ਕੈਬਰਿਜ ਦੇ ਰਹਿਣ ਵਾਲੇ ਇਕ ਡਰਾਈਵਰ ਕੁਨਾਲ ਮਹਿਤਾ ਦੀ ਮਿਸੀਸਾਗਾ ‘ਚ ਮੇਵਿਸ ਰੋਡ ‘ਤੇ ਚਿੱਟੇ ਰੰਗ ਦੀ ਓਡੀ ਵੱਲੋਂ ਮਾਰੀ ਟੱਕਰ ‘ਚ ਮੌਤ ਹੋ ਗਈ ਹੈ। ਇਹ 29 ਸਾਲਾ ਭਾਰਤੀ ਮੂਲ ਦਾ ਨੌਜਵਾਨ ਡਰਾਈਵਰ ਕੰਮ ਦੇ ਵੀਜ਼ੇ ‘ਤੇ ਕੈਨੇਡਾ ਆਇਆ ਸੀ ਅਤੇ ਰੋਜ਼ੀ ਰੋਟੀ ਲਈ ਉਬਰ ਚਲਾਉਣ ਦਾ ਕੰਮ ਕਰਦਾ ਸੀ। ਟੱਕਰ ਮਾਰਨ ਵਾਲੀ ਓਡੀ ਕਾਰ ਦਾ ਚਾਲਕ ਮੌਕੇ ਤੋਂ ਫਰਾਰ ਹੋ ਗਿਆ ਜਿਸ ਦੀ ਪੁਲੀਸ ਭਾਲ ਕਰ ਰਹੀ ਹੈ। ਦੂਜੇ ਪਾਸੇ ਮ੍ਰਿਤਕ ਡਰਾਈਵਰ ਦਾ ਕੈਨੇਡਾ ‘ਚ ਕੋਈ ਰਿਸ਼ਤੇਦਾਰ ਨਾ ਹੋਣ ਕਰਕੇ ਦੋਸਤਾਂ ਨੇ ਉਸ ਦੀ ਮ੍ਰਿਤਕ ਦੇਹ ਫਰੀਦਾਬਾਦ ਵਿਖੇ ਮਾਪਿਆਂ ਕੋਲ ਭੇਜਣ ਲਈ ਫੰਡਰੇਜ਼ਰ ਸਥਾਪਤ ਕੀਤਾ ਹੈ। ਜਾਣਕਾਰੀ ਮੁਤਾਬਕ 2019 ‘ਚ ਕੰਮ ਕਰਨ ਲਈ ਕੈਨੇਡਾ ਆਏ ਕੁਨਾਲ ਮਹਿਤਾ ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ। ਪੁਲੀਸ ਨੇ ਜਾਣਕਾਰੀ ਦਿੱਤੀ ਕਿ ਮਿਸੀਸਾਗਾ ‘ਚ ਇਕ ਉਬਰ ਡਰਾਈਵਰ ਕੁਨਾਲ ਮਹਿਤਾ ਨੂੰ ਮੇਵਿਸ ਰੋਡ ‘ਤੇ ਹਾਈਵੇਅ 401 ‘ਤੇ ਇਕ ਚਿੱਟੇ ਰੰਗ ਦੀ ਔਡੀ ਨੇ ਟੱਕਰ ਮਾਰ ਦਿੱਤੀ ਜਿਸਦਾ ਡਰਾਈਵਰ ਫਰਾਰ ਹੈ। ਓਂਟਾਰੀਓ ਪ੍ਰੋਵਿੰਸ਼ੀਅਲ ਪੁਲੀਸ (ਓ.ਪੀ.ਪੀ.) ਨੇ ਟਵੀਟ ਕੀਤਾ ਕਿ ‘ਚਿੱਟੇ ਰੰਗ ਦੀ ਔਡੀ ਦਾ ਸ਼ੱਕੀ ਡਰਾਈਵਰ ਮੌਕੇ ਤੋਂ ਭੱਜਣ ‘ਚ ਸਫਲ ਰਿਹਾ ਅਤੇ ਉਸ ਨੂੰ ਮੌਕੇ ਤੋਂ ਭੱਜਦੇ ਦੇਖਿਆ ਗਿਆ। ਕੈਂਬਰਿਜ ਦੇ ਰਹਿਣ ਵਾਲੇ 29 ਸਾਲਾ ਡਰਾਈਵਰ ਦੀ ਔਡੀ ਦੁਆਰਾ ਟੱਕਰ ਮਾਰਨ ਤੋਂ ਬਾਅਦ ਮੌਤ ਹੋ ਗਈ।’ ਪੁਲੀਸ ਅਧਿਕਾਰੀ ਨੇ ਅੱਗੇ ਕਿਹਾ ਕਿ ਇਸ ਮਾਮਲੇ ਦੀ ਜਾਂਚ ਜਾਰੀ ਹੈ। ਮਹਿਤਾ ਦੇ ਦੋਸਤ ਦਵਿੰਦਰ ਸਿੰਘ ਨੇ ਕਿਹਾ ਕਿ ‘ਜਦੋਂ ਓ.ਪੀ.ਪੀ. ਵੱਲੋਂ ਸਾਨੂੰ ਉਸ ਦੀ ਮੌਤ ਦੀ ਖ਼ਬਰ ਦਿੱਤੀ ਤਾਂ ਅਸੀਂ ਸਾਰੇ ਹੈਰਾਨ ਰਹਿ ਗਏ।’ ਦਵਿੰਦਰ ਸਿੰਘ ਨੇ ਕਿਹਾ ਕਿ ਰਾਤ ਦੇ ਲਗਭਗ 11.30 ਵੱਜੇ ਸਨ ਜਦੋਂ ਮੈਂ ਉਸ ਨਾਲ ਆਖਰੀ ਵਾਰ ਗੱਲ ਕੀਤੀ ਸੀ। ਉਹ ਉਸ ਸਮੇਂ ਟੋਰਾਂਟੋ ‘ਚ ਸੀ। ਈਦ ਕਾਰਨ ਆਵਾਜਾਈ ਬਹੁਤ ਜ਼ਿਆਦਾ ਸੀ।’ ਦਵਿੰਧਰ ਸਿੰਘ ਨੇ ਕਿਹਾ ਕਿ ‘ਸਾਨੂੰ ਗਵਾਹਾਂ ਅਤੇ ਪੁਲੀਸ ਰਾਹੀਂ ਪਤਾ ਲੱਗਾ ਹੈ ਕਿ ਔਡੀ ਵਿਚਲਾ ਵਿਅਕਤੀ ਕਾਹਲੀ ਨਾਲ ਗੱਡੀ ਚਲਾ ਰਿਹਾ ਸੀ।’ ਅਧਿਕਾਰੀਆਂ ਨੇ ਇਹ ਵੀ ਦੱਸਿਆ ਕਿ ਮਾਮਲਾ ਜਾਂਚ ਅਧੀਨ ਹੈ ਅਤੇ ਉਹ ਜ਼ਿਆਦਾ ਖੁਲਾਸਾ ਨਹੀਂ ਕਰ ਸਕਦੇ। ਉਸ ਨੇ ਦੱਸਿਆ ਕਿ ਕੁਨਾਲ ਮਹਿਤਾ ਦਾ ਕੈਨੇਡਾ ‘ਚ ਕੋਈ ਰਿਸ਼ਤੇਦਾਰ ਨਹੀਂ ਸੀ ਅਤੇ ਕੁਝ ਦੋਸਤ ਉਸ ਦਾ ਇੱਕੋ ਇਕ ਸਹਾਰਾ ਸਨ। ਕੁਨਾਲ ਮਹਿਤਾ ਦੀ ਲਾਸ਼ ਫਰੀਦਾਬਾਦ ‘ਚ ਉਸਦੇ ਮਾਤਾ-ਪਿਤਾ ਕੋਲ ਵਾਪਸ ਭੇਜਣ ‘ਚ ਮਦਦ ਲਈ ਇਕ ਫੰਡਰੇਜ਼ਰ ਵੀ ਸਥਾਪਤ ਕੀਤਾ ਹੈ।
