ਲਿਓਨੇਲ ਮੈਸੀ ਨੂੰ ਸਾਲ 2022 ਲਈ ਫੀਫਾ ਦਾ ਸਰਵੋਤਮ ਪੁਰਸ਼ ਖਿਡਾਰੀ ਚੁਣਿਆ ਗਿਆ। ਮੈਸੀ ਨੇ ਅਰਜਨਟੀਨਾ ਨੂੰ 36 ਸਾਲਾਂ ਦਾ ਸੋਕਾ ਖਤਮ ਕਰਦੇ ਹੋਏ ਵਰਲਡ ਕੱਪ ਚੈਂਪੀਅਨ ਬਣਾਇਆ। ਉਨ੍ਹਾਂ ਨੇ ਇਸ ਟੂਰਨਾਮੈਂਟ ‘ਚ ਸੱਤ ਗੋਲ ਦਾਗੇ ਸੀ। ਲਿਓਨੇਲ ਮੈਸੀ ਦੇ ਹਮਵਤਨ ਤੇ ਕੋਚ ਲਿਓਨੇਲ ਸਕਾਲੋਨੀ ਨੂੰ ਸਰਵੋਤਮ ਪੁਰਸ਼ ਕੋਚ ਚੁਣਿਆ ਗਿਆ। ਸਕਾਲੋਨੀ ਨੇ ਦੱਖਣੀ ਅਮਰੀਕਨਾਂ ਨੂੰ ਵਰਲਡ ਕੱਪ ਖਿਤਾਬ ਤਕ ਪਹੁੰਚਾਇਆ। 35 ਸਾਲਾ ਮੈਸੀ ਨੇ ਇਸ ਪੁਰਸਕਾਰ ਲਈ ਫ੍ਰੈਂਚ ਫਾਰਵਰਡ ਕਾਇਲੀਨ ਐਮਬਾਪੇ ਅਤੇ ਕਰੀਮ ਬੇਂਜੇਮਾ ਨੂੰ ਪਿੱਛੇ ਛੱਡ ਦਿੱਤਾ ਹੈ। ਅਰਜਨਟੀਨਾ ਨੂੰ ਵਰਲਡ ਕੱਪ ਚੈਂਪੀਅਨ ਬਣਾਉਣ ਤੋਂ ਇਲਾਵਾ ਮੈਸੀ ਨੇ 2021-22 ‘ਚ ਦੇਸ਼ ਅਤੇ ਕਲੱਬ ਲਈ ਕੁੱਲ 49 ਮੈਚਾਂ ‘ਚ 27 ਗੋਲ ਦਾਗੇ। ਮੈਸੀ ਨੇ ਦੂਜੀ ਵਾਰ ਫੀਫਾ ਸਰਵੋਤਮ ਪੁਰਸ਼ ਖਿਡਾਰੀ ਦਾ ਪੁਰਸਕਾਰ ਜਿੱਤਿਆ। ਉਨ੍ਹਾਂ ਕਿਹਾ, ‘ਇਹ ਸ਼ਾਨਦਾਰ ਹੈ। ਇਹ ਇਕ ਸ਼ਾਨਦਾਰ ਸਾਲ ਰਿਹਾ ਤੇ ਪੁਰਸਕਾਰ ਪ੍ਰਾਪਤ ਕਰਨ ਲਈ ਇਥੇ ਆਉਣਾ ਮੇਰੇ ਲਈ ਸਨਮਾਨ ਵਾਲੀ ਗੱਲ ਹੈ। ਮੈਂ ਇਥੇ ਆਪਣੇ ਸਾਥੀਆਂ ਤੋਂ ਬਿਨਾਂ ਨਾ ਹੁੰਦਾ। ਮੈਂ ਆਪਣਾ ਚਿਰੋਕਣਾ ਸੁਪਨਾ ਪੂਰਾ ਕਰ ਲਿਆ ਹੈ। ਕੁਝ ਹੀ ਲੋਕ ਇਸ ਨੂੰ ਪ੍ਰਾਪਤ ਕਰਦੇ ਹਨ ਤੇ ਮੈਂ ਅਜਿਹਾ ਕਰਨ ‘ਤੇ ਭਾਗਸ਼ਾਲੀ ਮਹਿਸੂਸ ਕਰ ਰਿਹਾ ਹਾਂ।’ ਪੈਰਿਸ ‘ਚ ਹੋਈ ਸੈਰੇਮਨੀ ‘ਚ ਅਰਜਨਟੀਨਾ ਨੂੰ ਵਰਲਡ ਕੱਪ ਖਿਤਾਬ ਜਿਤਾਉਣ ਵਾਲੇ ਕੋਚ ਲਿਓਨਲ ਸਕਾਲੋਨੀ ਨੇ ਪੇਪ ਗਾਰਡੀਓਲਾ ਤੇ ਕਾਰਲੋ ਐਂਸੇਲੋਟੀ ਨੂੰ ਮਾਤ ਦਿੱਤੀ। ਇੰਗਲੈਂਡ ਦੀ ਮੈਨੇਜਰ ਸਰੀਨਾ ਵਿਗਮੈਨ ਨੂੰ ਸਾਲ ਦੀ ਸਰਵੋਤਮ ਮਹਿਲਾ ਕੋਚ ਚੁਣਿਆ ਗਿਆ। ਉਨ੍ਹਾਂ ਨੇ ਪਿਛਲੇ ਸਾਲ ਇੰਗਲੈਂਡ ਨੂੰ ਯੂਰਪੀਅਨ ਚੈਂਪੀਅਨਸ਼ਿਪ ਦਾ ਖਿਤਾਬ ਦਿਵਾਇਆ ਸੀ। ਇਹ ਟੀਮ ਦੀ ਪਹਿਲੀ ਵੱਡੀ ਟਰਾਫੀ ਸੀ। ਐਸਟਨ ਵਿਲਾ ਤੇ ਅਰਜਨਟੀਨਾ ਦੀ ਐਮਿਲਿਆਨੋ ਮਾਰਟੀਨੇਜ਼ ਨੇ ਸਰਵੋਤਮ ਗੋਲਕੀਪਰ ਦਾ ਪੁਰਸਕਾਰ ਜਿੱਤਿਆ ਜਦਕਿ ਇੰਗਲੈਂਡ ਦੀ ਮੈਰੀ ਅਰਪਸ ਨੇ ਮਹਿਲਾ ਪੁਰਸਕਾਰ ਜਿੱਤਿਆ। ਬਾਰਸੀਲੋਨਾ ਦੀ ਅਲੈਕਸੀਆ ਪੁਟੇਲਾਸ ਨੂੰ ਸਾਲ ਦੀ ਸਰਵੋਤਮ ਮਹਿਲਾ ਖਿਡਾਰਨ ਚੁਣਿਆ ਗਿਆ। ਮਹਿਲਾ ਵਰਗ ‘ਚ ਪੁਟੇਲਸ ਨੇ ਅਮਰੀਕਾ ਦੀ ਐਲੈਕਸ ਮੌਰਗਨ ਅਤੇ ਇੰਗਲੈਂਡ ਦੀ ਬੈੱਥ ਮੀਡ ਨੂੰ ਪਛਾੜਦਿਆਂ ਫੀਫਾ ਐਵਾਰਡ ਜਿੱਤਿਆ।
