ਇੰਡੀਆ ਦੇ ਆਲਰਾਊਂਡਰ ਰਵਿੰਦਰ ਜਡੇਜਾ ਦੇ ਕਰੀਅਰ ਦੀ ਸਰਵਸ੍ਰੇਸ਼ਠ ਅਜੇਤੂ 46 ਦੌਡ਼ਾਂ ਦੀ ਪਾਰੀ ਤੋਂ ਬਾਅਦ ‘ਮੈਨ ਆਫ ਦਿ ਮੈਚ’ ਭੁਵਨੇਸ਼ਵਰ ਕੁਮਾਰ ਦੀ ਅਗਵਾਈ ’ਚ ਗੇਂਦਬਾਜ਼ਾਂ ਦੇ ਦਬਦਬੇ ਵਾਲੇ ਪ੍ਰਦਰਸ਼ਨ ਨਾਲ ਇੰਡੀਆ ਨੇ ਦੂਜੇ ਟੀ-20 ਕੌਮਾਂਤਰੀ ’ਚ ਇੰਗਲੈਂਡ ਨੂੰ 49 ਦੌਡ਼ਾਂ ਨਾਲ ਹਰਾ ਕੇ 3 ਮੈਚਾਂ ਦੀ ਲਡ਼ੀ ’ਚ 2-0 ਦੀ ਅਜੇਤੂ ਬਡ਼੍ਹਤ ਬਣ ਹਾਸਲ ਕਰ ਲਈ। ਪਹਿਲਾਂ ਬੱਲੇਬਾਜ਼ੀ ਦਾ ਸੱਦਾ ਮਿਲਣ ਤੋਂ ਬਾਅਦ ਇੰਡੀਆ ਨੇ ਵਿਚਾਲੇ ਦੇ ਓਵਰਾਂ ’ਚ ਲਡ਼ਖਡ਼ਾਉਣ ਤੋਂ ਬਾਅਦ 8 ਵਿਕਟਾਂ ’ਤੇ 170 ਦੌਡ਼ਾਂ ਬਣਾਈਆਂ ਤੇ ਫਿਰ ਇੰਗਲੈਂਡ ਦੀ ਪਾਰੀ ਨੂੰ 17 ਓਵਰਾਂ ’ਚ 121 ਦੌਡ਼ਾਂ ’ਤੇ ਸਮੇਟ ਦਿੱਤਾ। ਭਾਰਤ ਲਈ ਭੁਵਨੇਸ਼ਵਰ ਕੁਮਾਰ ਨੇ 3 ਓਵਰਾਂ ’ਚ 15 ਦੌਡ਼ਾਂ ’ਤੇ 3, ਜਸਪ੍ਰੀਤ ਬੁਮਰਾਹ ਨੇ 3 ਓਵਰਾਂ ’ਚ 10 ਦੌਡ਼ਾਂ ਦੇ ਕੇ 2 ਤੇ ਯੁਜਵੇਂਦਰ ਚਾਹਲ ਨੇ 2 ਓਵਰਾਂ ’ਚ 12 ਦੌਡ਼ਾਂ ਦੇ ਕੇ 2 ਵਿਕਟਾਂ ਲਈਆਂ। ਟੀਚੇ ਦਾ ਪਿੱਛਾ ਕਰਨ ਉਤਰੀ ਇੰਗਲੈਂਡ ਨੂੰ ਭੁਵਨੇਸ਼ਵਰ ਕੁਮਾਰ ਨੇ ਪਹਿਲੀ ਹੀ ਗੇਂਦ ’ਤੇ ਜੈਸਨ ਰਾਏ ਨੂੰ ਆਊਟ ਕਰਕੇ ਵੱਡਾ ਝਟਕਾ ਦਿੱਤਾ। ਆਪਣਾ ਪਹਿਲਾ ਓਵਰ ਮੇਡਨ ਕਰਨ ਤੋਂ ਬਾਅਦ ਉਸ ਨੇ ਕਪਤਾਨ ਜੋਸ ਬਟਲਰ (4) ਨੂੰ ਰਿਸ਼ਭ ਪੰਤ ਹੱਥੋਂ ਕੈਚ ਕਰਵਾ ਕੇ ਦੂਜੀ ਸਫਲਤਾ ਹਾਸਲ ਕੀਤੀ। ਚੌਥੇ ਕ੍ਰਮ ’ਤੇ ਬੱਲੇਬਾਜ਼ੀ ਲਈ ਆਏ ਲਿਵਿੰਗਸਟੋਨ (15) ਨੇ ਲਗਾਤਾਰ ਦੋ ਚੌਕੇ ਲਾ ਕੇ ਆਪਣੇ ਹਮਲਵਾਰ ਤੇਵਰ ਦਿਖਾਏ ਪਰ ਪਾਰੀ ਦੇ ਪੰਜਵੇਂ ਓਵਰ ’ਚ ਜਸਪ੍ਰੀਤ ਬੁਮਰਾਹ ਨੇ ਉਸ ਨੂੰ ਬੋਲਡ ਕਰਕੇ ਟੀਮ ਨੂੰ ਵੱਡੀ ਸਫਲਤਾ ਦਿਵਾਈ। ਰੋਹਿਤ ਨੇ ਪਾਵਰ ਪਲੇਅ ਖਤਮ ਹੋਣ ਤੋਂ ਬਾਅਦ ਗੇਂਦ ਯੁਜਵੇਂਦਰ ਚਾਹਲ ਨੂੰ ਦਿੱਤੀ ਤੇ ਇਸ ਸਪਿਨਰ ਨੇ ਹੈਰੀ ਬਰੂਕ (8) ਨੂੰ ਆਪਣੀ ਫਿਰਕੀ ’ਚ ਫਸਾ ਲਿਆ ਜਿਸ ਨਾਲ 10ਵੇਂ ਓਵਰ ’ਚ 55 ਦੇ ਸਕੋਰ ਤਕ ਇੰਗਲੈਂਡ ਦੀ ਅੱਧੀ ਟੀਮ ਪੈਵੇਲੀਅਨ ਪਰਤ ਗਈ। ਬੁਮਰਾਹ ਨੇ ਆਪਣੇ ਦੂਜੇ ਸਪੈੱਲ ਵਿਚ ਦੂਜੀ ਗੇਂਦ ’ਤੇ ਸੈਮ ਕਿਊਰੇਨ (2) ਨੂੰ ਹਾਰਦਿਕ ਹੱਥੋਂ ਕੈਚ ਕਰਵਾ ਕੇ ਚਲਦਾ ਕੀਤਾ। ਮੋਇਨ ਅਲੀ ਨੇ 12ਵੇਂ ਤੇ 13ਵੇਂ ’ਚ ਚੌਕਾ ਲਾਉਣ ਤੋਂ ਬਾਅਦ 14ਵੇਂ ਓਵਰ ਵਿਚ ਜਡੇਜਾ ਤੇ 15ਵੇਂ ਓਵਰ ’ਚ ਹਾਰਦਿਕ ਵਿਰੁੱਧ ਛੱਕਾ ਲਾਇਆ। ਹਾਰਦਿਕ ਨੇ ਹਾਲਾਂਕਿ ਅਗਲੀ ਹੀ ਗੇਂਦ ’ਤੇ ਕਪਤਾਨ ਰੋਹਿਤ ਦੇ ਹੱਥੋਂ ਕੈਚ ਕਰਵਾ ਕੇ 21 ਗੇਂਦਾਂ ’ਤੇ 35 ਦੌਡ਼ਾਂ ਦੀ ਉਸਦੀ ਪਾਰੀ ਨੂੰ ਖਤਮ ਕਰ ਕੇ ਇੰਗਲੈਂਡ ਦੀ ਜਿੱਤ ਦੀਆਂ ਉਮੀਦਾਂ ਤੋਡ਼ ਦਿੱਤੀਆਂ। ਅਗਲੀ ਹੀ ਗੇਂਦ ’ਤੇ ਜੌਰਡਨ (1) ਰਨ ਆਊਟ ਹੋ ਗਿਆ। ਡੇਵਿਡ ਵਿਲੀ ਨੇ ਹਾਰਦਿਕ ਦੇ ਇਸ ਓਵਰ ’ਚ ਚੌਕਾ ਤੇ ਛੱਕਾ ਲਾ ਕੇ ਟੀਮ ਨੂੰ ਮੈਚ ’ਚ ਬਰਕਰਾਰ ਰੱਖਣ ਦੀ ਕੋਸ਼ਿਸ਼ ਕੀਤੀ ਪਰ ਭੁਵਨੇਸ਼ਵਰ ਨੇ ਅਗਲੇ ਓਵਰ ’ਚ ਰਿਚਰਡ ਗਲੀਸਨ ਨੂੰ ਪੈਵੇਲੀਅਨ ਦਾ ਰਸਤਾ ਦਿਖਾ ਦਿੱਤਾ। ਵਿਲੀ ਨੇ ਹਰਸ਼ਲ ਵਿਰੁੱਧ 17ਵੇਂ ਓਵਰ ਦੀ ਸ਼ੁਰੂਆਤ ਦੋ ਗੇਂਦਾਂ ’ਤੇ ਛੱਕਾ ਤੇ ਚੌਕਾ ਲਾ ਕੇ ਕੀਤੀ ਪਰ ਉਸ ਨੇ ਓਵਰ ਦੀ ਆਖਰੀ ਗੇਂਦ ’ਤੇ ਮੈਟ ਪਾਰਕਿੰਸਨ ਨੂੰ ਬੋਲਡ ਕਰਕੇ ਇੰਗਲੈਂਡ ਦੀ ਪਾਰੀ ਨੂੰ ਸਮੇਟ ਦਿੱਤਾ। ਇਸ ਤੋਂ ਪਹਿਲਾਂ ਇੰਡੀਆ ਲਈ ਕਪਤਾਨ ਰੋਹਿਤ ਦੇ ਨਾਲ ਵਿਕਟਕੀਪਰ ਪੰਤ ਨੇ ਪਾਰੀ ਦਾ ਆਗਾਜ਼ ਕੀਤਾ। ਪਾਰੀ ਦੇ ਪਹਿਲੇ ਓਵਰ ’ਚ ਡੇਵਿਡ ਵਿਲੀ ਦੀ ਚੌਥੀ ਗੇਂਦ ’ਤੇ ਡੇਵਿਡ ਮਲਾਨ ਨੇ ਰੋਹਿਤ ਦਾ ਕੈਚ ਫਡ਼ਿਆ ਤੇ ਭਾਰਤੀ ਕਪਤਾਨ ਨੇ ਓਵਰ ਦੀ ਆਖਰੀ ਗੇਂਦ ’ਤੇ ਸਵਾਗਤ ਫਿਰ ਤੋਂ ਛੱਕਾ ਲਾ ਕੇ ਕੀਤਾ ਜਦਕਿ ਪੰਤ ਨੇ ਇਸ ਓਵਰ ’ਚ ਦੋ ਚੌਕੇ ਲਾਏ। ਦੋਵਾਂ ਨੇ ਇਸ ਤੋਂ ਬਾਅਦ ਮੋਇਨ ਅਲੀ ਵਿਰੁੱਧ ਚੌਕੇ ਲਾਏ। ਪੰਜਵੇਂ ਓਵਰ ’ਚ ਗੇਂਦਬਾਜ਼ੀ ਲਈ ਆਏ ਡੈਬਿਊ ਕਰ ਰਹੇ ਗਲੀਸਨ ਦਾ ਸਵਾਗਤ ਵੀ ਰੋਹਿਤ ਨੇ ਚੌਕੇ ਨਾਲ ਕੀਤਾ ਪਰ ਇਸ ਗੇਂਦਬਾਜ਼ ਨੇ ਭਾਰਤੀ ਕਪਤਾਨ ਨੂੰ ਵਿਕਟਕੀਪਰ ਜੋਸ ਬਟਲਰ ਦੇ ਹੱਥੋਂ ਕੈਚ ਕਰਵਾ ਕੇ ਕੌਮਾਂਤਰੀ ਕਰੀਅਰ ਦੀ ਪਹਿਲੀ ਵਿਕਟ ਲਈ। ਉਸ ਨੇ ਇਸ ਤਰ੍ਹਾਂ ਰੋਹਿਤ ਤੇ ਪੰਤ ਦੀ 49 ਦੌਡ਼ਾਂ ਦੀ ਸਾਂਝੇਦਾਰੀ ਨੂੰ ਖ਼ਤਮ ਕੀਤਾ।
