ਸਕਾਟਲੈਂਡ ਦਾ ਦਿਲ ਨੂੰ ਛੂਹ ਲੈਣ ਵਾਲਾ ਇਕ ਮਾਮਲਾ ਸਾਹਮਣੇ ਆਇਆ ਹੈ ਜਿਸ ‘ਚ ਇਕ ਮਾਂ ਨੂੰ ਆਪਣੇ ਪੁੱਤਰ ਦੀ ਮੌਤ ਦੇ 48 ਸਾਲ ਬਾਅਦ ਉਸ ਦੇ ਅਵਸ਼ੇਸ਼ ਮਿਲੇ। ਉਹ ਚਾਰ ਦਹਾਕਿਆਂ ਤੋਂ ਵੱਧ ਸਮੇਂ ਤੋਂ ਇਹ ਪਤਾ ਲਗਾਉਣ ਲਈ ਸੰਘਰਸ਼ ਕਰ ਰਹੀ ਸੀ ਕਿ ਉਸ ਦੇ ਪੁੱਤਰ ਦੀ ਲਾਸ਼ ਨਾਲ ਕੀ ਹੋਇਆ। ਰਿਪੋਰਟ ਅਨੁਸਾਰ ਸਕਾਟਲੈਂਡ ਦੇ ਐਡਿਨਬਰਗ ਦੀ ਰਹਿਣ ਵਾਲੀ 74 ਸਾਲਾ ਲਿਡੀਆ ਰੀਡ ਨੇ ਇਹ ਪਤਾ ਲਗਾਉਣ ਲਈ ਲੰਬਾ ਸੰਘਰਸ਼ ਕੀਤਾ ਕਿ 1975 ‘ਚ ਉਸਦੇ ਪੁੱਤਰ ਮੌਤ ਤੋਂ ਬਾਅਦ ਉਸਦੇ ਨਾਲ ਕੀ ਹੋਇਆ ਕਿਉਂਕਿ ਉਸਦੇ ਤਾਬੂਤ ‘ਚ ਕੋਈ ਮਨੁੱਖੀ ਅਵਸ਼ੇਸ਼ ਨਹੀਂ ਮਿਲੇ ਸਨ। ਸਤੰਬਰ 2017 ‘ਚ ਇਕ ਅਦਾਲਤ ਨੇ ਖੋਦਾਈ ਕਰਕੇ ਲਾਸ਼ ਨੂੰ ਕੱਢਣ ਦਾ ਹੁਕਮ ਦਿੱਤਾ ਸੀ ਅਤੇ ਉਦੋਂ ਰੀਡ ਨੂੰ ਪਤਾ ਲੱਗਾ ਕਿ ਉਸ ਦੇ ਪੁੱਤਰ ਨੂੰ ਉਸ ਥਾਂ ‘ਤੇ ਦਫ਼ਨਾਇਆ ਨਹੀਂ ਗਿਆ ਸੀ। ਰੀਡ ਦਾ ਪੁੱਤਰ ਸਿਰਫ਼ ਇਕ ਹਫ਼ਤੇ ਦਾ ਸੀ ਜਦੋਂ ਉਸਦੀ ਮੌਤ ਹੋ ਗਈ। ਉਸਦੀ ਮੌਤ ਰੀਸਸ ਨਾਮਕ ਬਿਮਾਰੀ ਨਾਲ ਹੋਈ ਜਿਸ ‘ਚ ਇਕ ਗਰਭਵਤੀ ਔਰਤ ਦੇ ਖੂਨ ‘ਚੋਂ ਐਂਟੀਬਾਡੀਜ਼ ਉਸਦੇ ਅਣਜੰਮੇ ਬੱਚੇ ਦੇ ਖੂਨ ਦੇ ਸੈੱਲਾਂ ਨੂੰ ਨਸ਼ਟ ਕਰ ਦਿੰਦੇ ਹਨ। ਰੀਡ ਨੇ ਦਾਅਵਾ ਕੀਤਾ ਕਿ ਜਦੋਂ ਉਸਨੇ ਆਪਣੇ ਪੁੱਤਰ ਦੀ ਮੌਤ ਤੋਂ ਕੁਝ ਦਿਨਾਂ ਬਾਅਦ ਹਸਪਤਾਲ ‘ਚ ਆਪਣੇ ਪੁੱਤਰ ਨੂੰ ਦਿਖਾਉਣ ਲਈ ਲਈ ਕਿਹਾ ਤਾਂ ਉਸਨੂੰ ਇਕ ਹੋਰ ਬੱਚਾ ਦਿਖਾ ਦਿੱਤਾ ਗਿਆ। ਰੀਡ ਨੇ ਇਹ ਵੀ ਕਿਹਾ ਕਿ ਉਸ ਦੇ ਪੁੱਤਰ ਦਾ ਪੋਸਟਮਾਰਟਮ ਵੀ ਉਸ ਦੀ ਮਰਜ਼ੀ ਦੇ ਖ਼ਿਲਾਫ਼ ਕੀਤਾ ਗਿਆ ਸੀ। ਰੀਡ ਦੇ ਖਦਸ਼ੇ ਵੀ ਬਾਅਦ ‘ਚ ਸੱਚ ਸਾਬਤ ਹੋਏ ਕਿ ਉਸਦੇ ਪੁੱਤਰ ਦੇ ਅੰਗਾਂ ਨੂੰ ਜਾਂਚ ਲਈ ਕੱਢ ਲਿਆ ਗਿਆ ਸੀ। ਕਰਾਊਨ ਆਫਿਸ ਨੇ ਹੁਣ ਐਡਿਨਬਰਗ ਰਾਇਲ ਇਨਫਰਮਰੀ ‘ਚ ਰੱਖੇ ਅੰਗਾਂ ਨੂੰ ਗੈਰੀ ਦੀ ਮਾਂ ਨੂੰ ਸੌਂਪਣ ਦੀ ਇਜਾਜ਼ਤ ਦੇ ਦਿੱਤੀ ਹੈ।
