ਮਾਲ ਵਿਚਲੇ ‘ਫੂਡ ਕੋਰਟ’ ਵਿਖੇ ਫਾਇਰਿੰਗ ’ਚ 4 ਲੋਕਾਂ ਦੀ ਮੌਤ, 2 ਜ਼ਖਮੀ

ਅਮਰੀਕਾ ਦੇ ਇੰਡੀਆਨਾ ਮਾਲ ’ਚ ਐਤਵਾਰ ਸ਼ਾਮ ਨੂੰ ‘ਫੂਡ ਕੋਰਟ’ ਵਿੱਚ ਇਕ ਵਿਅਕਤੀ ਨੇ ਰਾਈਫਲ ਨਾਲ ਫਾਇਰਿੰਗ ਕੀਤੀ ਜਿਸ ’ਚ 4 ਲੋਕਾਂ ਦੀ ਮੌਤ ਹੋ ਗਈ ਅਤੇ 2 ਹੋਰ ਜ਼ਖ਼ਮੀ ਹੋ ਗਏ। ਪੁਲੀਸ ਨੇ ਇਹ ਜਾਣਕਾਰੀ ਦਿੱਤੀ। ਗ੍ਰੀਨਵੁੱਡ ਪੁਲੀਸ ਵਿਭਾਗ ਦੇ ਮੁਖੀ ਜਿਮ ਇਸਨ ਨੇ ਕਿਹਾ ਕਿ ਇਕ ਵਿਅਕਤੀ ਰਾਈਫਲ ਨਾਲ ਗ੍ਰੀਨਵੁੱਡ ਪਾਰਕ ਮਾਲ ’ਚ ਦਾਖ਼ਲ ਹੋਇਆ ਅਤੇ ਉਸ ਨੇ ਫੂਡ ਕੋਰਟ ’ਚ ਗੋਲੀਬਾਰੀ ਸ਼ੁਰੂ ਕਰ ਦਿੱਤੀ। ਇਸਨ ਨੇ ਪੱਤਰਕਾਰਾਂ ਨੂੰ ਦੱਸਿਆ ਕਿ ਇਕ ਹਥਿਆਰਬੰਦ ਨਾਗਰਿਕ ਨੇ ਸ਼ੱਕੀ ਨੂੰ ਮਾਰ ਦਿੱਤਾ। ਉਨ੍ਹਾਂ ਦੱਸਿਆ ਕਿ ਕੁੱਲ 4 ਲੋਕਾਂ ਦੀ ਮੌਤ ਹੋ ਗਈ ਅਤੇ 2 ਜ਼ਖ਼ਮੀ ਹੋ ਗਏ। ਗੋਲੀਬਾਰੀ ਦੀ ਸੂਚਨਾ ਮਿਲਣ ’ਤੇ ਅਧਿਕਾਰੀ ਸ਼ਾਮ ਕਰੀਬ 6 ਵਜੇ ਮਾਲ ਪੁੱਜੇ। ਅਧਿਕਾਰੀ ਮਾਲ ’ਚ ਹੋਰ ਪੀਡ਼ਤਾਂ ਦੀ ਭਾਲ ਕਰ ਰਹੇ ਹਨ ਹਾਲਾਂਕਿ ਉਨ੍ਹਾਂ ਦਾ ਮੰਨਣਾ ਹੈ ਕਿ ਗੋਲੀਬਾਰੀ ‘ਫੂਡ ਕੋਰਟ’ ਤੱਕ ਹੀ ਸੀਮਤ ਰਹੀ। ਇਸਨ ਨੇ ਕਿਹਾ ਕਿ ਪੁਲੀਸ ਨੇ ਫੂਡ ਕੋਰਟ ਨੇਡ਼ੇ ਟਾਇਲਟ ਵਿੱਚੋਂ ਇਕ ਸ਼ੱਕੀ ਬੈਗ ਬਰਾਮਦ ਕੀਤਾ ਹੈ। ਇੰਡੀਆਨਾਪੋਲਿਸ, ਮੈਟਰੋਪੋਲੀਟਨ ਪੁਲੀਸ ਅਤੇ ਕਈ ਹੋਰ ਏਜੰਸੀਆਂ ਜਾਂਚ ’ਚ ਮਦਦ ਕਰ ਰਹੀਆਂ ਹਨ। ਇੰਡੀਆਨਾਪੋਲਿਸ ਦੇ ਸਹਾਇਕ ਪੁਲੀਸ ਮੁਖੀ ਕ੍ਰਿਸ ਬੇਲੀ ਨੇ ਕਿਹਾ, ‘ਅਸੀਂ ਦੇਸ਼ ’ਚ ਇਸ ਤਰ੍ਹਾਂ ਦੀ ਇਕ ਹੋਰ ਘਟਨਾ ਤੋਂ ਦੁਖੀ ਹਾਂ।’ ਗ੍ਰੀਨਵੁੱਡ ਦੀ ਆਬਾਦੀ ਲਗਭਗ 60,000 ਹੈ ਅਤੇ ਇਹ ਇੰਡੀਆਨਾਪੋਲਿਸ ਦਾ ਇਕ ਦੱਖਣੀ ਉਪਨਗਰ ਹੈ। ਅਮਰੀਕਾ ’ਚ ਬੰਦੂਕਾਂ ਅਤੇ ਹਥਿਆਰਾਂ ਤੱਕ ਸੁਖਾਲੀ ਪਹੁੰਚ ਹੋਣ ਬਾਰੇ ਇਕ ਵਾਰ ਫਿਰ ਬਹਿਸ ਛਿਡ਼ੀ ਹੋਈ ਹੈ। ਹਥਿਆਰਾਂ ਨਾਲ ਹੋਣ ਵਾਲੀਆਂ ਮੌਤਾਂ ਅਮਰੀਕਨ ਜੀਵਨ ਦਾ ਇਕ ਹਿੱਸਾ ਹੀ ਬਣ ਗਈਆਂ ਹਨ। 1968 ਤੋਂ 2017 ਦੇ ਦਰਮਿਆਨ ਅਮਰੀਕਾ ’ਚ 15 ਲੱਖ ਮੌਤਾਂ ਹੋਈਆਂ। ਇਹ ਮੌਤਾਂ 1775 ਦੀ ਅਮਰੀਕਨ ਅਜ਼ਾਦੀ ਦੀ ਲਡ਼ਾਈ ’ਚ ਮਾਰੇ ਗਏ ਫ਼ੌਜੀਆਂ ਦੀ ਗਿਣਤੀ ਨਾਲੋਂ ਜ਼ਿਆਦਾ ਸੀ। ਸਾਲ 2020 ’ਚ ਹੀ 45 ਹਜ਼ਾਰ ਅਮਰੀਕਨਾਂ ਦੀ ਮੌਤ ਬੰਦੂਕ ਦੀ ਨਾਲ ਵਿੱਚੋਂ ਨਿਕਲੀ ਗੋਲੀ ਕਾਰਨ ਹੋਈ। ਇਹ ਮੌਤਾਂ ਭਾਵੇਂ ਖੁਦਕੁਸ਼ੀ ਦੇ ਰੂਪ ’ਚ ਹੋਣ ਜਾਂ ਕਿਸੇ ਗੋਲੀਬਾਰੀ ’ਚ ਹੋਈਆਂ ਹੋਣ। ਇਹ ਮੌਤਾਂ ਕਿਸੇ ਵੀ ਹੋਰ ਸਾਲ ਦੇ ਮੁਕਾਬਲੇ ’ਚ ਜ਼ਿਆਦਾ ਸਨ। ਮੇਅਰ ਮਾਰਕ ਡਬਲਿਊ ਮਾਇਰਸ ਨੇ ਕਿਹਾ ਕਿ ਇੰਡੀਆਨਾ ਦੇ ਗ੍ਰੀਨਵੁੱਡ ਪਾਰਕ ਮਾਲ ’ਚ ਗੋਲੀਬਾਰੀ ਹੋਈ ਜਿਸ ਮਗਰੋਂ ਪੁਲੀਸ ਨੇ ਮੌਕੇ ’ਤੇ ਜਾ ਕੇ ਸਥਿਤੀ ’ਤੇ ਕਾਬੂ ਪਾਇਆ।