ਭਾਰਤੀ ਹਾਕੀ ਟੀਮ ਨੂੰ ਐਤਵਾਰ ਨੂੰ ਨਿਊਜ਼ੀਲੈਂਡ ਖ਼ਿਲਾਫ਼ ਹੋਣ ਵਾਲੇ ਕਰਾਸਓਵਰ ਮੈਚ ਤੋਂ ਪਹਿਲਾਂ ਵੱਡਾ ਝਟਕਾ ਲੱਗਾ ਹੈ। ਜ਼ਖ਼ਮੀ ਮਿਡਫੀਲਡਰ ਹਾਰਦਿਕ ਸਿੰਘ ਸ਼ਨੀਵਾਰ ਨੂੰ ਐੱਫ.ਆਈ.ਐੱਚ. ਪੁਰਸ਼ ਹਾਕੀ ਵਰਲਡ ਕੱਪ ਦੇ ਬਾਕੀ ਮੈਚਾਂ ਤੋਂ ਬਾਹਰ ਹੋ ਗਏ। 24 ਸਾਲਾ ਹਾਰਦਿਕ 15 ਜਨਵਰੀ ਨੂੰ ਇੰਗਲੈਂਡ ਵਿਰੁੱਧ ਇੰਡੀਆ ਦੇ ਦੂਜੇ ਪੂਲ ਮੈਚ ਦੇ ਅਖੀਰ ‘ਚ ਹੈਮਸਟ੍ਰਿੰਗ ਦੀ ਸੱਟ ਤੋਂ ਉਭਰਨ ‘ਚ ਅਸਫਲ ਰਹੇ। ਟੂਰਨਾਮੈਂਟ ਦੇ ਸ਼ੁਰੂਆਤੀ ਮੈਚ ‘ਚ ਸਪੇਨ ‘ਤੇ ਇੰਡੀਆ ਦੀ 2-0 ਦੀ ਜਿੱਤ ‘ਚ ਹਾਰਦਿਕ ਸਿੰਘ ਨੇ ਇਕ ਸ਼ਾਨਦਾਰ ਗੋਲ ਕੀਤਾ ਸੀ। ਹਾਰਦਿਕ ਦੀ ਥਾਂ ਬਦਲਵੇਂ ਖਿਡਾਰੀ ਰਾਜ ਕੁਮਾਰ ਪਾਲ ਨੂੰ ਟੀਮ ‘ਚ ਸ਼ਾਮਲ ਕੀਤਾ ਜਾਵੇਗਾ। ਹਾਰਦਿਕ ਵੇਲਜ਼ ਖਿਲਾਫ ਨਹੀਂ ਖੇਡੇ ਸਨ। ਹਾਕੀ ਇੰਡੀਆ ਨੇ ਇਕ ਬਿਆਨ ‘ਚ ਕਿਹਾ, ‘ਵੇਲਜ਼ ਖਿਲਾਫ ਮੈਚ ਅਤੇ ਉਸ ਤੋਂ ਬਾਅਦ ਦੇ ਮੁਲਾਂਕਣ ਲਈ ਨੌਜਵਾਨ ਖਿਡਾਰੀ ਨੂੰ ਆਰਾਮ ਦੇਣ ਤੋਂ ਬਾਅਦ ਹਾਰਦਿਕ ਹੁਣ ਹਾਕੀ ਪੁਰਸ਼ ਵਰਲਡ ਕੱਪ 2023 ਭੁਵਨੇਸ਼ਵਰ-ਰਾਉਰਕੇਲਾ ਤੋਂ ਬਾਹਰ ਹੋ ਗਏ ਹਨ।’ ਟੀਮ ਪ੍ਰਬੰਧਨ ਵੱਲੋਂ ਲਏ ਗਏ ਫੈਸਲੇ ਬਾਰੇ ਗੱਲਬਾਤ ਕਰਦੇ ਹੋਏ ਮੁੱਖ ਕੋਚ ਗ੍ਰਾਹਮ ਰੀਡ ਨੇ ਕਿਹਾ, ‘ਸਾਨੂੰ ਐਤਵਾਰ ਨੂੰ ਨਿਊਜ਼ੀਲੈਂਡ ਤੇ ਉਸ ਤੋਂ ਬਾਅਦ ਦੇ ਵਰਲਡ ਕੱਪ ਮੈਚਾਂ ਲਈ ਹਾਰਦਿਕ ਸਿੰਘ ਨੂੰ ਭਾਰਤੀ ਟੀਮ ‘ਚ ਸ਼ਾਮਲ ਕਰਨ ਲਈ ਇਕ ਮੁਸ਼ਕਿਲ ਫੈਸਲਾ ਲੈਣਾ ਪਿਆ। ਹਾਲਾਂਕਿ ਸੱਟ ਇੰਨੀ ਗੰਭੀਰ ਨਹੀਂ ਸੀ, ਸਮਾਂ ਸਾਡੇ ਨਾਲ ਨਹੀਂ ਸੀ ਤੇ ਸਾਡੀ ਪੂਰੀ ਤਰ੍ਹਾਂ ਚੱਲ ਰਹੀ ਰਿਹੈਬਿਲਿਟੇਸ਼ਨ ਪ੍ਰਕਿਰਿਆ ਤੇ ਕਾਰਜਸ਼ੀਲ ਅਤੇ ਆਨ-ਫੀਲਡ ਮੁਲਾਂਕਣ ਤੋਂ ਬਾਅਦ, ਇਹ ਫ਼ੈਸਲਾ ਲਿਆ ਗਿਆ ਹੈ ਕਿ ਅਸੀਂ ਹਾਰਦਿਕ ਦੀ ਜਗ੍ਹਾ ਰਾਜ ਕੁਮਾਰ ਪਾਲ ਨੂੰ ਲਵਾਂਗੇ।’
