ਇਕ ਯਾਤਰੀ ਟਰੇਨ ਅਤੇ ਮਾਲ ਗੱਡੀ ਦੀ ਟੱਕਰ ‘ਚ ਬੁੱਧਵਾਰ ਤੜਕੇ 26 ਲੋਕਾਂ ਦੀ ਮੌਤ ਹੋ ਗਈ ਜਦਕਿ 85 ਹੋਰ ਜ਼ਖਮੀ ਹੋ ਗਏ। ਇਹ ਰੇਲ ਹਾਦਸਾ ਗ੍ਰੀਸ ‘ਚ ਵਾਪਰਿਆ। ਫਾਇਰ ਵਿਭਾਗ ਦੇ ਅਧਿਕਾਰੀਆਂ ਨੇ ਜਾਣਕਾਰੀ ਦਿੱਤੀ ਕਿ ਏਥਨਜ਼ ਤੋਂ ਲਗਭਗ 380 ਕਿਲੋਮੀਟਰ ਉੱਤਰ ‘ਚ ਟੈਂਪੇ ਨੇੜੇ ਟੱਕਰ ਤੋਂ ਬਾਅਦ ਕਈ ਡੱਬੇ ਪਟੜੀ ਤੋਂ ਉੱਤਰ ਗਏ ਅਤੇ ਘੱਟੋ-ਘੱਟ 3 ਡੱਬਿਆਂ ਨੂੰ ਅੱਗ ਲੱਗ ਗਈ। ਨੇੜਲੇ ਲਾਰੀਸਾ ਸ਼ਹਿਰ ‘ਚ ਹਸਪਤਾਲ ਦੇ ਅਧਿਕਾਰੀਆਂ ਨੇ ਦੱਸਿਆ ਕਿ ਘੱਟੋ-ਘੱਟ 25 ਲੋਕ ਗੰਭੀਰ ਰੂਪ ਨਾਲ ਜ਼ਖ਼ਮੀ ਹਨ। ਫਾਇਰ ਡਿਪਾਰਟਮੈਂਟ ਦੇ ਬੁਲਾਰੇ ਵੈਸਿਲਿਸ ਵਾਰਥਕੋਯਾਨਿਸ ਨੇ ਕਿਹਾ ਕਿ ਦੋਹਾਂ ਟਰੇਨਾਂ ਵਿਚਾਲੇ ਟੱਕਰ ਬਹੁਤ ਭਿਆਨਕ ਸੀ, ਡੱਬੇ ਬੁਰੀ ਤਰ੍ਹਾਂ ਨਾਲ ਨੁਕਸਾਨੇ ਗਏ ਹਨ ਅਤੇ ਮੁਸ਼ਕਲ ਹਾਲਾਤਾਂ ‘ਚ ਲੋਕਾਂ ਨੂੰ ਕੱਢਣ ਦਾ ਕੰਮ ਜਾਰੀ ਹੈ। ਉਨ੍ਹਾਂ ਕਿਹਾ ਕਿ ਅੱਗ ਨਾਲ ਝੁਲਸੇ ਲੋਕਾਂ ਦੇ ਇਲਾਜ ਲਈ ਇਲਾਕੇ ਦੇ ਹਸਪਤਾਲਾਂ ਨੂੰ ‘ਅਲਰਟ’ ਕਰ ਦਿੱਤਾ ਗਿਆ ਹੈ। ਦਰਜਨਾਂ ਐਂਬੂਲੈਂਸਾਂ ਵੀ ਤਾਇਨਾਤ ਹਨ। ‘ਹੈੱਡਲੈਂਪ’ ਪਹਿਨੇ ਬਚਾਅ ਕਰਮਚਾਰੀ ਸੰਘਣੇ ਧੂੰਏਂ ‘ਚ ਨੁਕਸਾਨੇ ਗਏ ਡੱਬਿਆਂ ‘ਚ ਫਸੇ ਲੋਕਾਂ ਦੀ ਭਾਲ ਕਰ ਰਹੇ ਹਨ। ਅਧਿਕਾਰੀਆਂ ਨੇ ਦੱਸਿਆ ਕਿ ਵਾਧੂ ਮਦਦ ਲਈ ਫ਼ੌਜ ਨਾਲ ਵੀ ਸੰਪਰਕ ਕੀਤਾ ਗਿਆ ਹੈ। ਰੇਲ ਆਪਰੇਟਰ ਹੇਲੇਨਿਕ ਟਰੇਨ ਦੇ ਅਨੁਸਾਰ ਏਥਨਜ਼ ਤੋਂ ਥੈਸਾਲੋਨੀਕੀ ਜਾਣ ਵਾਲੀ ਟਰੇਨ ‘ਚ ਹਾਦਸੇ ਦੇ ਸਮੇਂ ਕਰੀਬ 350 ਯਾਤਰੀ ਸਵਾਰ ਸਨ।
