ਇੰਡੀਆ ਦੀ ਮਹਿਲਾ ਹਾਕੀ ਟੀਮ ਰਾਸ਼ਟਰਮੰਡਲ ਖੇਡਾਂ ਦੇ ਬਹੁਤ ਹੀ ਰੋਮਾਂਚਕ ਸੈਮੀਫਾਈਨਲ ਸ਼ੂਟਆਊਟ ’ਚ ਆਖਰੀ ਮਿੰਟਾਂ ’ਚ ਵੰਦਨਾ ਕਟਾਰੀਆ ਦੇ ਗੋਲ ਦੇ ਦਮ ’ਤੇ ਸ਼ਾਨਦਾਰ ਵਾਪਸੀ ਕਰਨ ਤੋਂ ਬਾਅਦ ਆਸਟਰੇਲੀਆ ਤੋਂ 0-3 ਨਾਲ ਹਾਰ ਗਈ ਤੇ ਹੁਣ ਕਾਂਸੀ ਦੇ ਤਗ਼ਮੇ ਲਈ ਖੇਡੇਗੀ। ਕਾਂਸੀ ਤਗ਼ਮੇ ਲਈ ਇੰਡੀਆ ਦਾ ਸਾਹਮਣਾ ਨਿਊਜ਼ੀਲੈਂਡ ਨਾਲ ਹੋਵੇਗਾ। 10ਵੇਂ ਮਿੰਟ ’ਚ ਰੇਬੇਕਾ ਗ੍ਰੇਈਨੇਰ ਦੇ ਗੋਲ ਨੇ ਆਸਟਰੇਲੀਆ ਨੂੰ ਬਡ਼੍ਹਤ ਦਿਵਾਈ ਪਰ ਫਿਰ ਗੋਲਕੀਪਰ ਕਪਤਾਨ ਸਵਿਤਾ ਪੂਨੀਆ ਦੀ ਅਗਵਾਈ ’ਚ ਭਾਰਤੀ ਡਿਫੈਂਸ ਨੇ ਆਸਟਰੇਲੀਆ ਨੂੰ ਬਰਾਬਰੀ ’ਤੇ ਰੱਖਿਆ। ਟੋਕੀਓ ਓਲੰਪਿਕਸ ’ਚ ਚੌਥੇ ਸਥਾਨ ’ਤੇ ਰਹੀ ਭਾਰਤੀ ਟੀਮ ਲਈ 49ਵੇਂ ਮਿੰਟ ’ਚ ਵੰਦਨਾ ਕਟਾਰੀਆ ਨੇ ਬਰਾਬਰੀ ਦਾ ਗੋਲ ਕੀਤਾ। ਨੇਹਾ, ਨਵਨੀਤ ਕੌਰ ਅਤੇ ਲਾਲਰੇਮਸਿਆਮੀ ਵਿਵਾਦਪੂਰਨ ਪੈਨਲਟੀ ਸ਼ੂਟਆਊਟ ’ਚ ਇੰਡੀਆ ਲਈ ਗੋਲ ਨਹੀਂ ਕਰ ਸਕੀਆਂ, ਜਦੋਂਕਿ ਆਸਟਰੇਲੀਆ ਲਈ ਐਂਬਰੋਸੀਆ ਮੈਲੋਨ, ਐਮੀ ਲਾਟਨ ਅਤੇ ਕੈਟਲਿਨ ਨੋਬਸ ਦੇ ਸ਼ਾਟ ਨਿਸ਼ਾਨੇ ’ਤੇ ਲੱਗੇ। ਇੰਡੀਆ ਨੂੰ ਪਹਿਲੇ ਕੁਆਰਟਰ ’ਚ 6 ਪੈਨਲਟੀ ਕਾਰਨਰ ਮਿਲੇ ਪਰ ਗੋਲ ਨਹੀਂ ਹੋ ਸਕਿਆ। ਇਸ ਤੋਂ ਬਾਅਦ ਭਾਰਤੀ ਡਿਫੈਂਸ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਆਸਟਰੇਲੀਅਨ ਸਟ੍ਰਾਈਕਰਾਂ ਨੂੰ ਕੋਈ ਮੌਕਾ ਨਹੀਂ ਦਿੱਤਾ।
