ਦੁਨੀਆਂ ਦੇ ਬਿਹਤਰੀਨ ਫੁਟਬਾਲਰਾਂ ‘ਚੋਂ ਇਕ ਲਿਓਨਲ ਮੈਸੀ ਨੇ ਕੁਰਾਕਾਓ ਵਿਰੁੱਧ ਕੌਮਾਂਤਰੀ ਦੋਸਤਾਨਾ ਮੈਚ ਦੇ ਪਹਿਲੇ ਅੱਧ ‘ਚ ਹੈਟ੍ਰਿਕ ਬਣਾਉਂਦਿਆਂ ਅਰਜਨਟੀਨਾ ਲਈ 100 ਗੋਲ ਕਰਨ ਦਾ ਅੰਕੜਾ ਪਾਰ ਕਰ ਲਿਆ ਹੈ। ਲੰਘੇ ਵਰ੍ਹੇ ਦਸੰਬਰ ‘ਚ ਵਰਲਡ ਕੱਪ ਖ਼ਿਤਾਬ ਜਿੱਤਣ ਮਗਰੋਂ ਆਪਣੇ ਦੂਜੇ ਮੈਚ ‘ਚ ਅਰਜਨਟੀਨਾ ਨੇ ਕੁਰਕਾਓ ਨੂੰ 7-0 ਨਾਲ ਹਰਾਇਆ। ਪੈਂਤੀ ਵਰ੍ਹਿਆਂ ਦੇ ਮੈਸੀ ਨੇ ਮੈਚ ਦੇ 20ਵੇਂ ਮਿੰਟ ‘ਚ ਗੋਲ ਨਾਲ ਟੀਮ ਦਾ ਖਾਤਾ ਖੋਲ੍ਹਣ ਦੇ ਨਾਲ ਕੌਮਾਂਤਰੀ ਮੈਚਾਂ ‘ਚ 100 ਗੋਲਾਂ ਦਾ ਅੰਕੜਾ ਪੂਰਾ ਕੀਤਾ। ਇਸ ਤੋਂ ਬਾਅਦ ਮੈਸੀ ਨੇ ਮੈਚ ਦੌਰਾਨ 33ਵੇਂ ਅਤੇ 37ਵੇਂ ਮਿੰਟ ‘ਚ ਵੀ ਗੋਲ ਦਾਗੇ। ਮੈਸੀ ਦੇ ਨਾਮ ਕੌਮਾਂਤਰੀ ਪੱਧਰ ‘ਤੇ ਹੁਣ 102 ਗੋਲ ਹੋ ਗਏ ਹਨ ਅਤੇ ਉਹ ਕੌਮੀ ਟੀਮਾਂ ਵੱਲੋਂ ਕੀਤੇ ਗਏ ਸਭ ਤੋਂ ਵੱਧ ਗੋਲਾਂ ਦੀ ਸੂਚੀ ‘ਚ ਸਿਰਫ ਦੋ ਖਿਡਾਰੀਆਂ ਤੋਂ ਪਿੱਛੇ ਹੈ। ਇਸ ਸੂਚੀ ‘ਚ ਕ੍ਰਿਸਟਿਆਨੋ ਰੋਨਾਲਡੋ 122 ਗੋਲਾਂ ਨਾਲ ਪਹਿਲੇ ਅਤੇ ਇਰਾਨ ਦਾ ਅਲੀ ਡੇਈ 109 ਗੋਲਾਂ ਨਾਲ ਦੂਜੇ ਸਥਾਨ ‘ਤੇ ਹੈ।
