ਇੰਡੀਆ ਦੀ ਸਟਾਰ ਬੈਡਮਿੰਟਨ ਖਿਡਾਰਨ ਪੀ.ਵੀ. ਸਿੰਧੂ ਇਥੇ ਮੈਡਰਿਡ ਸਪੇਨ ਮਾਸਟਰਜ਼ ਸੁਪਰ 300 ਬੈਡਮਿੰਟਨ ਟੂਰਨਾਮੈਂਟ ਦੇ ਫਾਈਨਲ ‘ਚ ਇੰਡੋਨੇਸ਼ੀਆ ਦੀ ਗਰੇਗੋਰੀਆ ਮਾਰਿਸਕਾ ਤੁਨਜੁੰਗ ਤੋਂ ਸਿੱਧੀ ਗੇਮ ‘ਚ ਹਾਰ ਗਈ। ਸੱਟ ਲੱਗਣ ਕਾਰਨ ਪੰਜ ਮਹੀਨੇ ਬਾਹਰ ਰਹਿਣ ਮਗਰੋਂ ਸਿੰਧੂ ਨੇ ਬੈਡਮਿੰਟਨ ‘ਚ ਵਾਪਸੀ ਕੀਤੀ ਹੈ ਅਤੇ ਮੌਜੂਦਾ ਗੇਮ ਦੇ ਸ਼ੁਰੂਆਤੀ ਦੌਰ ‘ਚ ਅੱਗੇ ਵਧਣ ‘ਚ ਨਾਕਾਮ ਰਹਿਣ ਕਾਰਨ ਉਹ ਇੰਡੋਨੇਸ਼ੀਆ ਦੀ ਗਰੇਗੋਰੀਆ ਤੁਨਜੁੰਗ ਤੋਂ 8-21, 8-21 ਦੇ ਫਰਕ ਨਾਲ ਹਾਰ ਗਈ। ਇਸ ਫਾਈਨਲ ਤੋਂ ਪਹਿਲਾਂ ਸਿੰਧੂ ਦਾ ਇੰਡੋਨੇਸ਼ੀਆ ਦੀ ਇਸ 23 ਵਰ੍ਹਿਆਂ ਦੀ ਖਿਡਾਰਨ ਖ਼ਿਲਾਫ਼ 7-0 ਦਾ ਰਿਕਾਰਡ ਸੀ ਪਰ ਉਹ ਫਾਈਨਲ ‘ਚ ਦਬਾਅ ਬਣਾਉਣ ‘ਚ ਅਸਫਲ ਰਹੀ। ਇਸ ਤਰ੍ਹਾਂ ਬੀਤੇ ਅੱਠ ਮਹੀਨਿਆਂ ‘ਚ ਸਿੰਧੂ ਕੋਈ ਵੀ ਖ਼ਿਤਾਬੀ ਜਿੱਤ ਹਾਸਲ ਨਹੀਂ ਕਰ ਸਕੀ ਹੈ। ਸਾਬਕਾ ਵਿਸ਼ਵ ਚੈਂਪੀਅਨ ਸਿੰਧੂ ਨੇ ਆਪਣਾ ਆਖ਼ਰੀ ਖ਼ਿਤਾਬ ਅਗਸਤ 2022 ‘ਚ ਬਰਮਿੰਘਮ ‘ਚ ਰਾਸ਼ਟਰਮੰਡਲ ਖੇਡਾਂ ਦੌਰਾਨ ਜਿੱਤਿਆ ਸੀ।
