜਿੱਤੇ ਹਨ। ਇਸ ਦੌਰਾਨ ਉਸ ਨੂੰ ਇੰਡੀਅਨ ਵੇਲਜ਼ ਫਾਈਨਲ ‘ਚ ਸਿਖਰਲੇ ਦਰਜੇ ਦੇ ਖਿਡਾਰੀ ਕਾਰਲਸ ਅਲਕਾਰਜ ਤੋਂ ਇਕਲੌਤੀ ਹਾਰ ਦਾ ਸਾਹਮਣਾ ਕਰਨਾ ਪਿਆ ਸੀ। ਸਿਨਰ ਨੇ ਇਕ ਘੰਟੇ 34 ਮਿੰਟ ਤੱਕ ਚੱਲੇ ਮੁਕਾਬਲੇ ਦੇ ਸ਼ੁਰੂਆਤੀ ਸੈੱਟ ‘ਚ ਮੇਦਵੇਦੇਵ ਨੂੰ ਸਖ਼ਤ ਟੱਕਰ ਦਿੱਤੀ ਪਰ ਰੂਸ ਦੇ ਖਿਡਾਰੀ ਨੇ ਦੂਜੇ ਸੈੱਟ ‘ਚ ਉਸ ਨੂੰ ਕੋਈ ਮੌਕਾ ਨਹੀਂ ਦਿੱਤਾ। ਇਸ ਸਾਲ ਦਾ ਪੰਜਵਾਂ ਖਿਤਾਬੀ ਮੁਕਾਬਲਾ ਖੇਡਣ ਵਾਲਾ ਮੈਦਵੇਦੇਵ ਇਸ ਤੋਂ ਪਹਿਲਾਂ ਰਾਟਰਡੈਮ, ਦੋਹਾ ਅਤੇ ਦੁਬਈ ਵਿੱਚ ਚੈਂਪੀਅਨ ਬਣਿਆ ਹੈ। ਮਹਿਲਾ ਡਬਲਜ਼ ਦੇ ਫਾਈਨਲ ‘ਚ ਕੋਕੋ ਗਾਫ਼ ਅਤੇ ਜੈਸਿਕਾ ਪੇਗੁਲਾ ਦੀ ਜੋੜੀ ਨੇ ਲੇਯਲਾ ਫਰਨਾਂਡੇਜ਼ ਅਤੇ ਟੇਲਰ ਟਾਊਨਸੈਂਡ ਨੂੰ 7-6, 6-2 ਨਾਲ ਹਰਾਇਆ।
