ਇਕ ਹਫਤੇ ਬਾਅਦ ਲੰਡਨ ‘ਚ ਸ਼ੁਰੂ ਹੋਣ ਜਾ ਰਿਹਾ ਲੈਵਰ ਕੱਪ 41 ਸਾਲਾ ਟੈਨਿਸ ਖਿਡਾਰੀ ਰੋਜਰ ਫੈਡਰਰ ਦਾ ਆਖਰੀ ਟੂਰਨਾਮੈਂਟ ਹੋਵੇਗਾ। ਵੀਹ ਵਾਰ ਗ੍ਰੈਂਡ ਸਲੈਮ ਸਿੰਗਲ ਜਿੱਤਣ ਵਾਲੇ ਰੋਜਰ ਫੈਡਰਰ ਵੱਲੋਂ ਇਸ ਤੋਂ ਬਾਅਦ ਟੈਨਿਸ ਤੋਂ ਸੰਨਿਆਸ ਲੈਣ ਦਾ ਐਲਾਨ ਕਰ ਦਿੱਤਾ ਹੈ। ਰੋਜਰ ਨੇ ਮੀਡੀਆ ਨਾਲ ਗੱਲਬਾਤ ਦੌਰਾਨ ਕਿਹਾ ਕਿ ਆਉਣ ਵਾਲੇ ਦਿਨਾਂ ‘ਚ ਹੋਣ ਵਾਲਾ ਲੈਵਰ ਕੱਪ ਉਸਦੇ ਏ.ਟੀ.ਪੀ. ਟੂਰ ਦਾ ਆਖ਼ਰੀ ਪੜਾਅ ਹੋਵੇਗਾ। ਜ਼ਿਕਰਯੋਗ ਹੈ ਕਿ 2021 ਦੌਰਾਨ ਵਿੰਬਲਡਨ ‘ਚ ਭਾਗ ਲੈਣ ਮਗਰੋਂ ਰੋਜਰ ਫੈਡਰਰ ਦੇ ਗੋਡੇ ਦਾ ਤੀਜਾ ਅਪਰੇਸ਼ਨ ਹੋਇਆ ਸੀ ਜਿਸ ਮਗਰੋਂ ਉਹ ਹਾਲੇ ਤੱਕ ਮੁੜ ਮੈਦਾਨ ‘ਚ ਨਹੀਂ ਸੀ ਉਤਰਿਆ। ਆਪਣੇ ਸੰਨਿਆਸ ਦਾ ਐਲਾਨ ਟਵਿੱਟਰ ਰਾਹੀਂ ਕਰਦਿਆਂ ਖਿਡਾਰੀ ਨੇ ਕਿਹਾ, ‘ਅਗਲੇ ਮਹੀਨੇ ਹੋਣ ਵਾਲਾ ਲੈਵਰ ਕੱਪ ਮੇਰੇ ਏ.ਟੀ.ਪੀ. ਟੂਰ ਦਾ ਆਖਰੀ ਪੜਾਅ ਹੋਵੇਗਾ। ਮੈਂ ਇਸ ਟੂਰ ਦੌਰਾਨ ਹੋਰ ਕੋਈ ਮੈਚ ਜਾਂ ਗ੍ਰੈਂਡ ਸਲੈਮ ਨਹੀਂ ਖੇਡਾਂਗਾ।’ ਖਿਡਾਰੀ ਨੇ ਕਿਹਾ, ‘ਮੈਂ ਮੁਕਾਬਲੇ ਲਈ ਤਿਆਰ ਹੋਣ ‘ਤੇ ਆਪਣਾ ਪੂਰਾ ਜ਼ੋਰ ਲਾਇਆ ਹੈ, ਪਰ ਮੈਨੂੰ ਆਪਣੇ ਸਰੀਰ ਦੀ ਸਮਰੱਥਾ ਤੇ ਸੀਮਾਵਾਂ ਦਾ ਵੀ ਪਤਾ ਹੈ। ਮੈਂ 41 ਸਾਲਾਂ ਦਾ ਹਾਂ ਤੇ ਪਿਛਲੇ 24 ਸਾਲਾਂ ਦੌਰਾਨ 1500 ਨਾਲੋਂ ਵੱਧ ਮੈਚ ਖੇਡ ਚੁੱਕਿਆ ਹਾਂ। ਟੈਨਿਸ ਨੇ ਮੈਨੂੰ ਮੇਰੀ ਉਮੀਦ ਨਾਲੋਂ ਵੱਧ ਮਾਣ-ਸਨਮਾਨ ਦਿਵਾਇਆ ਹੈ ਤੇ ਮੈਨੂੰ ਇਹ ਪਤਾ ਹੋਣਾ ਚਾਹੀਦਾ ਹੈ ਕਿ ਮੈਂ ਇਸ ਮੁਕਾਬਲੇ ਨੂੰ ਕਦੋਂ ਖ਼ਤਮ ਕਰਨਾ ਹੈ। ਮੈਂ ਬੇਸ਼ੱਕ ਟੈਨਿਸ ਖੇਡਦਾ ਰਹਾਂਗਾ, ਪਰ ਗ੍ਰੈਂਡ ਸਲੈਮ ਜਾਂ ਆਪਣੇ ਟੂਅਰ ‘ਚ ਨਹੀਂ। ਇਹ ਇਕ ਕੌੜਾ ਤੇ ਮਿੱਠਾ ਫ਼ੈਸਲਾ ਹੈ।’
