ਸਾਊਥ ਜ਼ਾਂਬੀਆ ‘ਚ ਇਕ ਬੱਸ ਦੇ ਇਕ ਟਰੱਕ ਨਾਲ ਟਕਰਾ ਜਾਣ ਕਾਰਨ ਉਸ ‘ਚ ਸਵਾਰ 24 ਲੋਕਾਂ ਦੀ ਮੌਤ ਹੋ ਗਈ ਅਤੇ 12 ਹੋਰ ਗੰਭੀਰ ਰੂਪ ‘ਚ ਜ਼ਖਮੀ ਹੋ ਗਏ। ਜ਼ਾਂਬੀਆ ਪੁਲੀਸ ਦੇ ਉਪ ਲੋਕ ਸੰਪਰਕ ਅਧਿਕਾਰੀ ਡੈਨੀ ਮਵਾਲੇ ਨੇ ਕਿਹਾ ਕਿ ਸ਼ੁਰੂਆਤੀ ਜਾਂਚ ਤੋਂ ਪਤਾ ਲੱਗਿਆ ਹੈ ਕਿ 35 ਯਾਤਰੀਆਂ ਵਾਲੀ ਭਰੀ ਬੱਸ ਇਕ ਟਰੱਕ ਦੇ ਪਿੱਛੇ ਟਕਰਾਉਣ ਤੋਂ ਬਾਅਦ ਉਲਟ ਗਈ ਅਤੇ ਸੜਕ ਦੇ ਖੱਬੇ ਪਾਸੇ ਇਕ ਖਾਈ ‘ਚ ਡਿੱਗ ਗਈ। ਜ਼ਖ਼ਮੀਆਂ ‘ਚ ਬੱਸ ਡਰਾਈਵਰ ਵੀ ਸ਼ਾਮਲ ਹੈ। ਮਵਾਲੇ ਨੇ ਅੱਗੇ ਕਿਹਾ ਕਿ ਹਾਦਸੇ ਕਾਰਨ ਬੱਸ ਨੂੰ ਕਾਫੀ ਨੁਕਸਾਨ ਪਹੁੰਚਿਆ ਅਤੇ ਟਰੱਕ ਦਾ ਪਿਛਲਾ ਬੰਪਰ ਨੁਕਸਾਨਿਆ ਗਿਆ। ਪੁਲੀਸ ਅਨੁਸਾਰ ਜ਼ਾਂਬੀਆ ‘ਚ 2023 ਦੀ ਪਹਿਲੀ ਤਿਮਾਹੀ ‘ਚ ਘੱਟੋ ਘੱਟ 7,639 ਸੜਕ ਹਾਦਸੇ ਦਰਜ ਕੀਤੇ ਗਏ ਸਨ ਜਿਸ ‘ਚ ਇਸ ਸਮੇਂ ਦੌਰਾਨ 390 ਲੋਕ ਮਾਰੇ ਗਏ।
