ਮਹਿਲਾ ਪ੍ਰੀਮੀਅਰ ਲੀਗ ਦੇ ਇਕ ਹੋਰ ਮੈਚ ‘ਚ ਨਵੀਂ ਮੁੰਬਈ ਦੇ ਮੈਦਾਨ ‘ਚ ਗ੍ਰੇਸ ਹੈਰਿਸ ਅਤੇ ਸੋਫੀ ਏਕਲਸਟੋਨ ਦੀ ਧਮਾਕੇਦਾਰ ਸਾਂਝੇਦਾਰੀ ਦੀ ਬਦੌਲਤ ਯੂ.ਪੀ. ਵਾਰੀਅਰਜ਼ ਨੇ ਗੁਜਰਾਤ ਜਾਇੰਟਸ ਦੇ ਜਬਾੜੇ ਤੋਂ ਜਿੱਤ ਖੋਹ ਲਈ। ਇਸ ਤੋਂ ਪਹਿਲਾਂ ਗੁਜਰਾਤ ਨੇ ਹਰਲੀਨ ਦਿਓਲ ਦੀਆਂ 46 ਦੌੜਾਂ ਦੀ ਬਦੌਲਤ 169 ਦੌੜਾਂ ਬਣਾਈਆਂ। ਜਵਾਬ ‘ਚ ਯੂ.ਪੀ. ਵਾਰੀਅਰਸ ਦੀ ਟੀਮ ਗੁਜਰਾਤ ਦੀ ਗੇਂਦਬਾਜ਼ ਕਿਮ ਗਰਥ ਦੇ ਸਾਹਮਣੇ ਸਮਰਪਣ ਕਰਦੀ ਨਜ਼ਰ ਆਈ। ਗਰਥ ਨੇ 36 ਦੌੜਾਂ ਦੇ ਕੇ 5 ਵਿਕਟਾਂ ਲਈਆਂ ਜਿਸ ਕਾਰਨ ਯੂ.ਪੀ. ਦੀ ਟੀਮ ਸੱਤ ਵਿਕਟਾਂ ‘ਤੇ 105 ਦੌੜਾਂ ‘ਤੇ ਸਿਮਟ ਗਈ ਪਰ ਗ੍ਰੇਸ ਹੈਰਿਸ ਅਤੇ ਸੋਫੀ ਏਕਲਸਟੋਨ ਨੇ ਫਿਰ ਗੇਅਰ ਬਦਲਿਆ ਤੇ ਵਿਕਟ ਦੇ ਚਾਰੇ ਪਾਸੇ ਸ਼ਾਟ ਮਾਰਦੇ ਹੋਏ ਆਪਣੀ ਟੀਮ ਨੂੰ ਜਿੱਤ ਵੱਲ ਲੈ ਗਏ। ਗ੍ਰੇਸ ਹੈਰਿਸ ਨੇ 53 ਅਤੇ ਸੋਫੀਆ ਨੇ 22 ਦੌੜਾਂ ਬਣਾਈਆਂ। ਇਸ ਤੋਂ ਪਹਿਲਾਂ ਹਰਲੀਨ ਦਿਓਲ ਅਰਧ ਸੈਂਕੜਾ ਬਣਾਉਣ ਤੋਂ ਖੁੰਝ ਗਈ ਪਰ ਉਸ ਦੀ 46 ਦੌੜਾਂ ਦੀ ਉਪਯੋਗੀ ਪਾਰੀ ਦੀ ਮਦਦ ਨਾਲ ਗੁਜਰਾਤ ਜਾਇੰਟਸ ਨੇ ਮਹਿਲਾ ਪ੍ਰੀਮੀਅਰ ਲੀਗ ਟੀ-20 ਕ੍ਰਿਕਟ ਟੂਰਨਾਮੈਂਟ ਦੇ ਮੈਚ ‘ਚ ਯੂ.ਪੀ. ਵਾਰੀਅਰਜ਼ ਦੇ ਖ਼ਿਲਾਫ਼ ਛੇ ਵਿਕਟਾਂ ‘ਤੇ 169 ਦੌੜਾਂ ਦਾ ਚੁਣੌਤੀਪੂਰਨ ਸਕੋਰ ਖੜ੍ਹਾ ਕੀਤਾ। ਹਰਲੀਨ ਨੇ ਆਪਣੀ ਪਾਰੀ ‘ਚ 32 ਗੇਂਦਾਂ ਦਾ ਸਾਹਮਣਾ ਕੀਤਾ ਅਤੇ ਸੱਤ ਚੌਕੇ ਲਗਾਏ। ਉਨ੍ਹਾਂ ਤੋਂ ਇਲਾਵਾ ਐਸ਼ਲੇ ਗਾਰਡਨਰ (19 ਗੇਂਦਾਂ ‘ਤੇ 25, ਦੋ ਚੌਕੇ, ਇਕ ਛੱਕਾ), ਸਲਾਮੀ ਬੱਲੇਬਾਜ਼ ਐਸ ਮੇਘਨਾ (15 ਗੇਂਦਾਂ ‘ਤੇ 24 ਦੌੜਾਂ) ਅਤੇ ਦਿਆਲਨ ਹੇਮਲਤਾ (13 ਗੇਂਦਾਂ ‘ਤੇ ਅਜੇਤੂ 21 ਦੌੜਾਂ) ਨੇ ਵੀ ਲਾਭਦਾਇਕ ਯੋਗਦਾਨ ਪਾਇਆ। ਵਾਰੀਅਰਜ਼ ਲਈ ਆਫ ਸਪਿਨਰ ਦੀਪਤੀ ਸ਼ਰਮਾ ਅਤੇ ਖੱਬੇ ਹੱਥ ਦੀ ਸਪਿਨਰ ਸੋਫੀ ਏਕਲਸਟੋਨ ਨੇ ਦੋ-ਦੋ ਵਿਕਟਾਂ ਲਈਆਂ। ਪਹਿਲੇ ਮੈਚ ‘ਚ ਮੁੰਬਈ ਇੰਡੀਅਨਜ਼ ਤੋਂ 143 ਦੌੜਾਂ ਦੀ ਕਰਾਰੀ ਹਾਰ ਝੱਲਣ ਵਾਲੀ ਗੁਜਰਾਤ ਜਾਇੰਟਸ ਨੇ ਟਾਸ ਜਿੱਤ ਕੇ ਬੱਲੇਬਾਜ਼ੀ ਕਰਨ ਦਾ ਫੈਸਲਾ ਕਰਨ ਤੋਂ ਬਾਅਦ ਐਸ ਮੇਘਨਾ ਅਤੇ ਸੋਫੀਆ ਡੰਕਲੇ (13) ਨੇ ਪਹਿਲੀ ਵਿਕਟ ਲਈ 34 ਦੌੜਾਂ ਜੋੜ ਕੇ ਚੰਗੀ ਸ਼ੁਰੂਆਤ ਕੀਤੀ। ਇਹ ਦੋ ਸਲਾਮੀ ਬੱਲੇਬਾਜ਼ ਹਾਲਾਂਕਿ ਪੰਜ ਗੇਂਦਾਂ ਦੇ ਅੰਦਰ ਹੀ ਪੈਵੇਲੀਅਨ ਪਰਤ ਗਏ। ਦੀਪਤੀ ਸ਼ਰਮਾ ਨੇ ਡੰਕਲੇ ਨੂੰ ਬੋਲਡ ਕੀਤਾ ਜਦੋਂ ਕਿ ਐਕਲਸਟੋਨ ਨੇ ਮੇਘਨਾ ਨੂੰ ਸ਼ਾਰਟ ਥਰਡ ਮੈਨ ‘ਤੇ ਸਧਾਰਨ ਕੈਚ ਲੈਣ ਲਈ ਮਜਬੂਰ ਕੀਤਾ। ਮੇਘਨਾ ਨੇ ਆਪਣੀ 15 ਗੇਂਦਾਂ ਦੀ ਪਾਰੀ ‘ਚ ਪੰਜ ਚੌਕੇ ਜੜੇ। ਐਕਲਸਟੋਨ ਨੇ ਵੀ ਐਨਾਬੇਲ ਸਦਰਲੈਂਡ (ਅੱਠ) ਨੂੰ ਜ਼ਿਆਦਾ ਦੇਰ ਟਿਕਣ ਨਹੀਂ ਦਿੱਤਾ। ਅੰਜਲੀ ਸਰਵਾਨੀ ਨੇ ਲਾਂਗ ਆਨ ‘ਤੇ ਦੌੜ ਕੇ ਉਸਦਾ ਕੈਚ ਫੜਿਆ। ਸੁਸ਼ਮਾ ਵਰਮਾ (9) ਆਊਟ ਹੋਣ ਵਾਲੀ ਅਗਲੀ ਬੱਲੇਬਾਜ਼ ਸੀ, ਜਿਸ ਨੇ ਮੱਧਮ ਤੇਜ਼ ਗੇਂਦਬਾਜ਼ ਤਾਲੀਆ ਮੈਕਗ੍ਰਾ ਨੂੰ ਸਵੀਪ ਕਰਨ ਦੀ ਕੋਸ਼ਿਸ਼ ‘ਚ ਆਪਣਾ ਵਿਕਟ ਗੁਆ ਦਿੱਤਾ। ਇਥੋਂ ਹਰਲੀਨ ਨੇ ਗਾਰਡਨਰ ਨਾਲ ਪੰਜਵੇਂ ਵਿਕਟ ਲਈ 44 ਦੌੜਾਂ ਦੀ ਅਹਿਮ ਸਾਂਝੇਦਾਰੀ ਕੀਤੀ। ਦੀਪਤੀ ਨੇ ਆਪਣੇ ਦੂਜੇ ਸਪੈੱਲ ‘ਚ ਗਾਰਡਨਰ ਨੂੰ ਆਊਟ ਕਰਕੇ ਸਾਂਝੇਦਾਰੀ ਨੂੰ ਤੋੜਿਆ। ਹਰਲੀਨ ਨੇ ਫਿਰ ਹਮਲਾਵਰ ਰਵੱਈਆ ਅਪਣਾਇਆ। ਉਸ ਨੇ ਲੈੱਗ ਸਪਿੰਨਰ ਦੇਵਿਕਾ ਵੈਦਿਆ ਨੂੰ ਲਗਾਤਾਰ ਚਾਰ ਚੌਕੇ ਲਾਏ ਪਰ ਅਗਲੇ ਓਵਰ ‘ਚ ਲੰਮਾ ਸ਼ਾਟ ਖੇਡਣ ਦੀ ਕੋਸ਼ਿਸ਼ ‘ਚ ਅੰਜਲੀ ਸਰਵਾਨੀ ਦੇ ਹੱਥੋਂ ਬਾਊਂਡਰੀ ਲਾਈਨ ‘ਤੇ ਕੈਚ ਹੋ ਗਏ।
