ਫਿਲੀਪੀਨ ਟਾਪੂਆਂ ਦੇ ਵਿਚਕਾਰ ਲਗਭਗ 250 ਯਾਤਰੀਆਂ ਅਤੇ ਚਾਲਕ ਦਲ ਨੂੰ ਲੈ ਕੇ ਜਾ ਰਹੇ ਇਕ ਸਮੁੰਦਰੀ ਜਹਾਜ਼ ‘ਚ ਅੱਗ ਲੱਗਣ ਕਾਰਨ 12 ਲੋਕਾਂ ਦੀ ਮੌਤ ਹੋ ਗਈ ਅਤੇ 7 ਹੋਰ ਅਜੇ ਵੀ ਲਾਪਤਾ ਹਨ। ਸੂਬਾਈ ਗਵਰਨਰ ਨੇ ਇਹ ਜਾਣਕਾਰੀ ਦਿੱਤੀ। ਬਾਸਿਲਾਨ ਦੇ ਦੱਖਣੀ ਟਾਪੂ ਸੂਬੇ ਦੇ ਗਵਰਨਰ ਜਿਮ ਹਾਟਾਮੈਨ ਨੇ ਕਿਹਾ ਕਿ ਬਚਾਏ ਗਏ ਲੋਕਾਂ ‘ਚੋਂ ਕਈਆਂ ਨੇ ਅੱਗ ਲੱਗਣ ਤੋਂ ਬਾਅਦ ਘਬਰਾ ਕੇ ਪਾਣੀ ‘ਚ ਛਾਲ ਮਾਰ ਦਿੱਤੀ ਸੀ। ਉਨ੍ਹਾਂ ਨੂੰ ਤੱਟ ਰੱਖਿਅਕ, ਜਲ ਸੈਨਾ, ਇਕ ਹੋਰ ਕਿਸ਼ਤੀ ਅਤੇ ਸਥਾਨਕ ਮਛੇਰਿਆਂ ਨੇ ਸਮੁੰਦਰ ‘ਚੋਂ ਬਾਹਰ ਕੱਢਿਆ। ਵੀਰਵਾਰ ਨੂੰ ਵੀ ਤਲਾਸ਼ੀ ਅਤੇ ਬਚਾਅ ਕਾਰਜ ਜਾਰੀ ਰਿਹਾ। ਗਵਰਨਰ ਨੇ ਕਿਹਾ ਕਿ ਐੱਮ.ਵੀ. ਲੇਡੀ ਮੈਰੀ ਜੋਏ 3’ ਸਮੁੰਦਰੀ ਜਹਾਜ ‘ਤੇ ਸਵਾਰ ਜ਼ਿਆਦਾਤਰ ਲੋਕਾਂ ਨੂੰ ਰਾਤ ਭਰ ਜਾਰੀ ਮੁਹਿੰਮ ਦੌਰਾਨ ਬਚਾਅ ਲਿਆ ਗਿਆ। ਵੱਖ-ਵੱਖ ਏਜੰਸੀਆਂ ਵੱਲੋਂ ਮ੍ਰਿਤਕ ਗਿਣਤੀ ਦਾ ਮਿਲਾਨ ਕੀਤਾ ਜਾ ਰਿਹਾ ਹੈ, ਇਸ ਲਈ ਮ੍ਰਿਤਕਾਂ ਦੀ ਗਿਣਤੀ ਵਧਣ ਦਾ ਖ਼ਦਸ਼ਾ ਹੈ। ਗਵਰਨਰ ਨੇ ਦੱਸਿਆ ਕਿ ਮ੍ਰਿਤਕਾਂ ‘ਚ 3 ਬੱਚੇ ਵੀ ਸ਼ਾਮਲ ਹਨ। ਇਸ ਹਾਦਸੇ ‘ਚ ਘੱਟੋ-ਘੱਟ 23 ਯਾਤਰੀ ਜ਼ਖ਼ਮੀ ਹੋਏ ਹਨ ਜਿਨ੍ਹਾਂ ਨੂੰ ਹਸਪਤਾਲਾਂ ‘ਚ ਦਾਖ਼ਲ ਕਰਵਾਇਆ ਗਿਆ ਹੈ। ਅਧਿਕਾਰੀਆਂ ਨੇ ਦੱਸਿਆ ਕਿ ਡੁੱਬਣ ਕਾਰਨ ਮਰਨ ਵਾਲੇ ਜ਼ਿਆਦਾਤਰ ਲੋਕਾਂ ਦੀਆਂ ਲਾਸ਼ਾਂ ਬਰਾਮਦ ਕਰ ਲਈਆਂ ਗਈਆਂ ਹਨ। ਹਾਟਾਮੈਨ ਨੇ ਦੱਸਿਆ ਕਿ ਬਲਦੇ ਹੋਏ ਸਮੁੰਦਰੀ ਜਹਾਜ਼ ਨੂੰ ਬਾਸੀਲਾਨ ਦੇ ਕੰਢੇ ਤੱਕ ਲਿਜਾਇਆ ਗਿਆ ਹੈ। ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਫਿਲੀਪੀਨ ਟਾਪੂ ‘ਚ ਅਕਸਰ ਤੂਫਾਨਾਂ, ਖਰਾਬ ਹਾਲਤ ਵਾਲੀਆਂ ਕਿਸ਼ਤੀਆਂ, ਕਿਸ਼ਤੀਆਂ ਦੇ ਸਮਰਥਾ ਤੋਂ ਜ਼ਿਆਦਾ ਭਰੇ ਹੋਣ ਅਤੇ ਸੁਰੱਖਿਆ ਨਿਯਮਾਂ ਦੇ ਲਾਗੂ ਕਰਨ ‘ਚ ਢਿੱਲ ਕਾਰਨ ਖ਼ਾਸ ਤੌਰ ‘ਤੇ ਦੂਰ-ਦੁਰਾਡੇ ਦੇ ਸੂਬਿਆਂ ‘ਚ ਸਮੁੰਦਰੀ ਦੁਰਘਟਨਾਵਾਂ ਆਮ ਹਨ।
